'ഞാൻ മരിക്കുമ്പോൾ അസം ജനത മുഴുവൻ എന്റെ ആ പാട്ട് പാടണം'; അന്ന് സുബീൻ ​ഗാർ​ഗ് പറഞ്ഞു

ലക്ഷക്കണക്കിന് ആരാധകരെ ദുഃഖത്തിലാഴ്ത്തിയിരിക്കുകയാണ് ​ഗായകൻ സുബീൻ ​ഗാർ​ഗിന്റെ അപകടമരണം. സിങ്കപ്പൂരിൽ സ്കൂബാ ഡൈവിങ്ങിനിടെയാണ് സുബീന്റെ അപ്രതീക്ഷിത മരണം. ഞായറാഴ്ച സ്വദേശമായ ​ഗുവാഹാട്ടിയിലെത്തിച്ച മൃതദേഹം കാണാനും അനുശോചനമർപ്പിക്കാനും ജനലക്ഷങ്ങളാണ് ഒഴുകിയെത്തുന്നത്. ആറുവർഷം മുൻപ് സുബീൻ തന്റെ അന്ത്യാഭിലാഷമെന്നോണം പറഞ്ഞ ചില വാക്കുകൾ ഇപ്പോൾ സോഷ്യൽ മീഡിയയിൽ പ്രചരിക്കുകയാണ്.

അസമീസ്, ബംഗാളി, ഹിന്ദി തുടങ്ങി നിരവധി ഭാഷകളിൽ അവിസ്മരണീയമായ ഗാനങ്ങൾ ആലപിച്ച ​ഗായകനാണ് സുബീൻ ​ഗാർ​ഗ്. 2019-ൽ ഒരു പരിപാടിയിൽ താൻ ആലപിച്ച ​ഗാനങ്ങളിൽ ഏറ്റവും പ്രിയപ്പെട്ടത് ഏതെന്ന സുബീന്റെ വാക്കുകളാണ് സോഷ്യൽ മീഡിയയിൽ വൈറലായിരിക്കുന്നത്. ​2001-ൽ പുറത്തിറങ്ങിയ ദാ​ഗ് എന്ന സം​ഗീത ആൽബത്തിലെ മായാബിനി എന്ന ​ഗാനമാണ് സുബീന്റെ പ്രിയ​ഗാനം. ഈ പാട്ടിനെ തന്റെ ഫാന്റസി എന്നാണ് അദ്ദേഹം അന്ന് വിശേഷിപ്പിച്ചത്.

"ഈ ഗാനം എൻ്റെ ഫാൻ്റസിയാണ്. ഞാൻ മരിക്കുമ്പോൾ, അസം മുഴുവൻ ഈ ഗാനം ആലപിക്കണം. അതിനാൽ ഈ ഗാനം നിങ്ങൾക്കും എനിക്കും എല്ലാവർക്കും വളരെ പ്രധാനപ്പെട്ടതാണ്," സുബീന്റെ വാക്കുകൾ ഇങ്ങനെയായിരുന്നു.

സുബീൻ തന്നെയാണ് ഈ ​ഗാനം എഴുതിയത്. കൽപ്പന പടോവരിക്കൊപ്പമാണ് അദ്ദേഹം ഇത് ആലപിച്ചത്. പ്രണയവും വിരഹവുമാണ് ഗാനത്തിൻ്റെ പ്രമേയം. അദ്ദേഹത്തിൻ്റെ ഏറ്റവും പ്രശസ്തവും ഹിറ്റായതുമായ ഗാനങ്ങളിൽ ഒന്നാണിത്. ജസ്റ്റ് അസം തിങ്സ് എന്ന ഇൻസ്റ്റാ​ഗ്രാം പേജിലാണ് ഈ വീഡിയോ പോസ്റ്റ് ചെയ്തിരിക്കുന്നത്. മറ്റുചില പേജുകളിലും അദ്ദേഹത്തിന്റെ ഈ വാക്കുകളടങ്ങിയ വീഡിയോ പ്രചരിക്കുന്നുണ്ട്.

തിങ്കളാഴ്ചവരെ സുബീന്റെ മൃതദേഹം പൊതുദർശനത്തിന് വെയ്ക്കുമെന്ന് അസം മുഖ്യമന്ത്രി ഹിമന്ത ബിശ്വ ശർമ എക്സിലൂടെ അറിയിച്ചിട്ടുണ്ട്. "നമ്മുടെയെല്ലാം പ്രിയപ്പെട്ട സുബീനെ അവസാനമായി ഒരു നോക്ക് കാണാൻ കൂടുതൽ കൂടുതൽ ആളുകൾ ആഗ്രഹിക്കുന്നു. ആ വികാരങ്ങൾ ഞങ്ങൾ പൂർണ്ണമായി മനസ്സിലാക്കുന്നു. അതുകൊണ്ട്, പൊതുജനങ്ങൾക്ക് സുബീന് അന്തിമോപചാരം അർപ്പിക്കാനായി ഭോഗേശ്വർ ബറുവ സ്റ്റേഡിയം ഇന്ന് രാത്രി മുഴുവൻ തുറന്നിരിക്കും. നാളെയും, ജനങ്ങൾക്ക് ആദരാഞ്ജലികൾ അർപ്പിക്കാനായി സുബീൻ്റെ ഭൗതികശരീരം സരുസജൈയിൽ സൂക്ഷിക്കും." മുഖ്യമന്ത്രി പറഞ്ഞു.

മൂന്ന് പതിറ്റാണ്ടിലേറെയായി തന്റെ ​ഗാനങ്ങളിലൂടെ സുബീൻ ആരാധകഹൃദയം കവർന്നു. 40 ഭാഷകളിലും ഉപഭാഷകളിലുമായി 38,000-ത്തിലധികം ഗാനങ്ങളാണ് അദ്ദേഹം ആലപിച്ചത്.

Content Highlights: Zubeen Garg`s iconic opus `Mayabini` holds a peculiar spot successful his bosom and Assam`s philharmonic heritage