ആ ഒരു കാര്യത്തില്‍ എനിക്ക് വിഷമമുണ്ട്; റൊമാന്‍സ് സിനിമകള്‍ ചെയ്യുന്നത് നിര്‍ത്തിയതിന് കാരണം വെളിപ്പെടുത്തി മാധവന്‍

Authored byഅശ്വിനി പി | Samayam Malayalam | Updated: 28 Mar 2025, 11:00 am

Samayam Malayalamആർ മാധവൻ

ആര്‍ എന്നാല്‍ ആര്‍ മാധവന്റെ റൊമാന്‍സ് എന്ന് വിശ്വസിച്ചിരുന്ന ഒരു കാലമുണ്ടായിരുന്നു നൈന്റീസ് കിഡ്‌സിന്. അതിന് പ്രധാന കാരണം അലൈപ്പായുതേ എന്ന സിനിമയാണ്. എന്നാല്‍ ഒന്ന് രണ്ട് സിനിമകള്‍ മാറ്റി നിര്‍ത്തിയാല്‍ ഞാന്‍ അധികം റൊമാന്‍സ് സിനിമകള്‍ ചെയ്തിട്ടില്ല എന്ന് മാധവന്‍ വ്യക്തമാക്കുന്നു. റൊമാന്‍സ് സിനിമകള്‍ ചെയ്യുന്നത് നിര്‍ത്താനുണ്ടായ കാരണവും മാധവന്‍ പറയുന്നുണ്ട്.

ടെസ്റ്റ് എന്ന പുതിയ ചിത്രത്തിന്റെ പ്രമോഷനില്‍ സംസാരിക്കുകയായിരുന്നു മാധവന്‍. ടെസ്റ്റില്‍ നയന്‍താരയാണ് മാധവന്റെ നായിക. സിദ്ധാര്‍ത്ഥും മീരാ ജാസ്മിനും മറ്റ് രണ്ട് കേന്ദ്ര കഥാപാത്രങ്ങളായി എത്തുന്നു. ഏപ്രില്‍ 4 ന് നെറ്റ്ഫ്‌ളിക്‌സില്‍ ആണ് സിനിമ റിലീസ് ചെയ്യാന്‍ പോകുന്നത്.

Also Read: കല്യാണം കഴിഞ്ഞ് വര്‍ഷയെ പുതിയ വീട്ടിലേക്ക് കൊണ്ടുവരണം എന്ന ആഗ്രഹം നടക്കില്ല; കല്യാണത്തെ കുറിച്ചും വീടു പണിയെ കുറിച്ചം കാര്‍ത്തിക് സൂര്യ

അലൈപ്പായുതേ ചെയ്യുന്ന സമയത്ത് തന്നെ എനിക്ക് 30 വയസ്സ് ആയി, ഇനിയെന്ത് റൊമാന്‍സ്, കൂടിപ്പോയാല്‍ 35 വയസ്സ് വരെ എന്തെങ്കിലും ചെയ്യാം എന്ന തോന്നലുണ്ടായിരുന്നു. നിങ്ങള്‍ ശ്രദ്ധിച്ചു നോക്കിയാല്‍ ഒരു കാര്യം മനസ്സിലാക്കാം, ശാലിനിയാണ് എനിക്കൊപ്പം അഭിനയിച്ച നായികമാരില്‍ തമിഴ് നന്നായി സംസാരിക്കുന്ന നായിക. നല്ല സ്പീഡില്‍ ശാലിനി തമിഴ് സംസാരിക്കും. നമ്മള്‍ ഫീലോടെ ഒരു ഡയലോഗ് പറയുമ്പോള്‍, അതേ ഫീലില്‍ ശാലിനി തിരിച്ചു സംസാരിക്കും.

പക്ഷേ പിന്നീട് ഒരു തമിഴ് നടിയും എനിക്കൊപ്പം അഭിനയിച്ചിട്ടില്ല, അത് കാരണം ഒരു നടന്‍ എന്ന നിലയില്‍ എനിക്ക് വളരാനുള്ള അവസരം കിട്ടിയില്ല. അക്കാര്യത്തില്‍ എനിക്ക് വിഷമമുണ്ട്. സിങ്ക് സൗണ്ടില്‍ സംസാരിക്കാതെ റൊമാന്‍രിക് സിനിമകള്‍ വര്‍ക്കാകില്ല. അലൈപ്പായുതേ പോലൊരു സിനിമ ചെയ്തിട്ട്, അതിനെ താഴ്ത്താന്‍ സാധിക്കുമോ. അതുകൊണ്ടാണ് ഞാന്‍ റൊമാന്റിക് സിനിമകള്‍ ചെയ്യുന്നത് തന്നെ നിര്‍ത്തിയത്. ലൈവ് സൗണ്ട് ഇല്ലാതെ സിനിമകള്‍ ചെയ്യില്ല എന്ന് ഞാന്‍ തീരുമാനിച്ചിട്ട് 20 വര്‍ഷത്തോളമായി.


ടെസ്റ്റില്‍ നയന്‍താര ലൈവ് സൗണ്ടില്‍ ആണ് അഭിനയിക്കുന്നത്. അവര്‍ ആദ്യമായി ലൈവ് സൗണ്ടില്‍ സിനിമ ചെയ്യുന്നത് ഇതാദ്യമാണ്. വളരെ മനോഹരമായി അവര്‍ സംസാരിച്ചു. അങ്ങനെ ഒരു ആര്‍ട്ടിസ്റ്റ് നമുക്കൊപ്പം നിന്ന് സംസാരിക്കുമ്പോള്‍ നമുക്കും അതിനനുസരിച്ച് വളരെ മനോഹരമായി അഭിനയിക്കാന്‍ സാധിക്കും. സ്‌ക്രിപ്റ്റിന് അപ്പുറത്തേക്ക് നമുക്ക് അഭിനയിക്കാന്‍ കഴിയുമ്പോഴാണ് ആ ഫ്രീഡം ലഭിക്കുന്നത്, അപ്പോഴാണ് ചെയ്യുന്ന ജോലി നമുക്ക് ആസ്വദിക്കാന്‍ കഴിയുന്നത്- മാധവന്‍ പറഞ്ഞു.