അവള്‍ വന്നതിന് ശേഷമാണ് എനിക്ക് എല്ലാ നേട്ടവുമുണ്ടായത്; എന്റെ ദേവി, വിവാഹ ജീവിതത്തെ കുറിച്ച് കൈതപ്രം

കൈതപ്രം ദാമോദരന്‍ നമ്പൂതിരി , ഇന്നും ജീവിക്കുന്ന ലെജന്റ്! കാലത്തിന്റെ മാറ്റത്തിനൊപ്പം സഞ്ചരിച്ച പാട്ടുകളിലൂടെ, പുതിയ തലമുറയ്ക്കും അത്ഭുതമാവുന്ന എഴുത്തുകാരന്‍. മിന്നല്‍വള കൈയ്യിലിട്ട പെണ്ണിനെ കണ്ടപ്പോള്‍ മലയാളികള്‍ വീണ്ടും അദ്ദേഹത്തിന്റ വരികളില്‍ അതിശയിച്ചു. മലയാളികള്‍ എക്കാലവും നെഞ്ചിലേറ്റുന്ന ചില ക്ലാസിക് ഹിറ്റുകളുടെ രചയിതാവാണ് കൈതപ്രം എന്ന ചുരുക്കപ്പേരില്‍ മലയാളികള്‍ വിളിക്കുന്ന കൈതപ്രം നമ്പൂതിരി.

കൈതപ്രത്തിന്റെ വരികളില്‍ എല്ലാം ദേവി എന്ന വാക്ക് ഉണ്ടാവാറുണ്ട്. അത് യാദൃശ്ചികമാണെന്ന് കരുതിയവര്‍ക്ക് തെറ്റി, അത് മനപൂര്‍വ്വം തന്നെ സംഭവിക്കുന്നതാണ്. തന്റെ പ്രിയപത്‌നിയുടെ പേരില്‍ തുടങ്ങുന്നതാണ് കൈതപ്രത്തിന്റെ മിക്ക പാട്ടുകളും. വിവാഹ വാര്‍ഷികത്തില്‍ അക്കാര്യം അദ്ദേഹം ഇന്‍സ്റ്റഗ്രാമില്‍ കുറിക്കുന്നു. തന്റെ വിജയങ്ങള്‍ക്കെല്ലാം കാരണമായ ദേവിയെ കുറിച്ചുള്ള പോസ്റ്റിന് ബാക്ക് ഗ്രൗണ്ട് മ്യൂസിക് ആയി നല്‍കിയിരിക്കുന്നത് ഗന്ധര്‍വ്വം എന്ന സിനിമയിലേ ദേവീ... എന്ന് തുടങ്ങുന്ന പാട്ടാണ്. വിവാഹ ഫോട്ടോയും, വിവാഹ ക്ഷണപ്പത്രവും, ഇപ്പോഴുള്ള ഒരു ഫോട്ടോയുമാണ് പോസ്റ്റിനൊപ്പം വച്ചിരിക്കുന്നത്.

Also Read: പ്രണയം അഭ്യര്‍ത്ഥിച്ച ബെസ്റ്റ് ഫ്രണ്ടിന്റെ കരണത്തടിച്ച ശ്രുതി ഹാസന്‍; സിംപതി പ്രണയം എനിക്ക് വേണ്ട എന്ന്

കൈതപ്രത്തിന്റെ വാക്കുകള്‍;

വിജയകരമായ വിവാഹ ജീവിതം എന്നു ഞാന്‍ നിസ്സംശയം പറയും, ഞാനും എന്റെ പ്രിയതമ ദേവിയും തമ്മില്‍. എന്റെ ജീവിത വിജയം അന്നുമുതല്‍ ആരംഭിച്ചു. തൊഴില്‍, കല, സംഗീതം, സിനിമ, അവാര്‍ഡുകള്‍, പത്മശ്രീ വരെയുള്ള വളര്‍ച്ച ദേവിക്കു കൂടി അവകാശപ്പെട്ടതാണ്. 15-ഓളം വര്‍ഷമായി തുടരുന്ന എന്റെ രോഗാവസ്ഥയെ നിയന്ത്രിച്ചു കൊണ്ടുപോകുന്നതും ഊര്‍ജം പകരുന്നതും അവളുടെ കൂടെ ശ്രമത്തില്‍ തന്നെ.

എന്റെ മക്കള്‍, അവരുടെ വിദ്യാഭ്യാസം, ജോലി, തുടങ്ങി ഗൃഹത്തിലെ മൂകാംബികാ ദേവിയുടെ കെടാവിളക്കു വരെ എല്ലാം തെളിച്ചു സൂക്ഷിക്കുന്നത് എന്റെ ദേവിയുടെ കയ്യൊതുക്കം തന്നെ.

എന്റെ ഗാനങ്ങളില്‍ പലതും അവളുടെ പേരിലൂടെ പ്രശസ്തമാണ്. എന്റെ സുഹൃത്തുക്കള്‍ ശ്രീനി, സത്യന്‍ അന്തിക്കാട്, മുരളി, ലോഹി, സിബി മലയില്‍, ജയരാജ്, കമല്‍ തുടങ്ങിയവരെല്ലാം കുടുംബസുഹൃത്തുക്കളാണ്. ദേവി അവരുടെയൊക്കെ സഹോദരിയാണ്. ദാസേട്ടനും ഞങ്ങളുടെ വീട്ടില്‍ പലപ്രാവശ്യം വന്ന് ഈ വീടിന്റെ ദേവിയുടെ ആതിഥ്യം സ്വീകരിച്ച് സന്തോഷിച്ചിട്ടുണ്ട്. ഈ വാര്‍ഷികത്തിന്റെ നേട്ടം പ്രിയതമയ്ക്ക് തന്നെ സമര്‍പ്പിക്കുന്നു.സ്‌നേഹപൂര്‍വ്വം.