അനുപമയെ നോക്കാൻ വേണ്ടി മാത്രം സെറ്റിൽ രണ്ടു പേരെ വച്ചു, മൂഡ് ഔട്ടാക്കാതെ നോക്കുക എന്നത് പ്രധാനമായിരുന്നു; ഷറഫുദ്ദീൻ

Authored by: അശ്വിനി പി|Samayam Malayalam•27 Oct 2025, 4:55 pm

രണ്ട് ഭാഷകളിലായി ഒരേ സമയം റിലീസ് ചെയ്ത രണ്ട് വ്യത്യസ്ത ജോണറിലുള്ള സിനിമകളുടെ പ്രമോഷൻ തിരക്കുകളിലാണ് ഇപ്പോൾ അനുപമ പരമേശ്വരൻ . തമിഴിൽ ധ്രുവ് വിക്രമിനൊപ്പം അഭിനയിച്ച ബൈസൺ എന്ന ചിത്രവും, മലയാളത്തിൽ ഷറഫുദ്ദീനൊപ്പം ചെയ്ത ദ പെറ്റ് ഡിക്ടറ്റീവ് എന്ന ചിത്രവും ഒരേ സമയത്താണ് തിയേറ്ററുകളിലെത്തിയത്. രണ്ടും മികച്ച പ്രതികരണങ്ങൾ നേടി മുന്നേറുന്നു. വ്യത്യസ്ത സ്ഥലങ്ങളിലും സംസ്ഥാനങ്ങളിലും രാജ്യങ്ങളിലുമൊക്കെയായി തിരക്കിട്ട പ്രമോഷനിലാണ് ഇപ്പോഴും അനുപമ.

ഇപ്പോൾ പ്രമോഷൻ നടക്കുന്നത് പോലെ തന്നെയായിരുന്നു ഇരു സിനിമകളുടെയും ഷൂട്ടിങും. ബൈസൺ ഷൂട്ട് ചെയ്തുകൊണ്ടിരിക്കുമ്പോഴാണ്, പെറ്റ് ഡിക്ടറ്റീവിന് വേണ്ടി കേരളത്തിലേക്ക് എത്തുന്നത്. ഇത് രണ്ടും എത്രത്തോളം ശ്രമകരമായിരുന്നു എന്ന് അടുത്തിടെ നൽകിയ അഭിമുഖത്തിൽ അനുപമ പരമേശ്വരൻ പറഞ്ഞു. അനുപമയുടെ ആ അവസ്ഥ തങ്ങൾ വളരെ അധികം മനസ്സിലാക്കി എന്ന് പിന്തുണച്ചുകൊണ്ട് ദ പെറ്റ് ഡിക്ടറ്റീവിന്റെ നിർമാതാവ് കൂടെയായ ഷറഫുദ്ദീൻ പറയുന്നു.

Also Read: ഇന്ത്യയിൽ അങ്ങനെ ചെയ്യുന്ന ഒരേ ഒരു നടി രശ്മിക മന്ദാന മാത്രമാണ്; ഒരു നിയന്ത്രണങ്ങളും അവർക്കില്ല എന്ന് നിർമാതാവ്

ബൈസൺ മാരി സെൽവരാജിന്റെ സിനിമയാണ്, വളരെ അധികം സീരിയസ് ആയ വേഷം, ഒരു റോ കഥാപാത്രമാണ് ആ സിനിമയിൽ അനുപമ ചെയ്തിരിയ്ക്കുന്നത്. അതേ സമയം ഇവിടെ പ്രണീഷ് വിജയൻ സംവിധാനം ചെയ്ത ദ പെറ്റ് ഡിക്ടറ്റീവ് അതിന് നേരെ വിപരീതമാണ്. കോമഡിയും ചിരിയും കളിയുമെല്ലാം. രണ്ടിലും മൃഗങ്ങൾ ഉണ്ട് എന്നത് മാത്രമാണ് ഒരു സാമ്യം, അല്ലാതെ തീർത്തും വ്യത്യസ്തമാണ്.

പെറ്റ് ഡിക്ടറ്റീവിന്റെ ഷൂട്ടിങിന് ശേഷം ബൈസൺ ഷൂട്ട് കഴിഞ്ഞ് വരുമ്പോഴേക്കും, ഇവിടെ നിന്ന് വിട്ട അനുപമയേ ആയിരിക്കില്ല. കറുത്ത് ടാൻ അടിച്ച് ഒരുമാതിരി കോലത്തിലാണ് തിരിച്ചെത്തുന്നത്. അവിടെ ആ കഥാപാത്രത്തിന് അത് അത്യാവശ്യമാണ്. ഇവിടെ മേക്കപ്പിടുന്നത് വളരെ ശ്രമകരമായിട്ടുള്ള പണിയായിരുന്നു. രണ്ട് കഥാപാത്രങ്ങളുടെയും ഇമോഷനും വ്യത്യസ്തമാണ്. അത് ബാലൻസ് ചെയ്യാൻ ഞാൻ പാടുപെട്ടു. ഒരുപാട് മൂഡ് സ്വിങ്സ് ഉണ്ടായി എന്നാണ് അനുപമ പറഞ്ഞത്.


ആ ഒരു അവസ്ഥ നടൻ എന്ന നിലയിൽ എനിക്ക് മനസ്സിലാക്കാൻ സാധിക്കുമായിരുന്നു. അതുകൊണ്ട് അനുപമയെ നോക്കാൻ വേണ്ടി മാത്രം സെറ്റിൽ രണ്ടുപേരെ നിർത്തി, അനുവിന് മൂഡ് സ്വിങ്സ് വരാതെ, മൂഡ് ഔട്ടാക്കാടെ നോക്കുക എന്നതായിരുന്നു പ്രധാനം. അത് മനസ്സിലാക്കിയാണ് ഞങ്ങൾ ഷൂട്ടിങ് മുന്നോട്ടു കൊണ്ടുപോയത്. എന്നിരുന്നാലും ഷൂട്ടിങിൽ യാതൊരു തര തടസ്സങ്ങളും നേരിട്ടിട്ടില്ല എന്ന് ഷറഫുദ്ദീൻ പറഞ്ഞു