ആർസിബി ടീമിൽ നിന്ന് രണ്ട് പേർ പുറത്തായേക്കും, സീനിയർ താരം മടങ്ങി വരും; ചെന്നൈ സൂപ്പർ കിങ്സിന് എതിരായ സാധ്യത പ്ലേയിങ് ഇലവൻ

Curated byഗോകുൽ എസ് | Samayam Malayalam | Updated: 27 Mar 2025, 2:12 pm

Samayam Malayalam

2025 സീസൺ ഐപിഎല്ലിലെ ആദ്യ കളിയിൽ ഗംഭീര ജയമാണ് റോയൽ ചലഞ്ചേഴ്സ് ബംഗളൂരു നേടിയത്. കൊൽക്കത്ത നൈറ്റ് റൈഡേഴ്സിന് എതിരെ ഏഴ് വിക്കറ്റ് ജയമായിരുന്നു വിരാട് കോഹ്ലിയും സംഘവും നേടിയത്. രജത് പാട്ടിദാറിന്റെ ക്യാപ്റ്റൻസിയിൽ കളിച്ച ആദ്യ മത്സരത്തിൽ തന്നെ ഇത്തരത്തിൽ ഒരു വിജയം നേടാനായത് ആർസിബിക്ക് സമ്മാനിക്കുന്ന ആത്മവിശ്വാസം ചെറുതല്ല. ആദ്യ കളി ജയിച്ച ആർസിബി വെള്ളിയാഴ്ച രണ്ടാമത്തെ മത്സരത്തിന് ഇറങ്ങുകയാണ്. കരുത്തരായ ചെന്നൈ സൂപ്പർ കിങ്സിന് എതിരെ അവരുടെ തട്ടകത്തിലാണ് ഈ പോരാട്ടം. ആദ്യ മത്സരത്തിൽ കളിച്ച ടീമിൽ ഏതാനും മാറ്റങ്ങളുമായാകും ചെന്നൈക്ക് എതിരെ ആർസിബി ഇറങ്ങുക. കെകെആറിന് എതിരായ കളിയിൽ പുറത്തിരുന്ന ഒരു സീനിയർ താരം ടീമിലേക്ക് മടങ്ങിയെത്തിയേക്കും. ചെന്നൈ സൂപ്പർ കിങ്സിന് എതിരായ മത്സരത്തിൽ ആർസിബി ടീമിൽ വരാൻ സാധ്യതയുള്ള മാറ്റങ്ങളും അവരുടെ സാധ്യത പ്ലേയിങ് ഇലവനും നോക്കാം.


പരിക്കിനെത്തുടർന്ന് കൊൽക്കത്ത നൈറ്റ് റൈഡേഴ്സി‌ന് എതിരായ മത്സരം നഷ്ടമായ സീനിയർ പേസർ ഭുവനേശ്വർ കുമാർ സിഎസ്കെക്ക് എതിരെ കളിക്കുമെന്നാണ് കരുതപ്പെടുന്നത്. ഭുവിയുടെ തിരിച്ചുവരവ് ആർസിബിയുടെ ബൗളിങ് കരുത്ത് കൂട്ടും. ഭുവനേശ്വർ കുമാർ പ്ലേയിങ് ഇലവനിലേക്ക് വരുമ്പോൾ റാസിഖ് സലാമിനാകും സ്ഥാനം നഷ്ടമാവുക.

Also Read: ആദ്യ കളിയിൽ ആർസിബിയുടെ വഴിത്തിരിവായത് അക്കാര്യം, ഈ കിടിലൻ ജയത്തിന് ടീം നന്ദി പറയേണ്ടത് ആ പുതിയ താരത്തിന്

മത്സരം നടക്കാനിരിക്കുന്ന ചെന്നൈയിലെ ചെപ്പോക്ക് സ്റ്റേഡിയത്തിൽ സ്പിൻ അനുകൂല വിക്കറ്റുകളാണ് ഉള്ളത്. അതിനാൽ ഒരു അധിക സ്പിന്നറെ ഉൾപ്പെടുത്തി ആർസിബി ഈ മത്സരം കളിക്കാൻ സാധ്യത കൂടുതലാണ്. അങ്ങനെയെങ്കിൽ യഷ് ദയാലിന് പകരം മോഹിത് റാതി കളിച്ചേക്കും. സുയാഷ് ശർമ, കൃണാൽ പാ‌ണ്ഡ്യ എന്നിവരാകും പ്ലേയിങ് ഇലവനിലെ മറ്റ് സ്പിന്നർമാർ. പാർട് ടൈം സ്പിന്നറായി ലിയാം ലിവിങ്സ്റ്റണെയും അവർക്ക് ഉപയോഗപ്പെടുത്താം.

