അസാധാരണ അഭിനയ മുഹൂര്‍ത്തങ്ങള്‍, സമാനതകളില്ലാത്ത പകര്‍ന്നാട്ടം! ഭാസ്‌കരന്‍ മാഷായി ഞെട്ടിച്ച് ഷമ്മി തിലകന്‍

Authored by: അശ്വിനി പി|Samayam Malayalam•22 Nov 2025, 11:47 am

നാട്ടുകാര്‍ക്ക് നാലക്ഷരം പറഞ്ഞുകൊടുത്ത അധ്യാപകന്‍, തന്റേടമുള്ള പഞ്ചായത്ത് പ്രസിഡന്റ്...മറയൂരുകാരുടെ സ്വന്തം ഭാസ്‌കരന്‍ മാഷ്. സമാനതകളില്ലാത്ത അഭിനയമുഹൂര്‍ത്തങ്ങളാല്‍ ഭാസ്‌കകരന്‍ മാഷായി ' വിലായത്ത് ബുദ്ധ 'യില്‍ ഞെട്ടിച്ചിരിക്കുകയാണ് ഷമ്മി തിലകന്‍ . ചില രംഗങ്ങളില്‍ മലയാളത്തിന്റെ സ്വന്തം അഭിനയ കുലപതി തിലകനെ തന്നെ അനുസ്മരിപ്പിക്കുന്ന ശരീര ഭാഷയുമായി വിസ്മയിപ്പിച്ചിരിക്കുകയാണ് അദ്ദേഹം. പകയും പ്രതികാരവും വീറും വാശിയും പോരാട്ട വീര്യവും ഭയവും നിസ്സാഹായവസ്ഥയുമൊക്കെ മാറി മറിയുന്ന ഭാവാഭിനയങ്ങളുടെ അനന്യമായ കാഴ്ചയാണ് ഷമ്മി തിലകന്‍ ചിത്രത്തില്‍ കാഴ്ചവെച്ചിരിക്കുന്നത്.

സിനിമ തുടങ്ങുന്നത് തന്നെ ഭാസ്‌കരന്‍ മാഷിന്റെ പ്രഭാഷണത്തോടെയാണ്. ആത്മാഭിമാനം നീറ്റിലെ കുമിളപോലെയാണെന്ന് പറയുന്ന മാഷിന് നാട്ടില്‍ മറ്റൊരു വിളിപ്പേരുണ്ട് തൂവെള്ള ഭാസ്‌കരന്‍. എതിരെ നില്‍ക്കുന്ന പാര്‍ട്ടിയില്‍ ആരുവന്നാലും ഇപ്പുറത്ത് ഭാസ്‌കരന്‍ മാഷുണ്ടെങ്കില്‍ പാര്‍ട്ടിക്ക് വിജയം ഉറപ്പെന്നാണ് അണികളുടേയും ആത്മവിശ്വാസം.

Also Read: ഇത് പരിഹസിച്ചവര്‍ക്കുള്ള മറുപടിയാണ്; ഒരു രാജകുമാരിയെ പോലെ അണിഞ്ഞൊരുങ്ങി രേണു സുധി

ഭാസ്‌കരന്‍ മാഷിന്റെ ജീവിതത്തില്‍ ആകസ്മികമായുണ്ടാകുന്ന വലിയൊരു സംഭവവും തുടര്‍ന്നുണ്ടാകുന്ന സംഭവവികാസങ്ങളുമൊക്കെയാണ് സിനിമയുടെ ഇതിവൃത്തം. അതിന് പിന്നാലെയാണ് ഡബിള്‍ മോഹനന്റെ വരവും ചന്ദനവേട്ടയും തുടര്‍ സംഭവങ്ങളുമൊക്കെ അരങ്ങേറുന്നത്. സിനിമയുടെ ഹൈലൈറ്റ് തന്നെ നേര്‍ക്കുനേര്‍ പോരടിക്കുന്ന ഭാസ്‌കരന്‍ മാഷിന്റേയും പൃഥ്വിരാജ് അവതരിപ്പിക്കുന്ന ഡബിള്‍ മോഹനന്റേയും രംഗങ്ങളാണ്. ഒരേ സമയം പ്രേക്ഷകരില്‍ ആകാംക്ഷ നിറയ്ക്കുന്നുണ്ട് ഇവര്‍ ഒരുമിച്ചെത്തുന്ന സീനുകള്‍.

