ആയിരക്കണക്കിന് ആളുകളുടെ മുന്നിലാണെന്ന് ഓർക്കാതെ, സ്റ്റേജിൽ ബ്ലാക്ക്പിങ്ക് താരങ്ങൾ ചെയ്തത്, ഒരു കണക്കിന് അത് നന്നായി എന്ന് ആരാധകർ!

Authored by: അശ്വിനി പി|Samayam Malayalam•24 Jul 2025, 8:01 pm

വൈ. ജി എന്റർടൈൻമെന്റിന്റെ ദക്ഷിണ കൊറിയൻ പെൺകുട്ടികളുടെ മ്യൂസിക് ബാന്റായ ബ്ലാക്ക് പിങ്കിലെ താരങ്ങളെല്ലാം ആരാധകർക്ക് ഏറെ പരിചിതരാണ്. ജിസൂവും ജെന്നിയും ലിസയും റോസും ഒന്നിച്ച് വേദിയിൽ എത്തിയാൽ അതൊരു ഓളമാണ്. പക്ഷേ ഇവർ തമ്മിൽ സ്റ്റേജിൽ കാണുന്ന ചേർത്തയും ഒത്തൊരുമയും സ്റ്റേജിന് പിന്നിലില്ല എന്ന തരത്തിൽ ചില ഗോസിപ്പുകൾ ഉണ്ടായിരുന്നു. ഏറ്റവുമൊടുവിൽ നടന്ന അവരുടെ പരിപാടിയിലൂടെ അതിനൊരു അവസാനമുണ്ടായി.

കാനഡയിൽ കഴിഞ്ഞ രണ്ട് ദിവസങ്ങളായി നടന്നുകൊണ്ടിരുന്ന സോള്ട്ട്-ഔട്ട് ഷോകൾ വിജയകരമായി അവസാനിച്ചിരുന്നു. റോജേഴ്സ് സ്റ്റേഡിയത്തിൽ തടിച്ചുകൂടിയ ആരാധകരെ ആവേശഭരിതരാക്കി നാലുപേരും മതിമറന്ന് പാടി. ടൊറന്റോയിലെ രണ്ടാം ദിവസത്തെ കച്ചേരിയിൽ, റോസിയുടെയും ബ്രൂണോ മാർസിന്റെയും ഹിറ്റ് സിംഗിൾ 'APT' പാടുമ്പോൾ വല്ലാത്ത ഒരു ആവേശം തന്നെയായിരുന്നു എന്ന് പുറത്തുവന്ന വീഡിയോകളിൽ വ്യക്തം.

Also Read: അച്ഛനാകുന്ന സന്തോഷം പങ്കുവച്ച് പിറ്റി ഡേവിഡ്‌സൺ; കാത്തിരിപ്പിലാണ്, ഈ സന്തോഷം പറഞ്ഞറിയിക്കാൻ കഴിയില്ല

അതിനിടയിൽ വന്ന ഒരു വീഡിയോയിൽ ജിസൂവും ജെന്നിയും ലിസയും റോസും തങ്ങൾ വേദിയിലാണെന്ന് പോലും മറന്ന് പോയി. സ്റ്റേജിന്റെ നടുവിൽ വച്ച് നാല് പേരും സംസാരിക്കുകയും ചില ബാക്ക് സ്റ്റേജ് തമാശകൾ പറയുകയും പ്രകടനത്തെ കുറിച്ച് പരസ്പരം സംസാരിക്കുകയുമൊക്കെ ചെയ്യുന്നുണ്ടായിരുന്നു.

പെട്ടന്ന് തങ്ങൾ ആയിരക്കണക്കിന് ആളുകൾക്ക് നടുവിലാണ് എന്ന് തിരച്ചറിഞ്ഞ ജെന്നി തമാശയോടെ അതിന് ക്ഷമ ചോദിക്കുകയും ചെയ്തു. ക്ഷമിക്കണം, ഞങ്ങൾ പരസ്പരം അഭിപ്രായങ്ങൾ പങ്കുവെക്കുന്നത് ഞങ്ങൾക്കൊരുപാട് ഇഷ്ടമുള്ളതുകൊണ്ടാണ്. ഒരുപാട് വഴക്കിട്ടാലും, ദിവസത്തിന്റെ അവസാനം അതൊക്കെ പരിഹരിച്ച് സന്തോഷത്തോടെയാണ് ഞങ്ങൾ മുന്നോട്ട് പോകുന്നത്. ആരും വിഷമിക്കേണ്ട- എന്നായിരുന്നു ജെന്നി പറഞ്ഞത്.


പാപ്പരാസികൾ വാ മൂടിക്കോളൂ, ഇവർ നാലുപേർക്കുമിടയിൽ ഒരു പ്രശ്നവും ഇല്ല എന്ന ജെന്നി വ്യക്തമാക്കി കഴിഞ്ഞു എന്ന് ആരാധകർ പറയുന്നു. കൂട്ടുകാർക്കിടയിൽ അഭിപ്രായ വ്യത്യാസങ്ങൾ ഉണ്ടാവുന്നത് സ്വാഭാവികമാണ്, പക്ഷേ അത് അവർ തന്നെ പരിഹരിക്കുകയും ചെയ്യുന്നുണ്ട്. ഗോസിപ്പുകൾ അവസാനിപ്പിക്കാൻ ജെന്നി ഒരുപക്ഷേ മനപൂർവ്വം പറഞ്ഞതായിരിക്കാം, എന്ത് തന്നെയായാലും ആ പറഞ്ഞത് വളരെ നന്നായി എന്നാണ് ആരാധകരുടെ അഭിപ്രായം.