അമ്മ മലയാളിയാണ്: അദ്ദേഹത്തിന്റെ നായികയായി, പിന്നെ പ്രണയം, വിവാഹം; വിശേഷങ്ങൾ പങ്കുവച്ച് പ്രിയനായിക ദേവയാനി

അതുവരെ ഞാൻ സാരിയും, ദാവണിയും എല്ലാം ധരിച്ചാണ് അഭിനയിച്ചിരുന്നത്. ദേവയാനി എന്നാൽ ഇത്തരം വസ്ത്രങ്ങളാണ് എന്നൊരു ധാരണ തന്നെ ഉണ്ടായിരുന്നു. വിണ്ണുക്കും മണ്ണുക്കും പോലെ വളരെ ചുരുക്കം സിനിമകളിൽ മാത്രമാണ് ഞാൻ മോഡേൺ വസ്ത്രങ്ങൾ ധരിച്ച് അഭിനയിച്ചിരുന്നത്. ഫ്രണ്ട്സിൽ ക്യൂട്ട് ആൻഡ് ബബ്ലി ആയൊരു മോഡേൺ കഥാപാത്രം ആയിരുന്നു. അതുകൊണ്ടാണ് ഞാൻ ഇങ്ങനെയൊരു കോസ്റ്റ്യൂം തെരഞ്ഞെടുത്തത്. പക്ഷേ അതെല്ലാവർക്കും ഇഷ്ടമായി. മലയാളത്തിലെ സംവിധായകൻ സിദ്ദിഖ്, തമിഴ് നായകൻ വിജയ് എന്നിങ്ങനെ വളരെ നല്ലൊരു ടീം കൂടിയായിരുന്നു ആ സിനിമയിൽ.

കിന്നരി പുഴയോരം ഷൊർണ്ണൂർ, ഒറ്റപ്പാലം ലൊക്കേഷനുകളിൽ വെച്ച് ഷൂട്ട് ചെയ്ത സിനിമയാണ്. വളരെ ഭയത്തോടെ, കഷ്ടപ്പെട്ടെല്ലാം ചെയ്തു സിനിമയാണ്. ഡയലോഗുകൾ എല്ലാം ഒരുപാട് നേരമെടുത്ത് മനഃപാഠം ആക്കി. ത്രീ മെൻ ആർമി വളരെ തമാശയായി ചെയ്തൊരു സിനിമയാണ്. ദിലീപ്, ഇന്ദ്രൻസ് എല്ലാം ചേർന്ന് നല്ലൊരു സിനിമ ആയിരുന്നു. ദിലീപ് സാറെല്ലാം ഷൂട്ടിങ് സൈറ്റിൽ ഒരുപാട് തമാശകൾ പറയുമായിരുന്നു. ലാൽ സാറിന്റെ കൂടെ ആദ്യമായി ചെയ്ത സിനിമയായിരുന്നു ബാലേട്ടൻ. ആ സിനിമ വലിയൊരു ഹിറ്റുമായി.

തെനാലി ഒരു പിക്നിക് മൂഡിൽ ചെയ്തൊരു സിനിമയായിരുന്നു. രവി കുമാർ സാറിന്റെ സംവിധാനത്തിൽ ജോലി ചെയ്യുക എന്നത് തന്നെ സന്തോഷം നൽകുന്നൊരു കാര്യമാണ്. യാതൊരു ടെൻഷനും ഇല്ലാതെ ചെയ്യാൻ പറ്റും. കമൽ സാറിന്റെ വലിയൊരു ആരാധികയായ എന്നോട് സംവിധായകൻ പറഞ്ഞു, എന്റെ ഭർത്താവ് ആയി അഭിനയിക്കുന്നത് ജയറാം ആണെന്ന്. കുഴപ്പമില്ല കമൽ സാറിന്റെ കൂടെ വർക്ക് ചെയ്യാമല്ലോ, അദ്ദേഹത്തിന്റെ അടുത്ത് നിന്ന് അഭിനയിക്കുന്നത് കാണാമല്ലോ എന്ന് ഞാൻ മറുപടി നൽകി.