പല അടരുകളായി ഒരുക്കിയിരിക്കുന്ന ഭാസ്‌കരന്‍ മാഷിന്റെ ക്യാരക്ടര്‍ ആര്‍ക്ക് സമീപകാല സിനിമകളില്‍ തന്നെ ഏറെ മികച്ചുനില്‍ക്കുന്ന ഒന്നാണ്. ഷമ്മി തിലകന്റെ കരിയറില്‍ തന്നെ ഏറെ വേറിട്ട വേഷമാണ് ഭാസ്‌കരന്‍മാഷ് എന്ന് നിസ്സംശയം പറയാം. അതിശക്തമായ ഡയലോഗ് ഡെലിവറിയും ശരീരഭാഷയുമായി ഭാസ്‌കരന്‍ മാഷായി അദ്ദേഹം ജീവിക്കുകയായിരുന്നു. ശ്വാസമടക്കിപ്പിടിച്ചിരുന്നു കണ്ടുപോകുന്ന ഒട്ടേറെ രംഗങ്ങളും ആക്ഷന്‍ സീനുകളും കുടുംബങ്ങള്‍ ഏറ്റെടുക്കുന്ന അഭിനയ മുഹൂര്‍ത്തങ്ങളുമൊക്കെയായി 'വിലായത്ത് ബുദ്ധ' തിയേറ്ററുകളെ ആവേശം കൊള്ളിച്ചിരിക്കുകയാണ്. ചടുലമായ സംഘട്ടനരംഗങ്ങളും സിനിമയിലുണ്ട്.


ജി. ആര്‍ ഇന്ദുഗോപന്റെ പ്രശസ്ത നോവലായ 'വിലായത്ത് ബുദ്ധ' അതേ പേരില്‍ തന്നെയാണ് ജയന്‍ നമ്പ്യാരുടെ സംവിധാനത്തില്‍ സിനിമയായി പ്രേക്ഷകരിലേക്ക് എത്തിയിരിക്കുന്നത്. പ്രിയംവദ കൃഷ്ണയാണ് ചിത്രത്തിലെ നായികയായി എത്തിയിരിക്കുന്നത്. 'തൊണ്ടിമുതലും ദൃക്സാക്ഷിയും', 'സത്യം പറഞ്ഞാല്‍ വിശ്വസിക്കുവോ', 'സൗദി വെള്ളക്ക' തുടങ്ങിയ ഹിറ്റ് ചിത്രങ്ങള്‍ക്ക് ശേഷം ഉര്‍വ്വശി തിയെറ്റേഴ്‌സിന്റെ ബാനറില്‍ ഒരുക്കിയിരിക്കുന്ന ബ്രഹ്‌മാണ്ഡ സിനിമയാണ് 'വിലായത്ത് ബുദ്ധ'. എവിഎ പ്രൊഡക്ഷന്‍സിനുവേണ്ടി എ.വി അനൂപുമായി ചേര്‍ന്നാണ് ചിത്രം ഒരുക്കിയിരിക്കുന്നത്. ജി.ആര്‍. ഇന്ദുഗോപനും രാജേഷ് പിന്നാടനും ചേര്‍ന്നാണ് 'വിലായത്ത് ബുദ്ധ'യുടെ തിരക്കഥ ഒരുക്കിയിരിക്കുന്നത്. അനു മോഹന്‍, രാജശ്രീ നായര്‍, ടി.ജെ. അരുണാചലം തുടങ്ങി നിരവധി താരങ്ങളാണ് ചിത്രത്തിലുള്ളത്. അരവിന്ദ് കശ്യപ്, രെണദേവ് ഒരുക്കിയിരിക്കുന്ന ദൃശ്യങ്ങളും ജേക്‌സ് ബിജോയിയുടെ സംഗീതവും സിനിമയുടെ ആത്മാവ് തന്നെയാണ്.