ലണ്ടനിൽത്തന്നെ ഒന്നിക്കും 'രാജും സിമ്രാനും', ലെസ്റ്റർ സ്ക്വയറിൽ വെങ്കല പ്രതിമ ഉയരുന്നു

9 months ago 11

10 April 2025, 08:23 AM IST

Kajol and Shah Rukh Khan

‘ദിൽവാലെ ദുൽഹനിയ ലെ ജായേംഗെ’യിൽ കജോളും ഷാരൂഖ് ഖാനും | ഫോട്ടോ: അറേഞ്ച്ഡ്

ട്രെയിൻ നീങ്ങുന്നു, വാതിലിൽ പുറത്തേക്ക് കൈനീട്ടിനിൽക്കുന്ന രാജിനടുത്തേക്കെത്താൻ സിമ്രാൻ ഓടുന്നത് കാണുമ്പോൾ ഇപ്പോഴും ഓരോ സിനിമാപ്രേമിയുടെയും നെഞ്ചിടിപ്പേറും. ഷാരൂഖ് ഖാനും കജോളും തകർത്തഭിനയിച്ച്, 1995-ൽ പുറത്തിറങ്ങിയ ‘ദിൽവാലെ ദുൽഹനിയ ലെ ജായേംഗെ’യുടെ ഈ വിജയഗാഥയ്ക്ക് മാറ്റുകൂട്ടാൻ ഇതാ ഒന്നുകൂടി.

സിനിമയിൽ ഷാരൂഖ് അവതരിപ്പിച്ച രാജും കജോളിന്റെ സിമ്രാനും ആദ്യമായി കണ്ടുമുട്ടുന്ന ലണ്ടനിലെ ലെസ്റ്റർ സ്ക്വയറിൽ അവരുടെ വെങ്കല പ്രതിമ ഉയരും.

ലെസ്റ്റർ സ്ക്വയറിലെ ‘സീൻസ് ഇൻ ദി സ്ക്വയർ’ സിനിമാ ട്രെയിലിൽ ഈ പ്രതിമ നിർമിക്കുമെന്ന് ഹാർട്ട് ഓഫ് ലണ്ടൻ ബിസിനസ് അലയൻസ് ബുധനാഴ്ച പ്രഖ്യാപിച്ചു. ഒക്ടോബർ 20-ന് വരാനിരിക്കുന്ന സിനിമയുടെ 30-ാം റിലീസ് വാർഷികത്തിന് മാസങ്ങൾക്കുമുൻപ്‌ അനാച്ഛാദനവും ചെയ്യും.

ട്രെയിൻ യാത്രയ്ക്കിടയിൽ ലണ്ടനിൽവെച്ച് കണ്ടുമുട്ടുന്ന ഇന്ത്യക്കാരായ ചെറുപ്പക്കാരുടെ പ്രണയകഥയാണ് ദിൽ വാലെ ദുൽഹനിയ ലെ ജായേംഗെ. ആദിത്യ ചോപ്ര സംവിധാനം ചെയ്ത് യാഷ് രാജ് ഫിലിംസ് നിർമിച്ച സിനിമയിലെ മിക്കരംഗങ്ങളും യുകെയിലാണ് ചിത്രീകരിച്ചത്.