ഇന്‍ഫോ പാര്‍ക്കിലെ ജോലി ഉപേക്ഷിച്ച് സിനിമയിലേക്ക്! മറക്കാനാവാത്ത അനുഭവം പങ്കിട്ട് അഭിലാഷ് പിള്ള

Edited byഅനുപമ നായർ | Samayam Malayalam | Updated: 23 Mar 2025, 10:17 am

Samayam Malayalamഇന്‍ഫോ പാര്‍ക്കിലെ ജോലി ഉപേക്ഷിച്ച് സിനിമയിലേക്ക്

ജോലി ഉപേക്ഷിച്ച് സിനിമയിലേക്ക് വരികയായിരുന്നു അഭിലാഷ് പിള്ള. തന്റെ സിനിമ ജീവിതത്തെക്കുറിച്ചുള്ള കുറിപ്പ് വൈറലായിക്കൊണ്ടിരിക്കുകയാണ്. ജീവിതത്തിലെ ചില മറക്കാൻ പറ്റാത്ത അനുഭവങ്ങൾ. ഈ ഫോമിനും എനിക്കും ഒരു 6 വർഷത്തെ ബന്ധമുണ്ട്, കൃത്യമായി പറഞ്ഞാൽ 2019 മാർച്ചിൽ മൂത്ത മകൾ വൈഗയെ ഒന്നാം ക്ലാസ്സിൽ ചേർക്കാനായി ഭവൻസ് സ്കൂളിൽ പോകുന്നു. സിനിമക്ക് വേണ്ടി ഇൻഫോപാർക്കിലെ ജോലി രാജി വെച്ച് ഇറങ്ങിയിട്ട് അന്ന് ഏകദേശം 5 വർഷം കഴിഞ്ഞിരുന്നു. സിനിമ ചെയ്യുമെന്ന പ്രതീക്ഷയൊക്കെ നശിച്ചിരുന്നു, സ്കൂളിൽ നിന്നും ഈ ഫോം പൂരിപ്പിക്കാൻ തന്നപ്പോൾ ഞാൻ ഒന്ന് ടെൻഷൻ ആയി, കാരണം എന്റെ ജോലിയുടെ സ്‌ഥാനത്തു എഴുതാൻ എനിക്ക് ഒരുത്തരമില്ലാരുന്നു.

എന്നും രാവിലെ തിരക്കഥയുമായി ലൊക്കേഷനുകൾ കയറി ഇറങ്ങുന്ന കാലമായിരുന്നു അത്, രണ്ടും കല്പിച്ചു ജോലിയുടെ സ്‌ഥാനത്ത് തിരക്കഥാകൃത്ത് എന്നെഴുതുമ്പോൾ കണ്ണ് നിറഞ്ഞത് ആരും കാണാതെ ഇരിക്കാൻ ഞാൻ ശ്രമിച്ചു. ആ സമയവും വൈഗ മോൾ എന്നെ തന്നെ ചേർന്നു നിൽക്കുന്നുണ്ടാരുന്നു. ഫോം പരിശോധിച്ച അന്നത്തെ സ്കൂൾ പ്രിൻസിപ്പൽ എന്നോട് ഏതു സിനിമയാണ് ചെയ്‍തത് എന്ന് ചോദിച്ചപ്പോൾ ചിരിച്ചു കൊണ്ട് ധൈര്യമായി ഞാൻ പറഞ്ഞു സിനിമ ഒന്നും ചെയ്‌തിട്ടില്ല പക്ഷെ എന്റെ മകൾ ഈ സ്കൂളിൽ നിന്നും പഠിച്ചിറങ്ങുന്നതിനു മുന്നേ ഒരു സിനിമയെങ്കിലും ഞാൻ ചെയ്യുമെന്ന്.

Also Read: അച്ഛനില്‍ നിന്നും അപ്പൂപ്പനിലേക്ക്! അഹാനയുടെ വരവോടെയാണ് ജീവിതം മാറിയത്! എപ്പോഴും സന്തോഷവാനായിരിക്കുന്നതിന്റെ രഹസ്യം പങ്കിട്ട് കൃഷ്ണകുമാര്‍

അന്നാ സ്കൂളിൽ നിന്നും വൈഗയുടെ കൈ പിടിച്ചു പുറത്ത് ഇറങ്ങിയപ്പോൾ അവളോടും ഞാൻ പറഞ്ഞു അച്ഛന്റെ സിനിമ നടക്കുമെന്ന്, വർഷങ്ങൾക്ക് ശേഷം ഇന്ന് ഇളയ മകൾ മീനാക്ഷിയെ അതെ സ്കൂളിൽ ചേർക്കാൻ ചെന്നപ്പോൾ വീണ്ടും ഫോം പൂരിപ്പിക്കാൻ തന്നു. പക്ഷെ, ഇത്തവണ അത് പൂരിപ്പിക്കുമ്പോൾ സന്തോഷം കൊണ്ട് കണ്ണ് നിറഞ്ഞു.

കാരണം എന്റെ വൈഗ മോൾ അവിടെ ഓടി നടന്നു അഭിമാനത്തോടെ അച്ഛന്റെ പുതിയ സിനിമയുടെ വിശേഷങ്ങൾ ടീച്ചറുമ്മാരോട് പറയുന്നത് എനിക്ക് കേൾക്കാമായിരുന്നു, എന്നെ ചേർന്നു നിന്ന മീനാക്ഷിയെ നോക്കിയൊന്നു ചിരിച്ചിട്ട് ധൈര്യമായി ആ ഫോമിലെ ജോലിയുടെ സ്‌ഥാനത്തു ഞാൻ എഴുതി "തിരക്കഥാകൃത്ത്" എന്നുമായിരുന്നു അഭിലാഷിന്റെ കുറിപ്പ്.

നിരവധി പേരായിരുന്നു പോസ്റ്റിന് താഴെയായി അഭിപ്രായങ്ങള്‍ രേഖപ്പെടുത്തിയത്. നിങ്ങള്‍ തിരക്കഥാകൃത്താവാന്‍ തീരുമാനിച്ചിട്ടുണ്ടെങ്കില്‍ വൈകിയാണെങ്കിലും തിരക്കുള്ള തിരക്കഥാകൃത്തായി മാറും. ഓരോ വരികള്‍ വായിക്കുമ്പോഴും മനസ് വിങ്ങുന്നു, സിനിമ സ്വപ്‌നം കണ്ട് അലഞ്ഞ് നടക്കുന്ന അവസ്ഥയൊക്കെ മനസിലാവുമെന്നായിരുന്നു ഒരാള്‍ കമന്റ് ചെയ്തത്.