അതേ സമയം ആർസിബിയുടെ ബാറ്റി‌ങ് ലൈനപ്പിൽ മാറ്റങ്ങൾക്ക് സാധ്യതയില്ല. ഫിലിപ് സാൾട്ടും വിരാട് കോഹ്ലിയും ചേർന്നാകും ബാറ്റിങ് ഓപ്പൺ ചെയ്യുക. ആദ്യ കളിയിൽ വെടിക്കെട്ട് അർധസെഞ്ചുറി നേടിയ ഈ ഓപ്പണർമാരിൽ നിന്ന് ഒരിക്കൽക്കൂടി ആർസിബി ഒരു കിടില‌ൻ പ്രകടനം പ്രതീക്ഷിക്കുന്നു. ഇവർ ക്ലിക്കായാൽ ആർസിബിക്ക് കാര്യ‌ങ്ങൾ എളുപ്പമാകും. ദേവ്ദത്ത് പടിക്കലാകും മൂന്നാം നമ്പരിൽ. കെകെആറിന് എതിരെ 10 റൺസ് മാത്രമെടുത്താണ് പടിക്കൽ പുറത്തായിരുന്നത്.

Also Read: ഐപിഎല്‍ 2025 ഉദ്ഘാടനത്തിന് കോഹ്‌ലി വെടിക്കെട്ട്; ചാമ്പ്യന്‍മാരെ മുട്ടുകുത്തിച്ച് ആര്‍സിബി തുടങ്ങി

ക്യാപ്റ്റൻ രജത് പാട്ടിദാറാകും നാലാം നമ്പരിൽ. കെകെആറിന് എതിരെ വെടിക്കെട്ട് നടത്താൻ പാട്ടിദാറിന് സാധിച്ചിരുന്നു. ലിയാം ലിവിങ്സ്റ്റണാകും അഞ്ചാം നമ്പരിൽ. വിക്കറ്റ് കീപ്പറായി ജിതേഷ് ശർമ കളിക്കുമ്പോൾ ടിം ഡേവിഡിനാകും ഫിനിഷിങ് ഉത്തരവാദിത്വം. സ്പി‌ൻ ബൗളിങ് ഓൾ റൗണ്ടറായി കൃണാൽ പാ‌ണ്ഡ്യക്കും ടീമിൽ സ്ഥാനം ഉറപ്പാണ്. ഭുവനേശ്വർ കുമാർ, ജോഷ് ഹേസൽവുഡ് എന്നിവർ പേസ് നിരയിലും സുയാഷ് ശർമ സ്പെഷ്യലിസ്റ്റ് സ്പിന്നറായും കളിച്ചേക്കും. മോഹിത് റാതി ഇമ്പാക്ട് താരമായി എത്താനാണ് സാധ്യത.

റോയൽ ചലഞ്ചേഴ്സ് ബംഗളൂരിന്റെ സാധ്യത ടീം: വിരാട് കോഹ്ലി, ഫിൽ സാൾട്ട്, ദേവ്ദത്ത് പടിക്കൽ, രജത് പാട്ടിദാർ, ലിയാം ലിവിങ്സ്റ്റൺ, ടിം ഡേവിഡ്, ജിതേഷ് ശർമ ( വിക്കറ്റ് കീപ്പർ ), കൃണാൽ പാണ്ഡ്യ, ഭുവനേശ്വർ കുമാർ, ജോഷ് ഹേസൽവുഡ്, സുയാഷ് ശർമ, ഇമ്പാക്ട് പ്ലേയർ: മോഹിത് റാതി.