ഇത്രയും വലിയ പ്രായ വ്യത്യാസം, എങ്ങനെ വിശാലുമായി പ്രണയത്തിലായി എന്ന ചോദ്യത്തിന് ധന്‍ഷികയുടെ മറുപടി

വിശാലിന് എപ്പോള്‍ കല്യാണം എന്നത് തമിഴ് സിനിമ ഇന്റസ്ട്രിയിലെ ഒരു വലിയ ചോദ്യമായിരുന്നു. പല പ്രണയ ഗോസിപ്പുകളും, ഒരു വിവാഹ നിശ്ചയവും എല്ലാം കഴിഞ്ഞിട്ടും വിവാഹം നടന്നില്ല. നടികര്‍ സംഘം കെട്ടിടം പണിതതിന് ശേഷം മാത്രമേ വിവാഹമുണ്ടാവൂ എന്ന് വിശാല്‍ വ്യക്തമാക്കിയിരുന്നു. പത്ത് വര്‍ഷത്തോളമായി ആ കെട്ടിടത്തിന്റെ പണി നടന്നുകൊണ്ടേയിരിക്കുകയാണ്. ഏതാണ്ട് അവസാനത്തിലേക്ക് എത്തിയപ്പോഴാണ് സായി ധന്‍ഷികയുമായുള്ള വിവാഹത്തെ കുറിച്ച് വിശാല്‍ പരസ്യപ്പെടുത്തിയത്. വിശാലിന്റെ ബര്‍ത്ത് ഡേ ദിവസം ഇരുവരുടെയും വിവാഹ നിശ്ചയവും കഴിഞ്ഞു

ഇനി എന്നാണ് കല്യാണം എന്നാണ് ചോദ്യം, അതില്‍ സംശയമേ വേണ്ട- നടികര്‍ സംഘം കെട്ടിടത്തിന്റെ ഉദ്ഘാടനത്തിന് ശേഷമാണെന്ന് ഇപ്പോള്‍ സായി ധന്‍ഷിക യും പറയുന്നു. അതേ സമയം വിശാലിനെ തന്റെ കണവര്‍ (ഭര്‍ത്താവ്) എന്നാണ് സായി ധന്‍ഷിക അഭിമുഖത്തില്‍ വിശേഷിപ്പിച്ചത്. വര്‍ഷങ്ങളായി ആ മനുഷ്യന്‍ ഒരു കാര്യത്തില്‍ അത്രയേറെ ആഗ്രഹിച്ച് ചെയ്യുകയാണ്, അതിന് ശേഷം മാത്രമേ വിവാഹം ഉണ്ടാവൂ എന്നാണ് സായി ധന്‍ഷിക പറഞ്ഞത്.

Also Read: കൂടെ നില്‍ക്കേണ്ട സമയത്ത് ആരും കൂടെ നിന്നില്ല, ഒരാഴ്ച വീടിന് പുറത്തേ ഇറങ്ങിയില്ല; ആ ട്രോമയെ കുറിച്ച് സായി ധന്‍ഷിക

എട്ട് വര്‍ഷത്തോളം പ്രണയം എങ്ങനെ സ്വകാര്യമാക്കി വച്ചു എന്ന ചോദ്യത്തിനും ധന്‍ഷിക മറുപടി നല്‍കുന്നുണ്ട്. ഞങ്ങള്‍ രണ്ടുപേരും പ്രൈവെറ്റാണ്. 15 വര്‍ഷം മുന്‍പ് ഞങ്ങള്‍ സുഹൃത്തുക്കളായിരുന്നു, നടികര്‍ സംഘത്തിന്റെ പരിപാടികള്‍ക്കൊക്കെ വിളിക്കും, മുടങ്ങാതെ ഞാന്‍ പോകും. അദ്ദേഹത്തിന്റെ അടുത്ത് എനിക്ക് വളരെ റസ്‌പെക്ട്ഫുള്‍ ആയും സേഫായും ഫീല്‍ ചെയ്യാറുണ്ട്. സ്ത്രീകള്‍ക്ക് വളരെ അധികം പ്രാധാന്യം നല്‍കുന്ന, സേഫ്റ്റി ഉറപ്പുവരുത്തുന്ന ആളാണ്, അങ്ങനെയാണ് ഞാന്‍ അദ്ദേഹത്തെ കണ്ടത്.

ഒരു പോയിന്റില്‍ നമുക്കൊരാളെ കാണുമ്പോള്‍ ജീവിത കാലം മുഴുവന്‍ അയാള്‍ നമുക്കൊപ്പം വേണം എന്ന് തോന്നും. അങ്ങനെ ഞങ്ങള്‍ക്ക് രണ്ട് പേര്‍ക്കും തോന്നി. ഒരേസമയത്ത് തോന്നി എന്നതാണ് കൗതുകം, പിന്നെ സംസാരിച്ചു, വിവാഹത്തിലേക്ക് എത്തി.

പ്രായ വ്യത്യാസത്തെ കുറിച്ച് പലരും പറയുന്നു, അതിലൊന്നും കാര്യമില്ല. പത്ത് വയസ്സിന്റെ വ്യത്യാസം എന്നതൊന്നും വലിയ വിഷയമേ അല്ല. പരസ്പരം എങ്ങനെ മനസ്സിലാക്കുന്നു, എങ്ങനെ രണ്ടു പേരും പ്രണയിക്കുന്നു എന്നതാണ് കാര്യം. ഞാനൊരു പക്വതയുള്ള സ്ത്രീയാണ്, എനിക്ക് വേണ്ടതും ഒരു പക്വതയുള്ള ആളെയാണ്. ജീവിത കാലം മുഴുവന്‍ ഞങ്ങള്‍ക്ക് അങ്ങനെ പോകണം. വിവാഹത്തിന് ശേഷം അഭിനയിക്കുമോ എന്നൊന്നും ഇപ്പോള്‍ പറയാന്‍ പറ്റില്ല. ജീവിതം എങ്ങനെ പോകുന്നുവോ, അതുപോലെ. പ്ലാന്‍ ചെയ്‌തൊന്നും ഞാനൊന്നും ചെയ്യാറില്ല- സായി ധന്‍ഷിക പറഞ്ഞു.