11 വയസ് പ്രായവ്യത്യാസം! പെണ്ണുകാണാന്‍ വന്നപ്പോള്‍ പറഞ്ഞതെല്ലാം നെഗറ്റീവ്! എന്നിട്ടും യെസ് പറഞ്ഞു! അജയനുമായുള്ള വിവാഹ ജീവിതത്തെക്കുറിച്ച് ഗായത്രി

Edited byഅനുപമ നായർ | Samayam Malayalam | Updated: 23 Apr 2025, 12:59 pm

ഗിന്നസ് പക്രു എന്ന അജയന്റെ ഭാര്യയും മക്കളുമെല്ലാം പ്രേക്ഷകര്‍ക്ക് പരിചിതരാണ്. കുടുംബത്തെക്കുറിച്ച് എപ്പോഴും വാചാലനാവാറുള്ളതാണ് പക്രു. അമ്മയും ഭാര്യയും മകളുമെല്ലാം കട്ട സപ്പോര്‍ട്ടായി കൂടെയുണ്ടെന്ന് അദ്ദേഹം പറയാറുണ്ട്. യൂട്യൂബ് ചാനലുമായി സജീവമാണ് ഗായത്രി. അജയനുമായുള്ള വിവാഹത്തെക്കുറിച്ചും, മക്കളുടെ ജനനത്തെക്കുറിച്ചുമെല്ലാമുള്ള ചോദ്യങ്ങള്‍ക്ക് മറുപടിയുമായാണ് കഴിഞ്ഞ ദിവസം ഗായത്രി എത്തിയത്. അഭിമുഖങ്ങളിലൂടെയായി ചേട്ടന്‍ പറഞ്ഞ് പല കാര്യങ്ങളും നിങ്ങള്‍ക്ക് അറിയാവുന്നതാണ്. കുറേയേറെ ചോദ്യങ്ങള്‍ വന്നിരുന്നു. അതാണ് ഇങ്ങനെയൊരു ക്യുആന്‍ഡ് എ ചെയ്യുന്നതെന്നും അവര്‍ പറഞ്ഞിരുന്നു.

ലവ് മാര്യേജാണോ നിങ്ങളുടേത്, അതേക്കുറിച്ച് പറയാമോയെന്നായിരുന്നു ഒരാള്‍ ചോദിച്ചത്. ഞങ്ങളുടേത് അറേഞ്ചഡ് മാര്യേജാണ്. ഹെല്‍ത്ത് ഇന്‍സ്‌പെക്ടര്‍ കോഴ്‌സ് കഴിഞ്ഞ് റിസല്‍ട്ട് വരാനായി കാത്തിരിക്കുകയായിരുന്നു. ആ സമയത്താണ് ചേട്ടന്റെ അമ്മയുടെ ഫ്രണ്ട് എന്റെ അമ്മയോട് ചേട്ടന് കല്യാണം നോക്കുന്നതിനെക്കുറിച്ച് പറഞ്ഞത്.ചേട്ടന്‍ സിനിമയിലാണെന്നോ, പ്രോഗ്രാം ചെയ്യുന്നുണ്ടോയെന്നൊന്നും എനിക്ക് അറിയില്ലായിരുന്നു. ഇങ്ങനെയൊരു പ്രൊപ്പൊസലിനെക്കുറിച്ച് പറഞ്ഞപ്പോള്‍ ഫോട്ടോ കാണിച്ചിരുന്നു.

Also Read: ഞങ്ങളെന്താണ് ചെയ്യേണ്ടതെന്ന് ചോദിച്ച് ലാലേട്ടനും ശോഭന ചേച്ചിയും വന്നു! പിന്നെ കണ്ടത് ആ സീന്‍! തുടരും സിനിമയിലെ റൊമാന്റിക് രംഗത്തെക്കുറിച്ച് തരുണ്‍ മൂര്‍ത്തി

എനിക്ക് ഇഷ്ടമാണ് അദ്ദേഹത്തെ കല്യാണം കഴിക്കാന്‍ എന്ന് ഞാന്‍ പറഞ്ഞപ്പോള്‍ ആദ്യം എല്ലാവരും എതിര്‍ത്തു. ഞാന്‍ അതില്‍ ഉറച്ച് നിന്നതോടെയാണ് ആ ചേച്ചിയോട് പറഞ്ഞത്. അതിന് ശേഷമാണ് ചേട്ടന്റെ അമ്മയും അച്ഛനും ചേച്ചിമാരുമൊക്കെ വരുന്നത്. അതുംകഴിഞ്ഞാണ് ചേട്ടന്‍ പെണ്ണുകാണാനായി വന്നത്.

എനിക്ക് കുറച്ച് സംസാരിക്കാനുണ്ടെന്ന് പറഞ്ഞിരുന്നു. നെഗറ്റീവായിരുന്നു പറഞ്ഞതെല്ലാം. ഈ കല്യാണം നടന്നാല്‍ ഒരുപാട് ബുദ്ധിമുട്ടുകളുണ്ടാവും. ഒന്നിച്ച് സിനിമ കാണാന്‍ പോവുന്നതൊന്നും നടക്കില്ല. ബൈക്കില്‍ കറങ്ങാന്‍ പറ്റില്ല. ചേട്ടനെക്കൊണ്ട് ചെയ്യാന്‍ പറ്റാത്ത കാര്യങ്ങളെന്തൊക്കെയാണെന്ന് പറഞ്ഞിരുന്നു. കുട്ടിയുണ്ടാവുമോയെന്ന കാര്യം പോലും സംശയമാണ്. ആലോചിച്ച് തീരുമാനമെടുത്തോളൂ എന്നും പറഞ്ഞിരുന്നു.

എല്ലാം കേട്ടപ്പോഴും എനിക്ക് കുഴപ്പമില്ലെന്ന് പറഞ്ഞപ്പോഴാണ് കല്യാണം തീരുമാനിച്ചത്. കല്യാണം കഴിഞ്ഞ ശേഷമാണ് റിസല്‍ട്ട് വന്നത്. അന്ന് ജോലിക്കൊന്നും ശ്രമിച്ചില്ല. കുഴപ്പമില്ലാത്ത മാര്‍ക്കുണ്ടായിരുന്നു. 19ാം വയസിലായിരുന്നു കല്യാണം കഴിഞ്ഞത്. അന്ന് ചേട്ടന്‍ പറഞ്ഞ നെഗറ്റീവ്‌സെല്ലാം പോസിറ്റീവാണെന്ന് എനിക്ക് കൂടെ ജീവിച്ച് തുടങ്ങിയപ്പോള്‍ മനസിലായി. സാധാരണ ഒരാള്‍ എങ്ങനെയാണോ മറ്റൊരാളെ ഇഷ്ടപ്പെടുന്നത്, അതുപോലെ തന്നെയാണ് എനിക്കും ചേട്ടനെ ഇഷ്ടമായത്. കുട്ടികളുടെ കാര്യവും ചേട്ടന്ർറെ കാര്യങ്ങളുമൊക്കെയായി ഇവിടെ നല്ല തിരക്കാണ്.