40 കാരൻ രൺവീർ സിം​ഗിന്റെ നായികയായി സാറ അർജുൻ; കൊച്ചു കുഞ്ഞല്ലേ, വിമർശനങ്ങളുമായി സോഷ്യൽ മീഡിയ, എന്താണിതിൽ ഇത്ര തെറ്റ്?

Authored by: അശ്വിനി പി|Samayam Malayalam•7 Jul 2025, 2:52 pm

ഇന്നലെ, ജൂലൈ 6 ന് രൺവീർ സിംഗിന്റെ നാൽപതാം ജന്മദിനത്തോടനുബന്ധിച്ചാണ് നടന്റെ ഏറ്റവും പുതിയ സിനിമയായ ധുരന്ധറിന്റെ ഒരു ടീസർ പുറത്തുവന്നത്. ഇതുവരെ കാമാത്ത ലുക്കിലുള്ള രൺവീർ സിംഗിന്റെ കിടിലൻ ലുക്കും സൂപ്പർ ഫ്രെയിമും, ആക്ഷനും, എഡിറ്റിങും എല്ലാം കണ്ട് ആരാധകരും ആവേശത്തിലായിരുന്നു. എന്നാൽ ചിത്രത്തിലെ നായികയ്ക്കൊപ്പമുള്ള ചില രംഗങ്ങളൊക്കെ ശ്രദ്ധിച്ചതോടെ വ്യാപക വിമർശനങ്ങളാണ് ഉയരുന്നത്

ദൈവത്തിരുമകൾ എന്ന ചിത്രത്തിലൂടെ ശ്രദ്ധ നേടിയ, മലയാളത്തിൽ ആൻമരിയ കലിപ്പിലാണ് എന്ന ചിത്രത്തിലൂടെ പരിചിതയായ ബാലതാരം സാറ അർജുനാണ് രൺവീർ സിംഗിന്റെ നായികയായി എത്തുന്നത്. എന്നാൽ സാറ ഇപ്പോൾ ബാലതാരമല്ല, നായിക നടിയാണ്. എന്നിരുന്നാലും 40 കാരൻ രൺവീർ സിംഗിന്റെ നായികയാകുന്നതിനോളം വളർച്ചയും പക്വതയും ഉണ്ടോ എന്നാണ് ആരാധകരുടെ ചോദ്യം. രൺവീറിന്റെ പ്രായത്തിന്റെ പകുതിയേ ഉള്ളൂ സാറയ്ക്ക്, 20 കാരിയെ എങ്ങനെ 40 കാരന് നായികയാക്കും എന്നാണ് എല്ലാവരുടെയും ചോദ്യം.

Also Read: പെട്ടന്ന് കണ്ടപ്പോൾ സുധി തന്നെ, അതേ ചിരി; കുഞ്ഞനിയനെ തോളിലിരുത്തി കിച്ചു സുധി, അമ്മ മക്കളെ അകറ്റി എന്ന് പറഞ്ഞത് ഇതാണോ?

സാറ അർജുൻ ബാലതാരമായി എത്തിയപ്പോഴുള്ള സിനിമകലിലെ ഫോട്ടോകൾ സഹിതമാണ് സിനിമയ്ക്കും അണിയറ പ്രവർത്തകർക്കും രൺവീർ സിംഗിനും എതിരെയുള്ള വിമർശനങ്ങൾ ഉയരുന്നത്. ഇതെന്തൊരു വിചിത്രതയാണ്, ഇങ്ങനെയൊക്കെയുള്ള കാര്യങ്ങൾ ബോളിവുഡ് സിനിമയിൽ മാത്രമേ നടക്കൂ എന്നൊക്കെ പറഞ്ഞാണ് ഹിന്ദി സിനിമ പ്രേമികൾ ട്വിറ്ററിൽ പോസ്റ്റിടുന്നത്.

എന്നാൽ ഇതിലെന്താണ് ഇത്ര വലിയ തെറ്റ് എന്നാണ് സൗത്ത് ഇന്ത്യൻ സിനിമ പ്രേമികളുടെ ചോദ്യം. വൈറ്റ് എന്ന മലയാള സിനിമയിൽ മമ്മൂട്ടിയുടെ നായികയായി എത്തിയത് ബോളിവുഡ് നടി ഹുമ ഖുറേഷിയാണ്, ഇരുവർക്കും തമ്മിൽ 35 വയസ്സിന്റെ പ്രായ വ്യത്യാസമുണ്ട്. റൺ ബേബി റൺ എന്ന ചിത്രത്തിൽ ജോഡിചേർന്ന് അഭിനയിച്ച മോഹൻലാലിന്റെയും അമല പോളിന്റെയും പ്രായ വ്യത്യാസം 33 വയസ്സാണ്. അങ്ങനെ ഒരുപാട് സിനിമകൾ മലയാളത്തിൽ സംഭവിച്ചിട്ടുണ്ട്. അച്ഛന്റെ നായികയാണ് മീനാക്ഷി ദിലീപിന്റെ അടുത്ത സുഹൃത്തായ നമിത പ്രമോദ്, ഇരുവരും തമ്മിലുള്ള പ്രായ വ്യത്യാസം 29 ആണ്.

ഇനി തമിഴ് സിനിമയിലേക്ക് എത്തിയാൽ അവിടെയും ഇത് സർവ്വ സാധാരണമാണ്. 74 കാരൻ രജിനികാന്തിന്റെ നായികയായ എത്തിയത് 35 വയസ്സും, 38 വയസ്സുമൊക്കെ പ്രായമുള്ള നായികമാരാണ്. ഏറ്റവുമൊടുവിൽ തഗ്ഗ് ലൈഫ് എന്ന ചിത്രത്തിൽ കമൽ ഹാസനൊപ്പം ജോഡിചേർന്നഭിനയിച്ചത് 40 കാരികളായ തൃഷയും അഭിരാമിയുമൊക്കെയാണ്. 30 വയസ്സിന്റെ പ്രായ വ്യത്യാസമുള്ളവർ ഇവിടെ നായികാ നായകന്മാരായി അഭിനയിക്കുമ്പോൾ 20 വയസ്സൊക്കെ എന്ത് എന്നാണ് സൗത്ത് ഇന്ത്യൻ സിനിമ നിരീക്ഷകരുടെ ചോദ്യം.


സാറ അർജുനെ രൺവീർ സിംഗിന്റെ നായികയായി കാണാൻ കഴിയാത്തതിന്റെ ഒരേ ഒരു കാരണം, സാറ അർജുൻ ബാലതാരമായി വന്ന നായികയായതുകൊണ്ടാണ്. എത്രയൊക്കെ വളർന്നു, പ്രായമായി എന്ന് പറഞ്ഞാലും ബാലതാരമായി അഭിനയിച്ച സിനിമകളുടെ വിജയത്തിന്റെ സ്വാധീനം കാരണം ഇന്നും ജനങ്ങൾക്ക് സാറയെ വലിയ കുട്ടിയായി കാണാൻ സാധിക്കുന്നില്ല. അല്ലാതെ സാറ അർജുന് നായികയായി അഭിനയിക്കാനുള്ള പ്രായവും, രൺവീർ സിംഗിന്റെ നായികകയായി അഭിനയിക്കാനുള്ള പക്വതയും ഉണ്ട് എന്ന് ആരാധകർ വിലയിരുത്തുന്നു.