അവനെ ഞങ്ങള്‍ ഇപ്പോള്‍ ഓര്‍ക്കാറേയില്ല, ഫോട്ടോ പോലും മറച്ചുവച്ചിരിക്കുകയാണ്; ജിഷ്ണുവിനെ കുറിച്ച് അച്ഛന്‍

Authored by: അശ്വിനി പി|Samayam Malayalam•25 Nov 2025, 11:08 am

മലയാളികള്‍ക്ക് ഇന്നും അത്ര പെട്ടന്ന് മറക്കാന്‍ കഴിയാത്ത മുഖമാണ് ജിഷ്ണു രാഘവന്റേത്. കമലിന്റെ നമ്മള്‍ എന്ന ആദ്യ ചിത്രത്തില്‍ തന്നെ ജിഷ്ണു ഇഷ്ടം പിടിച്ചു പറ്റിയിരുന്നു. രാഘവന്റെയും ഭരതന്റെയും മക്കള്‍ സിനിമയിലേക്ക് വരുന്നു എന്ന പ്രമോഷനോടെ ആരംഭിച്ച സിനിമയാണ് നമ്മള്‍. പിന്നീട് ജിഷ്ണുവും സിദ്ധാര്‍ത്ഥ് ഭരതനും ഭാവനയുമൊക്കെ അരങ്ങേറിയ സിനിമ എന്ന നിലയിലേക്ക് അത് മാറി. അച്ഛന്‍മാരുടെ പേരിന്റെ പിന്‍ബലം ഇല്ലാതെ തന്നെ വിജയം നേടാന്‍ ജിഷ്ണുവിനും കൂട്ടര്‍ക്കും സാധിച്ചു.

പിന്നീട് ചൂണ്ട, നേരറിയാന്‍ സിബിഐ, ചക്കരമുത്ത്, യുഗപുരുഷന്‍, ഓര്‍ഡിനറി, ഉസ്താദ് ഹോട്ടല്‍ പോലുള്ള സിനിമകളില്‍ ചെറുതും വലുതുമായ നല്ല വേഷങ്ങള്‍ ചെയ്യുന്നതിനിടയില്‍ ആണ് ജിഷ്ണുവിന് കാന്‍സര്‍ രോഗം പിടിപെട്ടത്. കാന്‍സര്‍ അസുഖ ബാധിതനായി കിടക്കുമ്പോഴും വളരെ പോസിറ്റീവായിരുന്നു ജിഷ്ണു. ശാരീരികമായി അവശനായിരുന്നുവെങ്കിലും, തിരിച്ചുവരും എന്ന പ്രതീക്ഷ ജിഷ്ണുവിനും അച്ഛന്‍ രാഘവനും ഉണ്ടായിരുന്നു. എന്നാല്‍ എല്ലാ പ്രതീക്ഷകളും അവസാനിപ്പിച്ച് 2016 മാര്‍ച്ച് മാസത്തില്‍ മരണപ്പെട്ടു.

Also Read: അസാധാരണ അഭിനയ മുഹൂര്‍ത്തങ്ങള്‍, സമാനതകളില്ലാത്ത പകര്‍ന്നാട്ടം! ഭാസ്‌കരന്‍ മാഷായി ഞെട്ടിച്ച് ഷമ്മി തിലകന്‍

എനിക്ക് ആയുസ് തന്നിട്ട് പോയതാണ് ജിഷ്ണു എന്നാണ് ഇന്ന് അച്ഛന്‍ രാഘവന്‍ പറയുന്നത്. അതെ, അതില്‍ ഞാന്‍ വിശ്വസിക്കുന്നു. അവന്റെ ആയുസിലാണ് ഞാന്‍ ഇന്ന് ജീവിക്കുന്നത്. നല്ല കഥാപാത്രങ്ങളായി മികച്ച നടനായി വളരാമായിരുന്ന നടനായിരുന്നു എന്ന് നമുക്ക് ഇപ്പോള്‍ തോന്നും, പക്ഷേ അതിനവന്‍ നിന്നില്ല- കരച്ചില്‍ ഒരു ചിരിയില്‍ ഒതുക്കിക്കൊണ്ട് രാഘവന്‍ പറഞ്ഞു

ജിഷ്ണുവിനെ ഇപ്പോള്‍ ഞങ്ങള്‍ ഓര്‍ക്കാറില്ല, അവനെ ഓര്‍ക്കത്തക്ക രീതിയില്‍ വീട്ടില്‍ ഒന്നും വച്ചിട്ടില്ല. ഞാനും അവന്റെ അമ്മയും അവനെ ഓര്‍ക്കാറേയില്ല. ഓര്‍ക്കേണ്ട എന്ന് ഞങ്ങളങ്ങ് തീരുമാനിച്ചു. മറ്റുള്ളവര്‍ അവനെ കുറിച്ച് ഓര്‍മപ്പെടുത്തുമ്പോള്‍ എനിക്ക് ദുഃഖമൊന്നും ഇല്ല. അതൊക്കെ കഴിഞ്ഞുപോയി. ഓര്‍ക്കാതിരിക്കാന്‍, അവനെ കുറിച്ച് ഓര്‍മിക്കാതിരിക്കാന്‍ ഒരു ഫോട്ടോ പോലും വീട്ടില്‍ കാണുന്ന ഇടത്തില്‍ വച്ചിട്ടില്ല. അവനുപയോഗിച്ചിരുന്ന സാധനങ്ങളെല്ലാം ഞങ്ങള്‍ മറച്ചുവച്ചു- രാഘവന്‍ പറഞ്ഞു


നടന്‍ എന്നതിനപ്പുറം മെക്കാനിക്കല്‍ എനിജിനിയറും സാമൂഹിക പ്രവര്‍ത്തകനുമൊക്കെയായിരുന്നു ജിഷ്ണു. സിനിമയ്ക്കപ്പുറം സ്വന്തമായി ഒരു ബിസിനസ് തുടങ്ങാനുള്ള ഓട്ടത്തിലായിരുന്നു. അതിനിടയില്‍ അണപ്പല്ല് തട്ടിയുണ്ടായ മുറിവ് ജിഷ്ണു ശ്രദ്ധിച്ചില്ല. അത് ഇന്‍ഫക്ഷനായി, പിന്നീട് കാന്‍സറിലേക്ക് അത് മാറിപ്പോവുകയായിരുന്നു. 2014 ല്‍ ആണ് ആദ്യം കാന്‍സര്‍ സ്ഥിരീകരിച്ചത്. അതില്‍ നിന്ന് ഭേദമായി തിരിച്ചുവന്നാണ് ഓര്‍ഡിനറി പോലുള്ള സിനിമകള്‍ ചെയ്തത്. 2015 ല്‍ വീണ്ടും കാന്‍സര്‍ രോഗം പിടിപെട്ടു. 2016 ല്‍ തന്റെ 36 ആം വയസ്സില്‍ കാന്‍സറിനോട് പൊരുതി ജിഷ്ണു പരാജയം സമ്മതിച്ചു പോകുകയായിരുന്നു.