ഇനി കരുതിയിരുന്നോളൂ, ഞാന്‍ ശരിക്കും നിങ്ങളില്‍ ഇംപ്രസ്ഡ് ആയി; അനശ്വര രാജനോട് രാം ചരൺ പറഞ്ഞത്

ഉദാഹരണം സുജാത എന്ന ആദ്യ ചിത്രം മുതല്‍ പ്രേക്ഷകരെ അമ്പരപ്പിച്ചുകൊണ്ടിരിക്കുകയാണ് അനശ്വര രാജന്‍. തണ്ണീര്‍ മത്തന്‍ ദിനങ്ങള്‍ എന്ന ചിത്രത്തിലൂടെ നായികയായി, പിന്നീട് നേര്, രേഖാ ചിത്രം, ഓസ്ലര്‍ പോലുള്ള ചിത്രങ്ങളിലെ അഭിനയത്തിലൂടെ കൂടുതല്‍ പാകപ്പെട്ട നടിയായി മാറുകയായിരുന്നു. ഇപ്പോള്‍ മലയാളത്തിന് പുറമെ തമിഴ് , തെലുങ്ക് ഭാഷാ ചിത്രങ്ങളിലും അനശ്വര മിന്നിക്കയറുകയാണ്.

ചാംപ്യന്‍ എന്ന അനശ്വരയുടെ തെലുങ്ക് ചിത്രം ഈ ക്രിസ്മസിന് തിയേറ്ററുകളിലെത്തും. കഴിഞ്ഞ ദിവസം ചിത്രത്തിന്റെ ഓഡിയോ ലോഞ്ച് ഹൈദരബാദില്‍വച്ച് നടന്നിരുന്നു. തെലുങ്ക് സൂപ്പർതാരം രാം ചരൺ ആണ് പരിപാടിയില്‍ മുഖ്യാതിഥിയായി എത്തിയത്. വേദിയില്‍ സംസാരിക്കവെ രാം ചരൺ അനശ്വര രാജനെ കുറിച്ച് വാചലാനായി. കൃത്യമായി അനശ്വരയുടെ പേര് പറയാന്‍ രാം ചാരണിന് അറിയില്ലായിരുന്നുവെങ്കിലും, നടിയുടെ മുഖത്തെ കുറിച്ചും അഭിനയത്തെ കുറിച്ചും ഡബ്ബിങിനെ കുറിച്ചുമൊക്കെ പ്രശംസിച്ചു.

Also Read: വളരെ പെട്ടന്ന് നിന്നെയങ്ങ് എടുത്തു, നിനക്കുവേണ്ടി ഞങ്ങളൊരുക്കിയ ജീവിതം ജീവിക്കാനുള്ള സമയം

അനശ്വര രാജനെ കുറിച്ച് പ്രത്യേകിച്ച് പറയണം എന്നു പറഞ്ഞുകൊണ്ടാണ് രാം ചരൺ തുടങ്ങിയത്. പിന്നീട് അനശ്വരയെ നോക്കി പറഞ്ഞു, രണ്ട് കാര്യങ്ങള്‍ നിങ്ങളോട് തീര്‍ച്ചയായും പറയണം - ഒന്നാമത്തെ കാര്യം, ഈ സിനിമയ്ക്ക് ശേഷം നിങ്ങള്‍ക്ക് ഒരുപാട് വലിയ സിനിമകളുടെ കോളുകള്‍ വന്നുകൊണ്ടേയിരിക്കും. ഏറ്റവും മികച്ച പ്രൊഡക്ഷന്‍ ഹൗസും, ഏറ്റവും മികച്ച സംവിധായകനും നിങ്ങളെ വിളിക്കും, അതിന് വേണ്ടി തയ്യാറായി ഇരുന്നോളൂ. നിങ്ങളുടെ മുഖത്ത് വല്ലാത്തൊരു തിളക്കമുണ്ട്. അതിനൊപ്പം താങ്കളുടെ പെര്‍ഫോമന്‍സ് ആര്‍ക്കും ഇഷ്ടം തോന്നുന്നവിധമാണ്. അപ്രോച്ചബ്ള്‍ ആയിട്ടുള്ള, ലൈക്കബിള്‍ ആയിട്ടുള്ള പെര്‍ഫോമന്‍സാമ് താങ്കളുടേത്. ഇന്ത്യന്‍ സിനിമ ഇന്റസ്ട്രിയില്‍ നിങ്ങള്‍ക്ക് വളരെ വലിയൊരു ഭാവിയുണ്ട് എന്ന് എനിക്ക് തോന്നുന്നു.

രണ്ടാമത്തെ കാര്യം എനിക്ക് അത്ഭുതമായി തോന്നിയത്, അനശ്വരയുടെ മാതൃഭാഷ മലയാളമാണ്. എന്നിട്ടും തെലുങ്ക് ഭാഷ പഠിച്ച്, മനസ്സിലാക്കി കഥാപാത്രത്തിന് വേണ്ടി അവര്‍ തന്നെയാണ് ഡബ്ബ് ചെയ്തത്. എത്രത്തോളം ഡെഡിക്കേറ്റഡ് ആണ് അനശ്വര തന്റെ ജോലിയില്‍ എന്ന് അതിലൂടെ വ്യക്തമാണ്. ഈ കാലത്ത് എത്ര നായികമാര്‍ അങ്ങനെയുണ്ട് എന്ന് എനിക്കറിയില്ല. അതുകൊണ്ടു തന്നെ നിങ്ങളുടെ ഡെഡിക്കേഷനിലും പാഷനിലും ഞാന്‍ അത്രയധികം ഇംപ്രസ് ആയിരിക്കുന്നു. എല്ലാ വിധ ഭാവുകങ്ങളും നേരുന്നു- രാം ചരൺ പറഞ്ഞു.

തന്റെ കരിയറില്‍ ഏറ്റവും അനിവാര്യമായ നേരത്താണ് ഈ സിനിമയിലേക്കുള്ള കോള്‍ വന്നത്. ചാംപ്യനിലേക്ക് തന്നെ വിളിച്ചതിന് സംവിധായകനും, പ്രൊഡ്യൂസര്‍ക്കുമെല്ലാം അനശ്വര നന്ദി അറിയിക്കുന്നുണ്ട്. തെലുങ്കും ഇംഗ്ലീഷും ഇടകലര്‍ത്തിയാണ് ഓഡിയോ ലോഞ്ചില്‍ അനശ്വര സംസാരിച്ചത്.