അസ്വാഭാവികതകള്‍ നിറയുന്ന വെള്ളിമല; 'കൂടോത്രം' ട്രെയിലര്‍ സോഷ്യല്‍ മീഡിയയില്‍ തരംഗമാകുന്നു

നിഗൂഢതയും ഭീതിയും നിറഞ്ഞ ഹൈറേഞ്ച് കാഴ്ചകളുമായി എത്തുന്ന ' കൂടോത്രം ' സിനിമയുടെ ട്രെയിലര്‍ മണിക്കൂറുകള്‍ക്കുള്ളില്‍ തന്നെ സോഷ്യല്‍ മീഡിയയില്‍ വലിയ തരംഗമായി മാറി. കൊച്ചി ലുലു മാളില്‍ നടന്ന പ്രൗഢഗംഭീരമായ ചടങ്ങില്‍ പുറത്തിറങ്ങിയ ട്രെയിലര്‍, ഭീതിയും നിഗൂഢതയും ഹാസ്യവും ഒരേപോലെ കോര്‍ത്തിണക്കിയാണ് പ്രേക്ഷകരിലേക്ക് എത്തിയത്. ഇടുക്കിയിലെ വെള്ളിമല എന്ന മലയോര ഗ്രാമത്തില്‍ അരങ്ങേറുന്ന അസ്വാഭാവിക സംഭവങ്ങളെ പശ്ചാത്തലമാക്കി ഒരുക്കിയ ഈ ചിത്രം ഒരു ഹൊറര്‍-മിസ്റ്ററി ഫാമിലി കോമഡി ത്രില്ലറാണെന്ന് ട്രെയിലര്‍ ഉറപ്പുനല്‍കുന്നു.

ദൃശ്യഭംഗിയേറിയ ഫ്രെയിമുകള്‍ക്കൊപ്പം ഗോപി സുന്ദര്‍ ഒരുക്കിയ ആകാംക്ഷ നിറഞ്ഞ പശ്ചാത്തല സംഗീതം കൂടിയായപ്പോള്‍ ട്രെയിലര്‍ പ്രേക്ഷക മനസ്സുകളില്‍ ശക്തമായ സ്വാധീനമാണ് ചെലുത്തിയത്. വ്യത്യസ്തമായ ഹൊറര്‍ ട്രീറ്റ്മെന്റും കഥാപ്രമേയത്തിലെ പുതുമയും ബൈജു എഴുപുന്നയുടെ വേറിട്ട പ്രകടനവുമാണ് സോഷ്യല്‍ മീഡിയയില്‍ പ്രധാനമായും ചര്‍ച്ച ചെയ്യപ്പെടുന്നത്. കുടുംബ പ്രേക്ഷകരെയും യുവാക്കളെയും ഒരുപോലെ ആകര്‍ഷിക്കുന്ന ഘടകങ്ങള്‍ ചിത്രത്തിലുണ്ടെന്നാണ് പ്രാഥമിക വിലയിരുത്തലുകള്‍.

Also Read: അമ്മയുടെ രണ്ടാം വിവാഹം നടത്തിയിട്ടേ ഞാന്‍ വിവാഹ ജീവിതത്തിലേക്ക് കടക്കൂ എന്ന് താരപുത്രി; സുരേഖ വാണി സമ്മതിച്ചോ?

മൂന്ന് പതിറ്റാണ്ടിലേറെയായി അഭിനയരംഗത്ത് സജീവമായ ബൈജു എഴുപുന്ന ആദ്യമായി സംവിധായകനാകുന്നു എന്ന പ്രത്യേകതയും ഈ ചിത്രത്തിനുണ്ട്. ചിത്രത്തിലെ കേന്ദ്രകഥാപാത്രമായ 'വാവച്ചന്‍' എന്ന കര്‍ഷകനായി അദ്ദേഹം എത്തുമ്പോള്‍, അത് അദ്ദേഹത്തിന്റെ കരിയറിലെ തന്നെ ശ്രദ്ധേയമായ ഒരു വഴിത്തിരിവാകുമെന്ന് ഉറപ്പാണ്. സാന്‍ജോ പ്രൊഡക്ഷന്‍സിന്റെ ബാനറില്‍ നിര്‍മ്മിക്കുന്ന ഈ ചിത്രത്തിന്റെ കോ പ്രൊഡ്യൂസര്‍ റെജിയാണ്.

Also Read: എന്റെ മുന്‍ ഭാര്യ വേറൊരു കല്യാണം കഴിച്ചു, കുഞ്ഞിന്റെ ഫോട്ടോ ഡിലീറ്റ് ചെയ്തത് മനപൂര്‍വ്വം; വ്യക്തത നല്‍കി ഗംഗയും അപ്പുവും

സായ് കുമാര്‍, സലിം കുമാര്‍, ശ്രീനാഥ് മകാന്തി, അലന്‍സിയര്‍, ജോയ് മാത്യു, സുധി കോപ്പ, ഡിനോയ് പൗലോസ്, റേച്ചല്‍, ദിയ തുടങ്ങി മലയാളത്തിലെ വലിയൊരു താരനിര തന്നെ അണിനിരക്കുന്നുണ്ട്. ട്രെയിലറിന് ലഭിച്ച വന്‍ സ്വീകരണം കണക്കിലെടുക്കുമ്പോള്‍, ഈ മാസം 13 നു ചിത്രം തിയേറ്ററുകളിലെത്തുമ്പോള്‍ വലിയൊരു വിജയം നേടുമെന്ന പ്രതീക്ഷയിലാണ് സിനിമാ ലോകം.