ഏതൊരു അച്ഛനാണെങ്കിലും തല്ലിപ്പോവും, അതാണ് ധ്രുവ് ചെയ്തത്! വിക്രം മകനെ തല്ലാനുണ്ടായ സാഹചര്യം?

Authored by: അശ്വിനി പി|Samayam Malayalam•20 Oct 2025, 3:54 pm

ബൈസൺ എന്ന ചിത്രത്തിന്റെ പ്രമോഷനുമായി ബന്ധപ്പെട്ട തിരക്കുകളിലാണ് വിക്രമിന്റെ മകൻ ധ്രുവ് വിക്രം . അനുപരമ പരമേശ്വരനും രജിഷ വിജയനും കേന്ദ്ര കഥാപാത്രങ്ങളായി എത്തിയ ചിത്രം സംവിധാനം ചെയ്തിരിയ്ക്കുന്നത് മാരി സെൽവരാജാണ്. സിനിമയെ കുറിച്ച് വാതാരോടെ പറയുന്നതിനൊപ്പം തന്റെ ചില പേഴ്സണൽ കാര്യങ്ങളും ധ്രുവ് വിക്രം വെളിപ്പെടുത്തുന്നുണ്ട്.

അച്ഛൻ വിക്രം തന്നെ തല്ലാനുണ്ടായ സാഹചര്യത്തെ കുറിച്ചാണ് ഏറ്റവുമൊടുവിൽ നൽകിയ ഒരു അഭിമുഖത്തിൽ സംസാരിച്ചിരിയ്ക്കുന്നത്. ജീവിതത്തിൽ നാലേ നാല് തവണ മാത്രമേ അച്ഛൻ എന്നെ തല്ലിയിട്ടുള്ളൂ, അതിലേറ്റവും ഒടുവിലത്തെ ആ തല്ലിനെ കുറിച്ചാണ് ധ്രുവ് വിക്രം തുറന്നു പറയുന്നത്.

Also Read: ഒരു കോമഡി സീൻ ചെയ്തു കൊണ്ടിരിക്കുമ്പോഴാണ് അമ്മ മരിച്ചു എന്ന വാർത്ത വന്നത്; രാധികയെ കുറിച്ച് മമിത ബൈജു

ഐ എന്ന ചിത്രത്തിന്റെ ഷൂട്ടിങ് നടന്നുകൊണ്ടിരിയ്ക്കുന്ന സമയത്തായിരുന്നു അത്. ചിത്രത്തിലെ പൂക്കളേ എന്ന പാട്ട് റെക്കോഡ് ചെയ്തതിന് ശേഷം ഒരു പെൻഡ്രൈവിൽ ആക്കി വച്ചിരുന്നു. പാട്ട് ഷൂട്ടിന് മുൻപ് അങ്ങനെ പെൻഡ്രൈവിൽ ആക്കി സൂക്ഷിക്കാറുണ്ട്. ഒരു തവണ ഈ പെൻഡ്രൈവ് വിക്രമിനോട് വീട്ടിൽ വച്ചു മറന്നു പോയി.

ധ്രുവ് അന്ന് സ്കൂളിൽ പഠിച്ചുകൊണ്ടിരിയ്ക്കുകയായിരുന്നുവത്രെ. ഫ്രണ്ട്സിന്റെ മുന്നിൽ ഒന്നാളാവാൻ വേണ്ടി ആ പെൻഡ്രൈവ് മോഷ്ടിച്ചു കൊണ്ടു പോയി, സ്കൂളിൽ എല്ലാവരെയും കേൾപ്പിച്ചു. ശങ്കർ തന്റെ സിനിമ അണിയറ രസഹസ്യങ്ങൾ എല്ലാം വളരെ സ്വകാര്യമായി വയ്ക്കുന്ന സംവിധായകനാണ്. പ്രത്യേകിച്ചു ഐ യിലെ വിക്രമിന്റെ ലുക്ക് പോലും സ്വകാര്യമായി വച്ചിരുന്നു. ആ സ്ഥാനത്താണ് ഒരു പാട്ട് ലീക്കായത്.


സ്കൂളിൽ പാട്ട് അനിയൻ ലീക്കാക്കിയ കാര്യം വിക്രമിന്റെ മകൾ വന്ന് പറഞ്ഞപ്പോൾ നടന് കടുത്ത ദേഷ്യം വന്നു. ധ്രുവിന്റെ മുതുകിന് ഓങ്ങിയടിച്ചു. വിക്രം ഐ എന്ന സിനിമയ്ക്ക് വേണ്ടി ബോഡി ബിൽഡ് അപ് ഒക്കെ ചെയ്തു നിൽക്കുന്ന സമയമായിരുന്നു, അതുകൊണ്ടു തന്നെ അടിക്ക് നല്ല പവറും ഉണ്ടായിരുന്നു, ആ അടിയുടെ പാട് ദിവസങ്ങളോളം മുതുകിൽ ഉണ്ടായിരുന്നു എന്നാണ് ധ്രുവ് വിക്രം പറഞ്ഞത്. ആ അടി കിട്ടേണ്ടതായിരുന്നു, ഏതൊരു അച്ഛനും അത് ചെയ്തു പോകും എന്നാണ് വീഡിയോയ്ക്ക് താഴെ വരുന്ന കമന്റുകൾ.