30 വേണ്ടിടത്ത് 38 ആയി സ്പീഡ‍്, എമ്മയുടെ ലൈസൻസ് ബാൻ ചെയ്തു, ഒരുലക്ഷം രൂപയ്ക്ക് മുകളിൽ പിഴയും!

Authored by: അശ്വിനി പി|Samayam Malayalam•17 Jul 2025, 3:15 pm

ഹാരി പോട്ടർ പരമ്പരയിലെ മൂന്ന് കഥാപാത്രങ്ങളിലൊന്നായ ഹെർമോയിണി ഗ്രേഞ്ചറിന്റെ വേഷം ചെയ്തുകൊണ്ട് ലോക പ്രശസ്തി നേടിയ നടിയാണ് എമ്മ വാട്സൺ . നടിയുടെ ലൈസൻസ് ആറ് മാസത്തേക്ക് ബാൻ ചെയ്തു എന്ന വാർത്തകളാണ് ഇപ്പോൾ പുറത്തുവരുന്നത്.

ലണ്ടനിൽ അമിത വേഗത്തിൽ കാർ ഓടിച്ചതിനാണ് ലൈസൻസ് ബാൻ ചെയ്തത്. മണിക്കൂറിൽ 30 മൈൽ വേഗതയിൽ ഓടിക്കേണ്ടിടത്ത് 38 മൈൽ വേഗതയിൽ ഓടിച്ചു എന്ന കാരണത്തിനാണ് നടപടി. നേരത്തെ തന്നെ പല ട്രാഫിക് നിയമങ്ങൾ തെറ്റിച്ചതിന്റെ ഭാഗമായി എമ്മയുടെ ലൈസൻസിൽ ഒൻപത് പോയിന്റുകൾ വീണിരുന്നു. ഈ സാഹചര്യത്തിലാണ് അമിത വേഗതയുടെ പേരിൽ പുതിയ പോയിന്റ് കൂടെ വന്നത്.

Also Read: ഞാൻ എങ്ങനെയുള്ള ആൺകുട്ടികളുമായി ഡേറ്റിങ് ചെയ്യുന്നത് ഒഴിവാക്കണം എന്ന് പെൺകുട്ടി; ജെ ഹോപ്പ് നൽകിയ മറുപടി വൈറലാവുന്നു

ലൈസൻസ് ആറ് മാസത്തേകക് ബാൻ ചെയ്യുക മാത്രമല്ല, ഹൈ വൈകോംബ് മജിസ്‌ട്രേറ്റ് കോടതി നടിയ്ക്ക് 1386 (120017 രൂപ) യുഎസ് ഡോളർ പിഴയും വിധിച്ചിട്ടുണ്ട്. ബിബിസി റിപ്പോർട്ടുകൾ പ്രകാരം എമ്മ വാട്സൺ കോടതിയിൽ ഹാജരായിട്ടില്ല, അ‍ഞ്ച് മിനിട്ട് വാദം കേട്ടതിന് ശേഷമാണ് കോടതി ബാനും പിഴയും വിധിച്ചത്.

ഓക്‌സ്‌ഫോർഡ് യൂണിവേഴ്സിറ്റിയിൽ ക്രിയേറ്റീവ് റൈറ്റിംഗിൽ മാസ്റ്റേഴ്സ് പ്രോഗ്രാം ചെയ്യുന്നതിനായി അഭിനയത്തിൽ നിന്നും ബ്രേക്ക് എടുത്ത് മാറി നിൽക്കുകയാണ് നിലവിൽ എമ്മ വാട്സൺ. 2024 സെപ്റ്റംബറിൽ ആരംഭിച്ചതാണ് എമ്മയുടെ കോഴ്സ്. അഭിനയത്തിൽ നിന്ന് ഒരു ബ്രേക്ക് എടുക്കുന്നതിൽ സന്തോഷമേയുള്ളൂ എന്ന് അതിന് മുൻപ് നൽകിയ ഒരു അഭിമുഖത്തിൽ നടി പറഞ്ഞിരുന്നു. ഇപ്പോൾ എനിക്ക് എന്റേതായ ശബ്ദവും ക്രിയാത്മകമായ ഇടവും പരമാധികാരവും ഉണ്ടെന്ന് തോന്നുന്നു, അത് മുമ്പ് എനിക്ക് ഉണ്ടായിരുന്നില്ല- എന്നാണ് എമ്മ ഒരു അഭിമുഖത്തിൽ പറഞ്ഞിരുന്നത്.


എൻബിഎ ഗെയിമിലാണ് ഏറ്റവുമൊടുവിൽ എമ്മ എത്തിയിരുന്നത്. അത് ഫെബ്രുവരിയിലായിരുന്നു. അതിന് ശേഷം കാൻ ഫിലിം ഫെസ്റ്റിവലിലും നടി പങ്കെടുത്തു. 12 വർഷത്തെ ഇടവേളയ്ക്ക് ശേഷം കാൻ റെഡ് കാർപെറ്റിൽ എമ്മ വാട്സൺ എത്തുന്നു എന്നതുകൊണ്ട് തന്നെ അന്നത് വാർത്താ ശ്രദ്ധ നേടുകയും ചെയ്തിരുന്നു. നിലവിൽ നടി മറ്റ് പുതിയ സിനിമകൾ ഒന്നും തന്നെ ഏറ്റെടുത്തിട്ടില്ല.