2025 സീസൺ ഐപിഎൽ അനിശ്ചിത കാലത്തേക്ക് നിർത്തിവെച്ചു, നിർണായക തീരുമാനം ഇന്ത്യ - പാക് സംഘർഷത്തെ തുടർന്ന്

Curated byഗോകുൽ എസ് | Samayam Malayalam | Updated: 9 May 2025, 1:42 pm

ഇന്ത്യ - പാകിസ്താൻ സംഘർഷം കനത്ത സാഹചര്യത്തിൽ 2025 സീസൺ ഇന്ത്യൻ പ്രീമിയർ ലീഗിലെ മത്സരങ്ങൾ നിർത്തിവെക്കാൻ ബിസിസിഐ തീരുമാനിച്ചതായി റിപ്പോർട്ട്. ഐപിഎല്ലിൽ ഇന്നലെ നടന്ന പഞ്ചാബ് കിങ്സ് - ഡെൽഹി ക്യാപിറ്റൽസ് പോരാട്ടം പാതിവഴിയിൽ ഉപേക്ഷിക്കാൻ ബിസിസിഐ തീരുമാനിച്ചിരുന്നു. ഇതോടെ ഇത്തവണത്തെ ഐപിഎല്ലിന്റെ ഭാവിയുമായി ബന്ധപ്പെട്ടും അനിശ്ചിതത്വങ്ങൾ ശക്തമായിരുന്നു. ടൂർണമെന്റുമായി മുന്നോട്ട് പോകാനുള്ള സാധ്യതകൾ ബിസിസിഐ പരിശോധിച്ചെങ്കിലും നിലവിലെ സാഹചര്യത്തിൽ‌ ലീഗ് നിർത്തിവെക്കുന്നതാണ് നല്ലതെന്ന തീരുമാനത്തിലേക്ക് അവരെത്തുകയായിരുന്നുവെന്നാണ് സൂചനകൾ. ടൈംസ് ഓഫ് ഇന്ത്യ അടക്കമുള്ള മാധ്യമങ്ങൾ ഈ വിവരം റിപ്പോർട്ട് ചെയ്തിട്ടുണ്ട്. ഇക്കാര്യത്തിൽ ഔദ്യോഗിക പ്രഖ്യാപനം ഉടനുണ്ടാകുമെന്നാണ് സൂചനകൾ.

അതേ സമയം ഐപിഎൽ നിർത്തിവെക്കുന്നതോടെ താരങ്ങളെല്ലാം വീടുകളിലേക്ക് മടങ്ങും. നേരത്തെ പഞ്ചാബ് കിങ്സ് - ഡെൽഹി ക്യാപിറ്റൽസ് മത്സരം ഉപേക്ഷിച്ചതിന് ശേഷം ഹോട്ടലിലേക്ക് മടങ്ങിയ താരങ്ങളെയും ലീഗുമായി ബന്ധപ്പെട്ട് പ്രവർത്തിക്കുന്നവരെയും പ്രത്യേക ട്രെയിനിലായിരുന്നു ബിസിസിഐ ധരംശാലയിൽ നിന്ന് മാറ്റിയത്.

ഐപിഎൽ 2025 നിർത്തിവെക്കുമോ; നിർണായക വെളിപ്പെടുത്തൽ നടത്തി ഐപിഎൽ ചെയർമാൻ
അതേ സമയം 58 മത്സരങ്ങൾക്ക് ശേഷമാണ് 2025 സീസൺ ഐപിഎൽ നിർത്തിവെക്കാനുള്ള തീരുമാനം വന്നിരിക്കുന്നത്. ഗ്രൂപ്പ് ഘട്ടത്തിലെ 12 മത്സരങ്ങൾ അടക്കം ആകെ 16 കളികളാണ് ഇനി ലീഗിൽ അവശേഷിക്കുന്നത്. ഇത് പിന്നീട് നടത്തിയേക്കുമെന്നാണ് സൂചനകൾ. ഇക്കാര്യങ്ങളിലെല്ലാം ബിസിസിഐ തന്നെ വ്യക്തത വരുത്തും.

അതേ സമയം ശുഭ്മാൻ ഗിൽ നയിക്കുന്ന ഗുജറാത്ത് ടൈറ്റൻസാണ് നിലവിൽ 2025 സീസൺ ഐപിഎല്ലിന്റെ പോയിന്റ് പട്ടികയിൽ ഒന്നാമത്. 11 കളികളിൽ എട്ടെണ്ണത്തിൽ വിജയിച്ച അവർക്ക് 16 പോയിന്റുണ്ട്. ആർസിബി 11 കളികളിൽ 16 പോയിന്റുമായി രണ്ടാം സ്ഥാനത്തും പഞ്ചാബ് കിങ്സ് 11 കളികളിൽ 15 പോയിന്റുമായി മൂന്നാം സ്ഥാനത്തുമുണ്ട്. മുംബൈ ഇന്ത്യൻസാണ് നാലാം സ്ഥാനത്ത്. 12 കളികളിൽ 14 പോയിന്റാണ് ടീമിന്റെ സമ്പാദ്യം.

സഞ്ജു സാംസൺ അടക്കം പണി കിട്ടിയത് മൂന്ന് പേർക്ക്; രാജസ്ഥാൻ റോയൽസിന് ഇത് വമ്പൻ തിരിച്ചടി ലഭിച്ച സീസൺ
ഡെൽഹി 13 പോയിന്റുമായി അഞ്ചാമതും, കെകെആർ 11 പോയിന്റുമായി ആറാമതുമാണ്. ലക്നൗ സൂപ്പർ ജയന്റ്സ്, സൺ റൈസേഴ്സ് ഹൈദരാബാദ്, രാജസ്ഥാൻ റോയൽസ്, ചെന്നൈ സൂപ്പർ കിങ്സ് ടീമുകളാണ് യഥാക്രമം ഏഴ് മുതൽ 10 വരെ സ്ഥാനങ്ങളിൽ. ഇതിൽ ചെന്നൈ സൂപ്പർ കിങ്സ്, രാജസ്ഥാൻ റോയൽസ്, സൺ റൈസേഴ്സ് ഹൈദരാബാദ് ടീമുകൾ പ്ലേ ഓഫ് സാധ്യതകളിൽ നിന്ന് പുറത്തായിക്കഴിഞ്ഞതാണ്‌