എന്നെക്കാള്‍ രണ്ട് വയസ്സിന് ചെറുപ്പമായിരുന്നു അവന്‍, എന്റെ വലം കൈയ്യാണ് നഷ്ടപ്പെട്ടത്; നവാസിന്റെ ഓര്‍മയില്‍ നിയാസ്

കലാഭവന്‍ നവാസ് മരണപ്പെട്ടിട്ട് ഒരു ആണ്ട് തികയുന്നു. ഇപ്പോഴും വിശ്വസിക്കാന്‍ കഴിയാത്ത ഒരു മരണ വാര്‍ത്തയായിരുന്നു അത്. മറ്റ് ആരോഗ്യ പ്രശ്‌നങ്ങളൊന്നുമില്ലാത്ത ആളായിരുന്നു. സിനിമ ഷൂട്ടിങിന് വേണ്ടി ചോറ്റാനിക്കരയില്‍ എത്തിയതാണ്. രാത്രി ഭാര്യയെയും മക്കളെയും എല്ലാം വിളിച്ച് സംസാരിച്ചതാണ്. പിന്നേറ്റ് ഉണര്‍ന്നില്ല. സ്വകാര്യ ആശുപത്രിയില്‍ എത്തിയപ്പോഴേക്കും മരണം സ്ഥിരീകരിച്ചു. ആ നോവുന്ന ഓര്‍മകള്‍ക്ക് ഒരാണ്ട് തികയുന്നു. സഹോദരന്റെ ഓര്‍മ ദിവസം അവനെ പ്രാര്‍ത്ഥനകളില്‍ ഉള്‍പ്പെടുത്തണം എന്ന് പറഞ്ഞുകൊണ്ട് ഇമോഷണലായ പോസ്റ്റുമായി എത്തിയിരിക്കുകയാണ് സഹോദരന്‍ നിയാസ് ബക്കര്‍

നിയാസ് ബക്കറിന്റെ ഫേസ്ബുക്ക് പോസ്റ്റ്

ഞങ്ങളുടെ നവാസ് വിട വാങ്ങിയിട്ട് ഇന്നേയ്ക്ക് ഒരു വര്‍ഷം തികയുകയാണ്. എനിക്ക് നഷ്ടപ്പെട്ടു പോയത് ഒരു അനുജന്‍ മാത്രമല്ല. എന്നേക്കാള്‍ രണ്ട് വയസിനു മാത്രം വ്യത്യാസമുള്ള അവന്‍ എനിക്കൊരു കളിക്കൂട്ടുകാരന്‍ കൂടിയായിരുന്നു. അല്പം കൂടി മുതിര്‍ന്നപ്പോള്‍ തൊഴില്‍ രംഗത്തും ഒരു സഹപ്രവര്‍ത്തകനായി കൂടെത്തന്നെയുണ്ടായിരുന്നു.

കാവ്യ മാധവന്റെ ഓണാഘോഷം തുടങ്ങി; സാരിയിലല്ല കണ്ട്, കാവ്യയുടെ സൗന്ദര്യത്തില്‍ തന്നെയാണ്!
കുടുംബവുമായി ബന്ധപ്പെട്ട ഏത് കാര്യങ്ങള്‍ക്കും തീരുമാനമെടുക്കുമ്പോള്‍ എന്റെ ബലം നവാസും നിസാമുമായിരുന്നു. എന്റെ വലം കൈ ആണ് പോയത്. മരണം സര്‍വ്വേശ്വരന്റെ സുനിശ്ചിതമായ തീരുമാനമാണല്ലോ അതുമായി പൊരുത്തപ്പെടലല്ലാതെ നിസാരരായ നമുക്ക് മറ്റു വഴികളില്ല.

ഉമ്മച്ചിയുടെ ശരീരത്തില്‍ നിന്നും ഞങ്ങളെ വേര്‍പ്പെടുത്തിയതിന്റെ അടയാളങ്ങള്‍ എന്റേയും നവാസിന്റെയും നിസാമിന്റെയും അടിവയറിനു മുകളില്‍ ഒരു പൊക്കിള്‍കുഴിയായി സര്‍വ്വശക്തന്‍ അടയാളപ്പെടുത്തിയിട്ടുണ്ട്. എത്ര മായ്ച്ചാലും മായ്ക്കാന്‍ കഴിയാത്ത അടയാളങ്ങള്‍.മണ്ണോടു ചേരും വരെയും ആ അടയാളത്തിന്റെ അടിവേരുകള്‍ ഹൃദയത്തിലേയ്ക്ക് ആഴ്ന്നിറങ്ങി നില്‍ക്കും. അത് തിരിച്ചറിയിക്കാന്‍ കൂടെപ്പിറന്നവര്‍ക്ക് പ്രകടനപരമായി ഒന്നും ചെയ്യേണ്ടതില്ല. ചെയ്യുകയുമില്ല. തിരഞ്ഞു വരുന്നവര്‍ക്ക് ബന്ധത്തിന്റെ തീവ്രത സൂചിപ്പിക്കാന്‍ അതിലും വലിയ അടയാളങ്ങള്‍ ഉണ്ടെന്ന് ഞാന്‍ വിശ്വസിക്കുന്നില്ല.തിരിച്ചറിവ് മാത്രം മതി.

മക്കള്‍ നഷ്ടപ്പെട്ട അമ്മമാര്‍ക്കും. കൂടപ്പിറപ്പുകള്‍ നഷ്ടപ്പെട്ട സഹോദരങ്ങള്‍ക്കും. നഷ്ടപ്പെട്ടവര്‍ നമുക്കൊപ്പമുണ്ടെന്ന ബോധ്യപ്പെടുത്തലിന്റെ ഈ ആശ്വാസക്കുറിപ്പല്ലാതെ മറ്റൊന്നും എനിക്കിന്ന് നല്‍കാനില്ല.

പ്രിപ്പെട്ടവരുടെ പ്രാര്‍ത്ഥനയില്‍ അവനെപ്പോഴും ഉണ്ടാകാറുണ്ട്. എങ്കിലും ഓര്‍മ്മപ്പെടുത്തുകയാണ് ഇന്നാണ് നമ്മുടെ നവാസ് മരണപ്പെട്ടിട്ട് ഒരു വര്‍ഷം തികയുന്നത്. ഇന്നത്തെ പ്രാര്‍ത്ഥനയില്‍ അവനെ പ്രത്യേകം ഓര്‍ക്കുമല്ലോ- എന്നാണ് നിയാസിൻറെ പോസ്റ്റ്

കോട്ടയം നസീർ അടക്കമുള്ളവർ നവാസിൻറെ ഓർമ ദിനത്തിൽ സോഷ്യൽ മീഡിയ പോസ്റ്റുമായി എത്തിയിട്ടുണ്ട്. ഒരു വർഷം കടന്ന് പോയതേ അറിയുന്നില്ല എന്ന് കോട്ടയം നസീർ പങ്കുവയ്ക്കുന്നു