ഇൻസ്പെക്ഷൻ ബംഗ്ലാവ്! മലയാളത്തിലെ എണ്ണം പറഞ്ഞ വെബ് സീരീസുകളുടെ ലിസ്റ്റിലേക്ക് ഒരു പേരുകൂടി

Authored by: ഋതു നായർ|Samayam Malayalam•15 Nov 2025, 8:06 am

ഹൊറർ കോമഡി ചിത്രങ്ങൾ ഏതു ഭാഷയിൽ ആണെങ്കിലും ഏത് കാലഘട്ടത്തിൽ ആണെങ്കിലും എന്നും ഒരു വിജയ ഫോർമുലയാണ്. ചിരിപ്പിച്ചുകൊണ്ട് പേടിപ്പിക്കുന്ന കഥ പറച്ചിലുകൾക്ക് അന്നും ഇന്നും എന്നും ആരാധകരും ഏറെയാണ്. ഇതര ഭാഷകളിൽ ഇത്തരം വിഭാഗത്തിൽ ഒരുപാട് ചിത്രങ്ങൾ ഇറങ്ങുന്നുണ്ടെങ്കിലും മലയാളത്തിൽ അത് നന്നേ കുറവാണ്, ആ കുറവ് നികത്തിക്കൊണ്ടുതന്നെ മലയാള ചരിത്രത്തിൽ നിന്നും ആദ്യമായി ഹൊറർ കോമഡി വിഭാഗത്തിൽ ഒരു ക്വാളിറ്റിയുള്ള വെബ് സീരീസ് പുറത്തിറങ്ങിയിരിക്കുകയാണ്.

ഇൻസ്പെക്ഷൻ ബംഗ്ലാവ് എന്ന വെബ് സീരീസ് പുറത്തിറക്കിയിരിക്കുന്നത് ഇന്ത്യയിലെ തന്നെ പ്രമുഖ സ്ട്രീമിംഗ് പ്ലാറ്റ്ഫോമായ സീ 5വിൽ നിന്നുമാണ്.

മലയാളികളുടെ പ്രിയതാരം ശബരീഷ് വർമ്മ മുഖ്യ വേഷത്തിൽ എത്തുന്ന സീരീസ് സാഹിത്യ അക്കാദമി അവാർഡ് ജേതാവ് സുനീഷ് വാരനാടിൻ്റെ രചനയിൽ, സംവിധായകൻ സൈജു എസ് എസ് ആണ് ഒരുക്കിയിരിക്കുന്നത്. ഉണ്ണിമുകുന്ദൻ നായകനായ 'ഇര' എന്ന ചിത്രം സംവിധാനം ചെയ്ത് ശ്രദ്ധേയനായ വ്യക്തിയാണ് സൈജു.ശബരീഷിന് പുറമേ ആധിയ പ്രസാദ്, ഷാജു ശ്രീധർ, സെന്തിൽ കൃഷ്ണ രാജാമണി എന്നിവരും പ്രധാന കഥാപാത്രങ്ങളായി സീരീസിൽ എത്തുന്നുണ്ട്. അഭിനയത്രി കൂടിയായ വീണ നായർ ആണ് ചിത്രം വീണ നായർ പ്രൊഡക്ഷൻസിന്റെ ബാനറിൽ ഒരുക്കുന്നത്.

ഒരു ഗ്രാമത്തിന്റെ പശ്ചാത്തലത്തിൽ കഥ പറയുന്ന സീരീസിൽ, ഏറെ ദുരൂഹതകൾ നിറഞ്ഞ പ്രേതബാധയുണ്ടെന്ന് നാട്ടുകാർ വിശ്വസിക്കുന്ന ഒരു കെട്ടിടത്തിലേക്ക് പോലീസ് സ്റ്റേഷൻ മാറ്റുകയും, അല്പം പേടിയുള്ള ദൈവത്തിലും പ്രേതങ്ങളിലും വിശ്വാസമുള്ള ഒരു സർക്കിൾ ഇൻസ്പെക്ടർ ചാർജെടുക്കുകയും ശേഷം സ്റ്റേഷനിൽ നടക്കുന്ന അതിമാനുഷിക സംഭവങ്ങളുമാണ് പരമ്പരയിൽ. 7 എപ്പിസോഡുകൾ നീണ്ടുനിൽക്കുന്ന സീരീസ് വളരെ ചടുലമായാണ് അണിയറ പ്രവർത്തകർ ഒരുക്കിയിരിക്കുന്നത്. ശബരീഷ് വർമ്മ-ഷാജു ശ്രീധർ കോമ്പിനേഷനാണ് എടുത്തുപറയേണ്ടത്. മലയാള സിനിമ പ്രേമികൾക്ക് പ്രിയപ്പെട്ട കൂട്ടുകെട്ടുകളുടെ ലിസ്റ്റിൽ ഇനി ഈ കോംബോയും കാണും എന്ന് ഉറപ്പാണ്.
ഗംഭീരമായ ഹൊറർ സീനുകളുടെ മേക്കിങ് തന്നെയാണ് സീരീസിന്റെ മുഖ്യ ആകർഷണം, ഏച്ചുകട്ടലുകൾ ഇല്ലാത്ത വളരെ സ്വാഭാവികമായ ഹൊറർ സീനുകൾക്ക് അണിയറ പ്രവർത്തകർ പ്രത്യേക കയ്യടി അർഹിക്കുന്നു.

അതോടെ മലയാളത്തിലെ എണ്ണം പറഞ്ഞ വെബ് സീരീസുകളുടെ ലിസ്റ്റിലേക്ക് ഇൻസ്പെക്ഷൻ ബംഗ്ലാവ് എന്ന പേര് കൂടി ചേർക്കപെടുന്നു.