ആ രംഗങ്ങള്‍ മാറ്റാന്‍ തീരുമാനിച്ചു! നിങ്ങളുടെ മനോവിഷമം മനസിലാക്കുന്നു! എമ്പുരാന്‍ വിവാദങ്ങളില്‍ പ്രതികരണവുമായി മോഹന്‍ലാല്‍

Edited byഅനുപമ നായർ | Samayam Malayalam | Updated: 30 Mar 2025, 1:17 pm

Samayam Malayalamആ രംഗങ്ങള്‍ മാറ്റാന്‍ തീരുമാനിച്ചു

എമ്പുരാന്‍ സിനിമയുമായി ബന്ധപ്പെട്ട വിവാദങ്ങളില്‍ പ്രതികരിച്ച് മോഹന്‍ലാല്‍. ഫേസ്ബുക്ക് പോസ്റ്റിലൂടെയായിരുന്നു അദ്ദേഹം നിലപാട് വ്യക്തമാക്കിയത്. സിനിമയിലെ രാഷ്ട്രീയ-സാമൂഹ്യ പശ്ചാത്തലം കുറേപേരെ വേദനിപ്പിച്ചു എന്നറിഞ്ഞതില്‍ ഖേദം പ്രകടിപ്പിക്കുന്നു. അത്തരം രംഗങ്ങള്‍ ചിത്രത്തില്‍ നിന്നും നീക്കാനായി തീരുമാനിച്ചു എന്നുമായിരുന്നു കുറിപ്പ്.

ലൂസിഫർ' ഫ്രാഞ്ചൈസിൻ്റെ രണ്ടാം ഭാഗമായ 'എമ്പുരാൻ' സിനിമയുടെ ആവിഷ്കാരത്തിൽ കടന്നു വന്നിട്ടുള്ള ചില രാഷ്ട്രീയ-സാമൂഹിക പ്രമേയങ്ങൾ എന്നെ സ്നേഹിക്കുന്നവരിൽ കുറേപേർക്ക് വലിയ മനോവിഷമം ഉണ്ടാക്കിയതായി ഞാനറിഞ്ഞു. ഒരു കലാകാരൻ എന്ന നിലയിൽ എൻ്റെ ഒരു സിനിമയും ഏതെങ്കിലും രാഷ്ട്രീയ പ്രസ്ഥാനത്തോടോ, ആശയത്തോടോ, മതവിഭാഗത്തോടോ വിദ്വേഷം പുലർത്തുന്നില്ല എന്ന് ഉറപ്പുവരുത്തേണ്ടത് എൻ്റെ കടമയാണ്.

Also Read: ലൂസിഫറില്‍ നിന്നും എമ്പുരാനിലേക്ക് എത്തിയപ്പോള്‍ പ്രിയദര്‍ശിനി രാംദാസിന് വന്ന മാറ്റം! പ്രതികരണങ്ങളില്‍ മനം നിറഞ്ഞ് മഞ്ജു വാര്യര്‍

അതുകൊണ്ടു തന്നെ എൻ്റെ പ്രിയപ്പെട്ടവർക്ക് ഉണ്ടായ മനോവിഷമത്തിൽ എനിക്കും എമ്പുരാൻ ടീമിനും ആത്മാർത്ഥമായ ഖേദമുണ്ട്, ഒപ്പം അതിൻ്റെ ഉത്തരവാദിത്വം സിനിമയ്ക്ക് പിന്നിൽ പ്രവർത്തിച്ച ഞങ്ങൾ എല്ലാവരുടേതുമാണ് എന്ന തിരിച്ചറിവോടെ അത്തരം വിഷയങ്ങളെ നിർബന്ധമായും സിനിമയിൽ നിന്ന് നീക്കം ചെയ്യാൻ ഞങ്ങൾ ഒരുമിച്ച് തീരുമാനിച്ച് കഴിഞ്ഞു.

കഴിഞ്ഞ നാല് പതിറ്റാണ്ട് നിങ്ങളിലൊരാളായാണ് ഞാൻ എൻ്റെ സിനിമാ ജീവിതം ജീവിച്ചത്. നിങ്ങളുടെ സ്നേഹവും വിശ്വാസവും മാത്രമാണ് എൻ്റെ ശക്തി. അതിൽ കവിഞ്ഞൊരു മോഹൻലാൽ ഇല്ല എന്ന് ഞാൻ വിശ്വസിക്കുന്നു എന്നുമായിരുന്നു കുറിപ്പ്. നിരവധി പേരാണ് പോസ്റ്റിന് താഴെയായി അഭിപ്രായങ്ങളുമായെത്തിയത്. ലാലിനെ പിന്തുണച്ച് ചിലരെത്തിയപ്പോള് ഈ ചെയ്യുന്നത് ശരിയല്ലെന്നായിരുന്നു മറുവിഭാഗം പറയുന്നത്.

തുടക്കം മുതല്‍ വാര്‍ത്തകളില്‍ നിറഞ്ഞ ചിത്രമായിരുന്നു എമ്പുരാന്‍. മാര്‍ച്ച് 27നായിരുന്നു ചിത്രം തിയേറ്ററുകളിലേക്ക് എത്തിയത്. റിലീസ് ചെയ്ത് മണിക്കൂറുകള്‍ പിന്നിടുന്നതിനിടയിലാണ് സിനിമയ്‌ക്കെതിരെ രൂക്ഷ വിമര്‍ശനങ്ങള്‍ ഉയര്‍ന്നത്. ചില കാര്യങ്ങള്‍ മാറ്റേണ്ടതാണെന്നായിരുന്നു ഒരുവിഭാഗത്തിന്റെ ആവശ്യം. മോഹന്‍ലാല്‍ ഈ സിനിമ കണ്ടിരിക്കാന്‍ സാധ്യതയില്ലെന്നും, കണ്ടിരുന്നുവെങ്കില്‍ ഇതൊന്നും സംഭവിക്കില്ലെന്നുമായിരുന്നു ചിലര്‍ പറഞ്ഞത്.

ആരേയും വേദനിപ്പിക്കാനായി സിനിമ ചെയ്യുന്ന ആളല്ല. എമ്പുരാനിലെ ചില കാര്യങ്ങള്‍ എന്നെ സ്‌നേഹിക്കുന്നവരെ വേദനിപ്പിച്ചു എന്നറിഞ്ഞു, ആ രംഗങ്ങള്‍ മാറ്റാനുള്ള ശ്രമം തുടങ്ങിയെന്ന് വ്യക്തമാക്കി മോഹന്‍ലാല്‍ എത്തിയതോടെ വിവാദങ്ങള്‍ അവസാനിക്കുമെന്ന പ്രതീക്ഷയിലാണ് അണിയറപ്രവര്‍ത്തകര്‍. വിവാദങ്ങളൊക്കെ ഒരു ഭാഗത്തുണ്ടെങ്കിലും സിനിമ വിജയകരമായി മുന്നേറുകയാണ്. മിക്ക സ്ഥലങ്ങളിലും ചിത്രത്തിന് ടിക്കറ്റ് കിട്ടാനില്ല അവസ്ഥയാണ്.