ഋഷഭ് പന്തിന് വേണ്ടി മെഗാ ലേലത്തിൽ ബിഡ് ചെയ്തത് ഈ മൂന്ന് ടീമുകൾ മാത്രം; ഇക്കുറി വൻ ഫ്ലോപ്പായി താരം

Curated byഗോകുൽ എസ് | Samayam Malayalam | Updated: 5 May 2025, 3:30 pm

ഐപിഎൽ ചരിത്രത്തിലെ എക്കാലത്തെയും വിലപിടിപ്പുള്ള കളിക്കാരനാണ് ഋഷഭ് പന്ത്. ഇന്ത്യയുടെ യുവ വിക്കറ്റ് കീപ്പർ ബാറ്ററായ പന്തിനെ ഇക്കഴിഞ്ഞ ഐപിഎൽ മെഗാ ലേലത്തിൽ നിന്ന് 27 കോടി രൂപക്ക് ലക്നൗ സൂപ്പർ ജയന്റ്സ് സ്വന്തമാക്കുകയായിരുന്നു. ടീമിലെത്തിച്ച പന്തിനെ പുതിയ ക്യാപ്റ്റനായി ലക്നൗ പ്രഖ്യാപിക്കുകയും ചെയ്തു. എന്നാൽ ഞെട്ടിക്കുന്ന തുകക്ക് ഐപിഎൽ കരാർ ലഭിച്ച പന്ത് ഈ സീസണിൽ വൻ ഫ്ലോപ്പാകുന്നതാണ് ക്രിക്കറ്റ് ലോകം കണ്ടത്. സീസണിൽ ഇതുവരെ കളിച്ച 10 ഇന്നിങ്സുകളിൽ നിന്ന് 128 റൺസ് മാത്രമാണ് താരത്തിന് നേടിയത്.അതേ സമയം ഐപിഎല്ലിലെ ഏറ്റവും വിലയേറിയ താരമെന്ന ലേബലിൽ കളിക്കുന്നത് ഋഷഭ് പന്തിന് വലിയ സമ്മർദ്ദം സമ്മാനിക്കുന്നുണ്ട് എന്ന് വ്യക്തം. കഴിഞ്ഞ സീസണ് ശേഷം ഡെൽഹി ക്യാപിറ്റൽസ് റിലീസ് ചെയ്തതോടെയാണ് പന്ത് മെഗാ ലേലത്തിലേക്ക് വന്നതും അവസാനം ഞെട്ടിക്കുന്ന തുകക്ക് ലക്നൗ സൂപ്പർ ജയന്റ്സിലേക്ക് എത്തിയതും. അതേ സമയം മെഗാ ലേലത്തിൽ ആകെ മൂന്ന് ടീമുകൾ മാത്രമാണ് പന്തിനായി ബിഡ് ചെയ്തത്. ഡെൽഹി ആർടിഎമ്മിനായും ശ്രമിച്ചു. അതായത് താരത്തെ സ്വന്തമാക്കാൻ രംഗത്തുണ്ടായിരുന്നത് നാല് ടീമുകൾ മാത്രം.


രണ്ട് കോടി രൂപ അടിസ്ഥാന വിലയുണ്ടായിരുന്ന ഋഷഭ് പന്തിന് വേണ്ടി ലക്നൗ സൂപ്പർ ജയന്റ്സും, റോയൽ ചലഞ്ചേഴ്സ് ബംഗളൂരുവുമാണ് ലേലം വിളിച്ചു തുടങ്ങിയത്. അതിവേഗം താരത്തിന്റെ വില 11 കോടിയിലെത്തി‌. ഇതിന് ശേഷമാണ് സൺ റൈസേഴ്സ് ഹൈദരാബാദ് താരത്തിനായി രംഗത്ത് എത്തിയത്. പന്തിനായി 20.5 കോടി രൂപ വരെ ഹൈദരാബാദ് വിളിച്ചു. എന്നാൽ ലക്നൗ 20.75 കോടി രൂപക്ക് താരത്തിനായി പാഡിൽ ഉയർത്തി.

ഈ സമയം ഡെൽഹി ക്യാപിറ്റൽസ് താരത്തിനായി ആർടിഎം ഓപ്ഷൻ ഉപയോഗിച്ചു. എന്നാൽ ലക്നൗ സൂപ്പർ ജയന്റ്സാകട്ടെ ക്രിക്കറ്റ് ലോകത്തെ മുഴുവൻ ഞെട്ടിച്ചുകൊണ്ട് താരത്തെ 27 കോടി രൂപക്ക് ബിഡ് ചെയ്യുകയും ഐപിഎൽ ചരിത്രത്തിലെ ഏറ്റവും വിലപിടിപ്പുള്ള കളിക്കാരനായി പന്ത് മാറുകയുമായിരുന്നു.

അതേ സമയം വമ്പൻ പ്രൈസ് ടാഗിന്റെ സമ്മർദ്ദം ഈ സീസണിൽ ഋഷഭ് പന്തിന്റെ പ്രകടനങ്ങളെയും പ്രതികൂലമായി ബാധിക്കുന്നുണ്ട്. ഇത്തവണ അവസാനം കളിച്ച 10 കളികളിൽ 18, 4, 0, 3, 63, 21, 2, 2, 15 എന്നിങ്ങനെയാണ് പന്തിന്റെ സ്കോറുകൾ.