യോജിച്ച ആൾ വന്നാൽ കല്യാണം കഴിക്കും; സൗഹൃദങ്ങളുടെ പേരിൽ സിനിമ തെരഞ്ഞെടുത്തിട്ടുണ്ട്- നമിത പ്രമോദ്

Samayam Malayalam നമിത പ്രമോദ്

കൊച്ചി: സൗഹൃദങ്ങളുടെ പുറത്ത് സിനിമ തെരഞ്ഞെടുത്തിട്ടുണ്ടെന്ന് നടി നമിത പ്രമോദ്. ഒരാൾ ഒരു സിനിമ ചെയ്യുന്നതിന്റെ ബുദ്ധിമുട്ട് തനിക്ക് അറിയാമെന്നും അതുകൊണ്ട് തന്നെ തന്നെക്കൊണ്ട് പറ്റുന്ന സഹായം ചെയ്യാൻ ശ്രമിക്കാറുണ്ടെന്നും നമിത പറയുന്നു. ഗസ്റ്റ് റോൾ ചെയ്യാൻ തനിക്ക് താത്പര്യമില്ലെന്നും അതുകൊണ്ട് അത്തരം റോളുകൾ ചെയ്യാൻ താത്പര്യമില്ലെന്നും നമിത പറയുന്നു. കഥ ഇഷ്ടപ്പെട്ടാൽ താൻ ഓക്കേ പറയുമെന്നും ചിലത് വർക്ക് ആയില്ലെങ്കിൽ വേറെ നോക്കാമെന്ന് പറഞ്ഞു ഒഴിവാക്കാറുണ്ടെന്നും നടി കൂട്ടിച്ചേർത്തു.'ചിലപ്പോൾ സിനിമ ചെയ്യാൻ കഷ്ടപ്പെടുന്ന സുഹൃത്തുക്കളെ തനിക്ക് അറിയാം. വലിയ തട്ടിലും മുട്ടലുമൊന്നുമില്ലന്ന് തോന്നിയാൽ തനിക്ക് പറ്റിയ കഥാപാത്രമാണെങ്കിൽ സൗഹൃദത്തിന്റെ പുറത്ത് സിനിമ തെരഞ്ഞെടുക്കും. എല്ലാ സിനിമകളും താൻ വളരെ ഇഷ്ടപ്പെട്ട് ചെയ്യുന്നതാണ്'.


'ചിലത് കഥകേൾക്കുമ്പോൾ വളരെ രസകരമായി തോന്നുമെങ്കിലും സിനിമയുടെ അവസാനം അങ്ങനെയാകണമെന്നില്ല. അതുകൊണ്ട് തന്നെ സിനിമയുടെ തെരഞ്ഞെടുപ്പ് വളരെ ബുദ്ധിമുട്ടാണ്. മലയാള സിനിമയുടെ ബോണ്ടിങ് വളരെ വലുതാണ്. ഇവിടെയൊരു ഇമോഷണൽ കണക്ഷൻ കൂടുതലാണ്. മറ്റ് ഭാഷകളിൽ ജോലി ചെയ്യുമ്പോൾ അവർ വളരെ പ്രൊഫഷണലായാണ് പെരുമാറുക.' എന്നും നമിത പറഞ്ഞു.

താൻ ചെയ്ത എല്ലാ സിനിമകളും ഇഷ്ടമാണ്. പുള്ളി പുലിയും ആട്ടിൻകുട്ടിയും വിക്രമാദിത്യൻ , കമരസംഭവം എന്നീ സിനിമകൾ വളരെ ഇഷ്ടമാണ്. കമരസംഭവം വിജയിച്ചില്ലെങ്കിലും ക്രിട്ടിക്കലി വലിയ ചർച്ചയായ സിനിമയാണിത്. സിദ്ധാർത് ശിവയുടെ ആൺ എന്ന സിനിമ വളരെ അധികം ഇഷ്ടമാണ്. കുറെയധികം നാൾ ഈ സിനിമയിലെ കഥാപാത്രം തന്നെ വളരെയധികം വേട്ടയാടിയിരുന്നുവെന്നും നമിത സമയം മലയാളത്തിന് നൽകിയ അഭിമുഖത്തിൽ പറഞ്ഞു.
ദുൽഖറും ഉണ്ണി മുകുന്ദനും വീണ്ടും ഒരുമിക്കുമോ? വിക്രമാദിത്യൻ 2 പ്രതീക്ഷിക്കണോ? വെളിപ്പെടുത്തലുമായി നമിതാ പ്രമോദ്

ഏറ്റവും കൂടുതൽ വെറുപ്പിക്കുന്ന ചോദ്യം കല്യാണവുമായി ബന്ധപ്പെട്ടതാണ്. ഒരു ദിവസം തന്നെ നിരവധി തവണ ഇന്റർവ്യൂ എടുക്കുമ്പോൾ ഇത്തരം ചോദ്യങ്ങൾ വരുമ്പോൾ ബുദ്ധിമുട്ടുണ്ടാക്കാറുണ്ടെന്നും നമിത പറഞ്ഞു.

ജീവിതത്തിൽ കല്യാണം ഒരു പ്രധാനകാര്യമാണെന്നും കറക്ട് ആയിട്ടുള്ള ഒരാളെ കിട്ടിയാൽ കല്യാണം കഴിക്കുമെന്നും താരം കൂട്ടിച്ചേർത്തു. അമ്മൂമ്മ ഇപ്പോഴും തന്നോട് കല്യാണക്കാര്യം പറയാറുണ്ടെന്നും അത് അത്ര ചെറിയ കാര്യമായി താൻ കാണുന്നില്ലെന്നും നടി പറയുന്നു. സോഷ്യൽ പ്രഷറിന്റെ പുറത്താണ് വീട്ടുകാർ കല്യാണത്തിന് നിര്ബന്ധിക്കുന്നതെന്നും നമിത പറയുന്നു.