ഉപഹാരമായി മുഖ്യമന്ത്രി കൊടുത്തത് വിഗ്രഹം, വേദിയിൽ ഷൂസഴിച്ച് സച്ചിൻ; പുകഴ്ത്തി ആരാധകർ– വിഡിയോ വൈറൽ

വിശാഖപട്ടണം.∙ ക്രിക്കറ്റിലെ ‘ദൈവം’ ആണ് സച്ചിൻ തെൻഡുൽക്കർ. 1989ൽ തന്റെ പതിനാറാം വയസ്സിൽ രാജ്യാന്തര ക്രിക്കറ്റിൽ അരങ്ങേറ്റം കുറിച്ച ‘മാസ്റ്റർ ബ്ലാസ്റ്റർ’, 24 വർഷം നീണ്ടുനിന്ന തന്റെ കരിയറിൽ എത്തിപ്പിടിക്കാത്ത റെക്കോർഡുകൾ കുറവാണ്. മൈതാനത്തും കളത്തിനു പുറത്തും സച്ചിൻ പുലർത്തുന്ന മാന്യതയും അനുകരണീയമാണ്.

സച്ചിന്റെ ലാളിത്യം ഒരിക്കൽകൂടി വെളിവാക്കുന്ന ഒരു വിഡിയോയാണ് ഇപ്പോൾ സമൂഹമാധ്യമങ്ങളിൽ വൈറൽ. വിശാഖപട്ടണത്ത് നടന്ന ആന്ധ്ര സർവകലാശാലയുടെ ശതാബ്ദി ആഘോഷങ്ങളിൽ വിശിഷ്ടാതിഥിയായി പങ്കെടുക്കാനെത്തിയപ്പോഴാണ് സംഭവം.

ചടങ്ങിനിടെ ആന്ധ്രപ്രദേശ് മുഖ്യമന്ത്രി എൻ. ചന്ദ്രബാബു നായിഡു, സച്ചിൻ തെൻഡുൽക്കർക്ക് വെങ്കിടേശ്വര സ്വാമിയുടെ വിഗ്രഹം ഉപഹാരമായി സമ്മാനിച്ചു. വിഗ്രഹം സ്വീകരിക്കുന്നതിന് മുൻപ്, ബഹുമാനസൂചകമായി ക്രിക്കറ്റ് ഇതിഹാസം തന്റെ ഷൂസ് അഴിച്ചുമാറ്റുകയും ഭക്തിയോടെ വണങ്ങുകയുമായിരുന്നു. ഈ ദൃശ്യങ്ങൾ സമൂഹമാധ്യമങ്ങളിൽ പെട്ടെന്ന് വൈറലായി. തെൻഡുൽക്കറുടെ വിനയത്തെയും മര്യാദയെയും പ്രശംസിച്ചുകൊണ്ട് ഒട്ടേറെ പ്രതികരണങ്ങൾ ഉണ്ടായി.

അതേസമയം, ഏപ്രിൽ 24നാണ് തെൻഡുൽക്കർ തന്റെ 53-ാം ജന്മദിനം ആഘോഷിച്ചത്. വെസ്റ്റിൻഡീസ് ബാറ്റിഹ് ഇതിഹാസം ബ്രയാൻ ലാറ ഉൾപ്പെടെയുള്ളവർ സച്ചിന് ജന്മദിനാശംസ നേർനന്നു.