ഇത് കെൻഡലിനെ ഉദ്ദേശിച്ചാണോ? നമ്മുടെ സം​ഗീതത്തെ മനസ്സിലാക്കത്തവരെ പ്രേമിക്കരുത് എന്ന് ബാഡ് ബണ്ണി

Authored by: അശ്വിനി പി|Samayam Malayalam•9 Jul 2025, 6:26 pm

ബെനിറ്റോ അൻ്റോണിയോ മാർട്ടിനെസ് ഒകാസിയോ എന്ന ബാഡ് ബണ്ണി യുടെ പ്രണയവും ബ്രേക്കപ്പും എല്ലാം വാർത്തകളിലൂടെ ആരാധകർ അറിഞ്ഞതാണ്. മോഡലായ കെൻഡൽ ജെന്നറെയുമായി ബാഡ് ബണ്ണി പ്രണയത്തിലായിരുന്നു. എന്നാൽ ആ ബന്ധം വേർപിരിഞ്ഞതിന് ശേഷം ഇപ്പോൾ ബണ്ണി ഇൻസ്റ്റഗ്രാമിൽ പങ്കുവച്ച ഫോട്ടോകളാണ് വൈറലാവുന്നത്.

"Lunes" എന്ന ക്യാപ്ഷനോടെ പ്യൂർട്ടോ റിക്കൻ സൂപ്പർ സ്റ്റാർ ആയ ബാഡ് ബണ്ണി കഴിഞ്ഞ ദിവസം പോസ്റ്റ് ചെയ്തിരുന്നു. തന്റെ അവധി ആഘോഷത്തിന്റെ ചിത്രങ്ങളാണ് പങ്കുവച്ചിരിയ്ക്കുന്നത്, എന്നാലും അതിൽ രണ്ടാമത്തെ ചിത്രമാണ് ഇപ്പോൾ സോഷ്യൽ മീഡിയയിൽ ചർച്ചയാവുന്നത്. നിങ്ങളുടെ സംഗീതത്തെ മനസ്സിലാക്കാത്തവരെ ഡേറ്റിങ് ചെയ്യുന്നത് നിർത്തൂ- എന്ന ക്യാപ്ഷനോടെയുള്ള ഒരു പച്ച ബേസ്ബോൾ തൊപ്പിയുടെ ക്ലോസപ്പ് ചിത്രമാണത്. ഇത് കെൻഡൽ ജെന്നറെ ഉദ്ദേശിച്ചാണോ എന്നാണ് ആരാധകരുടെ ചോദ്യം.

Also Read: എന്തിനാണ് ബിടിഎസ് ഫാൻസിനെ ആർമി എന്ന് വിളിക്കുന്നത്? ഇന്ന് ആർമി ഡേ, 12 വർഷം പൂർത്തിയാവുന്നു!

ആ തൊപ്പി ബാഡ് ബണ്ണിയുടെ സ്വന്തമായി തോന്നുന്നില്ല, മറിച്ച് ഒരു ഓൺലൈൻ മീമിൽ നിന്നുള്ളതായിരിക്കാം. എന്നിരുന്നാലും, അത് ആരാധകർക്ക് ഒരു ചർച്ചയ്ക്ക് കാരണമായി. ഫ്രണ്ട്ലി ഫയർ- എന്നാണ് ഒരാൾ ചിത്രത്തിന് കമന്റിട്ടത്. "ആ രണ്ടാമത്തെ ചിത്രം കെൻഡലിന് വേണ്ടിയായിരുന്നു" എന്ന് ഒരാൾ പറയുന്നു

2023 ൽ ആണ് ബാഡ് ബണ്ണിയും കെൻഡൽ ജെന്നറെ തമ്മിലുള്ള ഡേറ്റിങ് ആരംഭിച്ചത്. 2023-ന്റെ തുടക്കത്തിലാണ് ഇരുവരും ഒരുമിച്ചുള്ള ചിത്രങ്ങൾ പുറത്തുവരാൻ തുടങ്ങിയതോടെ ഗോസിപ്പുകൾ ആരംഭിച്ചു. ഇരുവരും തങ്ങളുടെ ബന്ധം രഹസ്യമാക്കാൻ പരമാവതി ശ്രമിച്ചിരുന്നുവെങ്കിലും ഒരുമിച്ചുള്ള ചിത്രങ്ങൾ പുറത്തുവന്നുകൊണ്ടേയിരുന്നു.

2023 ജൂണിൽ Rolling Stone-ന് നൽകിയ അഭിമുഖത്തിൽ ഇതേ കുറിച്ച് ചോദിച്ചപ്പോൾ, എന്നെക്കുറിച്ച് എല്ലാം ആളുകൾക്കറിയാം, പിന്നെ എനിക്ക് സംരക്ഷിക്കാൻ എന്താണുള്ളത്? എന്റെ സ്വകാര്യ ജീവിതം, എന്റെ വ്യക്തിപരമായ ജീവിതം. അതാണ് ഏക ഉത്തരം. അവസാനം, എനിക്കുള്ള ഒരേയൊരു കാര്യം എന്റെ സ്വകാര്യതയാണ്- എന്നായിരുന്നു ഗായകന്റെ മറുപടി.

പിന്നീട് ഇരുവരും വേർപിരിഞ്ഞു എന്ന ഗോസിപ്പുകളും വന്നതിന് പിന്നാലെ, മെറ്റ് ഗാലയിൽ നിന്നുള്ള ഒരുമിച്ചുള്ള ചിത്രങ്ങൾ വന്നതോടെ ആ ഗോസിപ്പ് അവസാനിച്ചു. ഇരുവരും ഒന്നിച്ച് യാത്രകൾ ചെയ്യാനും, ജീവിതം ആസ്വദിക്കാനും തീരുമാനിച്ചു എന്നൊക്കെയായിരുന്നു വാർത്തകൾ. പിന്നാലെ വീണ്ടും വേർപിരിയൽ ഗോസിപ് ശക്തമാവുന്ന പശ്ചാത്തലത്തിലാണ് ബാഡ് ബണ്ണിയുടെ ഈ പോസ്റ്റ്, സംഗീതത്തെ മനസ്സിലാക്കത്തവരെ ഡേറ്റിങ് ചെയ്യരുത് എന്ന്.


കെൻഡലിന് മുൻപ്, ബാഡ് ബണ്ണി ഒരു ഇൻഫ്ലുവൻസറും ആഭരണ ഡിസൈനറുമായ ഗബ്രിയേല ബെർലിംഗേരിയുമായി പ്രണയത്തിലായിരുന്നു. 2017 മുതൽ 2022 വരെ ഡേറ്റ് ചെയ്തുവെങ്കിലും അത് മുന്നോട്ടു പോയില്ല. അതേസമയം, കെൻഡൽ മുൻപ് NBA താരം ഡെവിൻ ബുക്കറുമായി ഡേറ്റ് ചെയ്തിരുന്നു.