ഈ സിനിമയുടെ തിരക്കഥയില്‍ ഞാന്‍ അച്ഛനൊപ്പം ഉണ്ടായിരുന്നു; ഉദയനാണ് താരത്തെ കുറിച്ച് വിനീത് ശ്രീനിവാസന്‍

മലയാളത്തിന്റെ പ്രിയപ്പെട്ട നടനും തിരക്കഥാകൃത്തുമായ ശ്രീനിവാസന്‍ ഓര്‍മയായിട്ട് ഒരു മാസം പിന്നിടുന്നു. നടന്റെ നാല്‍പതാം ചരമദിനത്തോടനുബന്ധിച്ച് ഭാര്യയും മക്കളും മരുമക്കളും കൊച്ചുമക്കളും ഓള്‍ഡേജ് ഹോമിലെത്തിയ വിശേഷങ്ങള്‍ കഴിഞ്ഞ ദിവസം പുറത്തുവന്നിരുന്നു. ശ്രീനിവാസന് ഏറ്റവും ഇഷ്ടമുള്ള കാര്യങ്ങളില്‍ ശ്രദ്ധ കേന്ദ്രീകരിക്കുന്നതാണ് കുടുംബത്തിന് ഇപ്പോള്‍ ലഭിക്കുന്ന ആശ്വാസം. അതിന് പിന്നാലെ ഇതാ ശ്രീനിവാസന്റെ ഏറ്റവും മികച്ച സിനിമകളിലൊന്നായ ഉദയനാണ് താരത്തിന്റെ റീ - റിലീസും വരുന്നു.

ശ്രീനിവാസന്‍ തിരക്കഥ എഴുതി റോഷന്‍ അന്‍ഡ്രൂസ് സംവിധാനം ചെയ്ത ചിത്രത്തിലെ പ്രധാന വേഷത്തിലെത്തിയത് ശ്രീനിവാസനും മോഹന്‍ലാലുമാണ്. സിനിമയ്ക്കുള്ളിലെ സിനിമയെ കുറിച്ച് പറഞ്ഞ ഉദയനാണ് താരം എന്ന സിനിമ ഫെബ്രുവരി 6 ന് വീണ്ടും തിയേറ്ററിലെത്തുകയാണ്. ചിത്രത്തെ കുറിച്ചുള്ള തന്റെ ഓര്‍മ പങ്കുവയ്ക്കുകയാണിപ്പോള്‍ മകന്‍ വിനീത് ശ്രീനിവാസന്‍ . ശ്രീനിവാസന്റെ മരണത്തിന് ശേഷം വിനീതിന്റേതായി ആദ്യമായി പുറത്തുവരുന്ന വീഡിയോ കൂടെയാണിത്.

Also Read: ഒന്നര വര്‍ഷത്തെ ഗ്യാപ്പില്‍ രണ്ട് ചേട്ടന്മാര്‍ മരിച്ചു, അച്ഛനില്ലാത്ത ചെറുപ്പകാലം; കഷ്ടപ്പെട്ട് മുന്നേറി വന്നതാണെന്ന് ഐശ്വര്യ രാജേഷ്

അച്ഛന്‍ തിരക്കഥ എഴുതിയ ഉദയനാണ് താരം എന്ന സിനിമ 21 വര്‍ഷം മുന്‍പാണ് റിലീസ് ചെയ്തത്. റോഷന്‍ ആന്‍ഡ്രൂസ് എന്ന സംവിധായകന്റെ ആദ്യത്തെ സിനിമയായിരുന്നു അത്. റോഷന്‍ ചേട്ടനും അച്ഛനും തമ്മിലുള്ള ആദ്യത്തെ കൂടിക്കാഴ്ചയുടെ സമയത്ത് ഞാനും അച്ഛനൊപ്പം ഉണ്ടായിരുന്നു. ഈ സിനിമയുടെ തിരക്കഥ അച്ഛനെഴുതുന്ന സമയത്ത് പലപ്പോഴും ഞാന്‍ അച്ഛന്റെ കൂടെ തന്നെയായിരുന്നു. എനിക്ക് പേഴ്‌സണലി ഒരുപാട് അറ്റാച്ച്‌മെന്റുള്ള സിനിമയാണ്, ഇതിലെ കരളേ കരളിന്റെ കരളേ എന്ന പാട്ടാണ് പിന്നണി ഗായകന്‍ എന്ന രീതിയില്‍ എന്നെ ആളുകള്‍ അറിഞ്ഞു തുടങ്ങിയത്.

21 വര്‍ഷത്തിന് ശേഷം കരുണന്‍ അങ്കിള്‍ (ചിന്താവിഷ്ടയായ ശ്യാമളയുടെ കൂടെ പ്രൊഡ്യൂസറായ കാള്‍ട്ടണ്‍ കരുണാകരന്‍) നിര്‍മിച്ച സിനിമ റീ റിലീസ് ചെയ്യുകയാണ്. ഇതിന് എന്റെ എല്ലാവിധ ആശംസകളും നേരുന്നു, എല്ലാവരും തിയേറ്ററില്‍ പോയി ഈ സിനിമ കാണുക. സിനിമയ്ക്കുള്ളിലെ സിനിമ ചര്‍ച്ച ചെയ്യുന്ന ഒരു സിനിമയാണ്. റോഷന്‍ ചേട്ടനും കരുണന്‍ അങ്കിളിനും സംഗീത സംവിധായകനായ ദീപക്കേട്ടനും എല്ലാവര്‍ക്കും എന്റെ ആശംസകള്‍. ഉദയനാണ് താരം എന്ന സിനിമ ഒരിക്കല്‍ കൂടെ ജനങ്ങളിലേക്ക് എത്തുന്നു എന്നറിയുന്നതില്‍ ഒരുപാട് സന്തോഷം- വിനീത് ശ്രീനിവാസന്‍ പറഞ്ഞു.