അന്ന് ആ അവസരം നഷ്ടപ്പെട്ടപ്പോൾ ഞാനൊരുപാട് കരഞ്ഞു; മനസ്സ് തുറന്ന് മമിത ബൈജു, ഇന്ന് മമ്മിത എന്ന താരത്തിന്റെ നേട്ടം?

Authored by: അശ്വിനി പി|Samayam Malayalam•29 Aug 2025, 6:43 pm

ഒരു കളർ പടം എന്ന ഹ്രസ്വ ചിത്രത്തിൽ തുടങ്ങി, ഓപ്പറേഷൻ ജാവ എന്ന തരുൺ മൂർത്തി ചിത്രത്തിലൂടെ ബിഗ് സ്ക്രീനിലേക്ക് എത്തി. അവിടെ നിന്ന് ഖൊഖൊ, സൂപ്പർ ശരണ്യ പോലുള്ള സിനിമകളിലൂടെ കാലുറപ്പിച്ച്, പ്രേമലു പോലൊരു സിനിമയിലൂടെ പാൻ ഇന്ത്യൻ തലത്തിലേക്ക് വളർന്ന നടിയാണ് മമിത ബൈജു .

ഇന്ന് മലയാളത്തിന് പുറമെ തമിഴകത്തും മമിതയ്ക്ക് വലിയ രീതിയിലുള്ള സ്വീകരണവും അംഗീകാരവും ലഭിയ്ക്കുന്നു. ഒന്നിനു പിറകെ ഒന്നായി സൂപ്പർ താര ചിത്രങ്ങളാണ് മമിത തമിഴിൽ ചെയ്തുകൊണ്ടിരിയ്ക്കുന്നത്. വിജയ് യുടെ ജനനായകൻ എന്ന ചിത്രമാണ് അതിലേറ്റവും പ്രധാനം. രാഷ്ട്രീയത്തിലേക്ക് ഇറങ്ങുന്നതിന് മുൻപ് അവസാനമായി ചെയ്യുന്ന ചിത്രമെന്ന പ്രത്യേകത ജനനായകനുണ്ട്.

Also Read: കുഞ്ഞിന് 2 മാസം പ്രായമുള്ളപ്പോൾ, ഡിവോഴ്സ് പ്രഖ്യാപിച്ച യുഎഇ രാജകുമാരി; ഫ്രഞ്ച് മൊണ്ടാനയുടെ പ്രതിശ്രുത വധുവിന്റെ കഴിഞ്ഞ ജീവിതം?

വിജയ് ചിത്രത്തിന് പിന്നാലെ മമിത കരാറ് ചെയ്തത് സൂര്യ നായകനാകുന്ന ചിത്രമാണ്. വെങ്കി അട്ലൂരി സംവിധാനം ചെയ്യുന്ന സൂര്യയുടെ 46 ആമത്തെ ചിത്രത്തിൽ മമിതയാണ് നായിക. ആ ചിത്രത്തിൽ അവസരം ലഭിച്ചതിനെ കുറിച്ച് അടുത്തിടെ ഒരു അവാർഡ് ഷോയിൽ മമിത ബൈജു സംസാരിക്കുകയുണ്ടായി.

Also Read: മകൾക്ക് മുൻപേ ബിസിനസിൽ തിളങ്ങിയത് സിന്ധു! ഗൾഫിൽനിന്നുള്ള ജോലി ഓഫറുകൾ നിരസിച്ചത് മക്കൾക്ക് വേണ്ടി

ഇത്രത്തോളം പോലും റെക്കഗനേഷൻ എനിക്ക് കിട്ടാതിരുന്ന ഒരു സമയത്ത് സൂര്യ സാറിനൊപ്പം ഒരു സിനിമയിൽ അഭിനയിക്കാനുള്ള അവസരം എനിക്ക് ലഭിച്ചിരുന്നു. പക്ഷേ നിർഭാഗ്യവശാൽ എനിക്കത് നഷ്ടപ്പെട്ടു. അന്നത് വലിയ വിഷമമായിരുന്നു എന്ന്. ഒരുപാട് കരഞ്ഞു. പക്ഷേ ഇപ്പോൾ ഇങ്ങനെ ഒരു സിനിമ വന്നപ്പോൾ, ഞാൻ വളരെ അധികം ത്രില്ലിലാണ്- എന്നാണ് മമിത ബൈജു പറഞ്ഞത്. വിജയ് യെ പോലൊരു ലെജന്റിനൊപ്പം ജനനായകനിൽ അഭിനയിക്കുന്ന സന്തോഷവും മമിത പങ്കുവച്ചിരുന്നു.


നേരത്തെ ബാല സംവിധാനം ചെയ്ത വനങ്കാൻ എന്ന ചിത്രത്തിലാണ് സൂര്യയ്ക്കൊപ്പം മമിതയെയും പരിഗണിച്ചിരുന്നത്. എന്നാൽ പിന്നീട് സൂര്യ ചിത്രത്തിൽ നിന്നും പിന്മാറി. അപ്പോഴും മമിത സിനിമയുടെ ഭാഗമായിരുന്നു. ചിത്രീകരണവും ആരംഭിച്ചതാണ്. പിന്നീട് ചില കാരണങ്ങളാൽ തനിക്കും പിന്മാറേണ്ടി വന്നതായി നേരത്തെ മമിത പറഞ്ഞിട്ടുണ്ട്. അരുൺ വിജയ് യെ നായകനാക്കിയാണ് പിന്നീട് ബാല ആ ചിത്രം പൂർത്തിയാക്കിയത്.