അച്ഛൻ ഉണ്ടടാ കൂടെ ധൈര്യമായി ഇരിക്ക്! അച്ഛനുവേണ്ടി സ്‌പെഷ്യൽ സ്ക്രീനിങ്! സുമതിവളവ് എത്താൻ ദിവസങ്ങൾ

Authored by: ഋതു നായർ|Samayam Malayalam•18 Jul 2025, 8:09 am

ശ്രീ ഗോകുലം മൂവീസിന്റെ ബാനറിൽ ശ്രീ ഗോകുലം ഗോപാലൻ നിർമ്മിക്കുന്ന ചിത്രമാണ് സുമതി വളവ് . ആഗസ്റ്റ് ഒന്നിന് പ്രേക്ഷകരിലേക്കെത്താൻ പോകുന്ന ചിത്രത്തിന്റെ സ്‌പെഷ്യൽ സ്ക്രീനിങ് ഇക്കഴിഞ്ഞ ദിവസമായിരുന്നു നടന്നത്. ശ്രീ ഗോകുലം മൂവീസിന്റെ വിതരണ പങ്കാളിയായ ഡ്രീം ബിഗ് ഫിലിംസാണ് സുമതിവളവിന്റെ കേരളത്തിലെ വിതരണം നിർവഹിക്കുന്നത്. ചിത്രത്തിന്റെ തിരക്കഥാകൃത്ത് അഭിലാഷ് പിള്ള പങ്കുവച്ച ഒരു കുറിപ്പാണ് ശ്രദ്ധേയം ആകുന്നത്.

ചിത്രത്തിന്റെ സ്‌പെഷ്യൽ സ്ക്രീനിങ് അച്ഛനുവേണ്ടി നടത്തികൊടുത്തതിന്റെ സന്തോഷമാണ് അഭിലാഷ് പറയുന്നത്. തന്റെ എല്ലാ ചിത്രങ്ങളും ആദ്യ ദിവസം തന്നെ കാണുന്ന അച്ഛന് എന്നാൽ ചിത്രത്തിന്റെ റിലീസ് ടൈം ഒരു സർജറി ഉള്ളതുകൊണ്ടുതന്നെ കാണാൻ സാധിക്കില്ല. അതിനാലാണ് സ്‌പെഷ്യൽ സ്ക്രീനിങ് നടത്തിയതെന്നും അഭിലാഷ് പറയുന്നു

അഭിലാഷിന്റെ വാക്കുകൾ

ഇന്ന് വൈകുന്നേരം അമ്മയും അച്ഛനും സുമതി വളവ് കണ്ടു, അച്ഛന് വേണ്ടി മിക്സിങ്ങ് സ്റ്റുഡിയോയിൽ ഒരു സ്പെഷ്യൽ സ്‌ക്രീനിംഗ്, കാരണം എന്റെ എല്ലാ സിനിമയും ആദ്യ ദിവസം എനിക്കൊപ്പം കാണുന്നതാ രണ്ട് പേരും പക്ഷെ ഇത്തവണ എനിക്ക് ആ ഭാഗ്യമില്ല വരും ദിവസം അച്ഛന് ഒരു സർജറി ചെയ്യേണ്ട അത്യാവശ്യ സാഹചര്യമാണ് അത് ചെയ്തു കഴിഞ്ഞാൽ മൂന്ന് മാസത്തോളം അച്ഛന് വിശ്രമം ആവശ്യമുണ്ട് നിന്റെ പുതിയ സിനിമ കാണണമെടാ എന്ന് രണ്ട് ദിവസമായി എന്നോട് പറയുന്നു, ഇന്ന് ആ ആഗ്രഹം സാധിച്ചു കൊടുത്തു,

സിനിമ കഴിഞ്ഞു ഒന്ന് തോളിൽ തട്ടി കൊള്ളാമെടാ മോനെ എന്ന സ്‌ഥിരം ഡയലോഗ് പറഞ്ഞപ്പോൾ പതിവിലും കൂടുതൽ സന്തോഷം അച്ഛന്റെ മുഖത്തു ഞാൻ കണ്ടു, അമ്മയും ഹാപ്പി. പോകാൻ നേരം എന്നോട് ഒരു ഡയലോഗ് കൂടി അച്ഛൻ പറഞ്ഞു, ഒരു പക്ഷെ പ്രൊമോഷൻ സമയവും സർജറിയും എല്ലാം ഒന്നിച്ചു വരുന്നത് കൊണ്ട് എന്നെ സന്തോഷിപ്പിക്കാൻ പറഞ്ഞതാവാം, പക്ഷെ അച്ഛന്റെ ആ വാക്കുകൾ മതി എനിക്ക് ധൈര്യം കിട്ടാൻ, അച്ഛൻ ഉണ്ടടാ കൂടെ ധൈര്യമായി ഇരിക്കാൻ. പണ്ട് ജോലി രാജി വെക്കട്ടെ എനിക്ക് സിനിമ ചെയ്യണം എന്ന് ചോദിച്ചപ്പോൾ രണ്ടാമത് ഒന്നാലോചിക്കാതെ അച്ഛൻ അന്ന് പറഞ്ഞതും ഇതേ വാചകം തന്നെ.