എന്റെ നായികയായി അഭിനയിക്കില്ല എന്ന് പറഞ്ഞില്ലേ എന്ന് ടിനി ടോം; അതെ ഞാന്‍ പറഞ്ഞു, എനിക്ക് എന്റെ കരിയറും നോക്കണം എന്ന് പ്രിയാമണി

Authored byഅശ്വിനി പി | Samayam Malayalam | Updated: 8 Apr 2025, 4:25 pm

Samayam Malayalamപ്രിയമണി | ടിനി ടോം

മലയാള സിനിമയിലും മറ്റ് സൗത്ത് ഇന്ത്യന്‍ സിനിമകളിലും മാത്രമല്ല, അങ്ങ് ബോളിവുഡ് സിനിമാ ലോകത്തും തന്റെ സാന്നിധ്യം അറിയിച്ച നടിയാണ് പ്രിയാമണി. ദേശീയ പുരസ്‌കാര ജേതാവായ നടി സിനിമകള്‍ സെലക്ട് ചെയ്യുന്ന കാര്യത്തിലും വളരെ അധികം ശ്രദ്ധിയ്ക്കും. അതുകൊണ്ട് തന്നെ പല സിനിമകള്‍ക്കും നോ പറഞ്ഞിട്ടുണ്ട്. അക്കൂട്ടത്തിലൊരു സിനിമയാണ് ടിനി ടോം നായകനായ ഓടും രാജ ആടും റാണി എന്ന സിനിമയും

ജെബി ജംഗ്ഷന്‍ എന്ന ഷോയില്‍ പ്രിയാമണി അതിഥിയായി വന്നപ്പോള്‍, എല്‍ഇടി സ്‌ക്രീനില്‍ ചോദ്യവുമായി ടിനി ടോമും എത്തിയിരുന്നു. ഈ സിനിമയില്‍ അഭിനയിക്കുന്നതിനായി ആദ്യം പരിഗണിച്ചിരുന്നത് പ്രിയാമണിയെ ആയിരുന്നു. കഥ പ്രിയയ്ക്ക് ഇഷ്ടമായി, പ്രതിഫലത്തിന്റെയും മറ്റ് കാര്യങ്ങളിലും പ്രിയ ഓകെയായിരുന്നു. അതിന് ശേഷമാണ് നായകന്‍ താനാണ് എന്നറിഞ്ഞത്. അതിന് ശേഷം ആലോചിച്ചിട്ട് പറയാം എന്ന് പറഞ്ഞ പ്രിയ, രണ്ട് മണിക്കൂറിന് ശേഷം 'ടിനി ടോമിന്റെ നായികയായി അഭിനയിക്കാന്‍ കഴിയില്ല' എന്ന് സംവിധായകന് മെസേജ് അയച്ചു.

Also Read: അതില്‍ എന്താണ് ഇത്ര വൃത്തികേട്? പൃഥ്വിരാജിനൊപ്പം ചെയ്ത ഇന്റിമേറ്റ് രംഗത്തെ കുറിച്ച് നവ്യ; അത്രയധികം കരഞ്ഞിരിക്കുമ്പോഴാണ് അത് ചെയ്തത്

സുരാജ് വെഞ്ഞാറമൂടിന്റെ എന്റെ സത്യാന്വേഷണ പരീക്ഷണങ്ങള്‍ എന്ന ചിത്രത്തിലേക്ക് വിളിച്ചപ്പോഴും ഇതേ അനുഭവമാണെന്ന് സുരാജ് വെഞ്ഞാറമൂട് പറഞ്ഞ് അറിയാം. അങ്ങനെയാണെങ്കില്‍ എന്താണ് പ്രിയാമണിയുടെ നായകനാകാനുള്ള മാനദണ്ഡങ്ങള്‍ എന്നായിരുന്നു ടിനി ടോമിന്റെ ചോദ്യം. അതെ ഞാന്‍ അങ്ങനെ മെസേജ് അയച്ചു എന്ന് പറഞ്ഞ പ്രിയാമണി അക്കാര്യം വളരെ വ്യക്തമാക്കുകയും ചെയ്യുന്നുണ്ട്.

സുരാജ് വെഞ്ഞാറമൂടിന്റെ സിനിമയുടെ കാര്യം എനിക്കറിയില്ല, കഥയോ കഥാപാത്രങ്ങളാരാണോ എന്ന് പോലും എനിക്കറിയില്ലായിരുന്നു. ചാനലുകളില്‍ നിന്ന് വിളിച്ച് ചോദിച്ചപ്പോഴാണ് ഞാന്‍ അറിഞ്ഞത് തന്നെ. ടിനി ടോം ചിത്രത്തിന്റെ കഥ ഞാന്‍ കേട്ടു, ചിലതൊക്കെ എനിക്ക് ഇഷ്ടക്കുറവ് ഉണ്ടായിരുന്നെങ്കിലും ഓകെയായിരുന്നു. പക്ഷേ നായകന്‍ ടിനി ടോം ആണ് എന്നറിഞ്ഞപ്പോള്‍ ഞാന്‍ അമ്മയോടും എന്റെ മാനേജരോടും കാര്യം ഡിസ്‌കസ് ചെയ്തു.


ടിനി ടോമിനൊപ്പം പ്രാഞ്ചിയേട്ടന്‍ എന്ന ചിത്രത്തില്‍ ഞാന്‍ അഭിനയിച്ചിട്ടുണ്ട്. അദ്ദേഹം കഴിവുള്ള നടനുമാണ്. അതേ സമയം അദ്ദേഹത്തോടുള്ള എല്ലാ ബഹുമാനത്തോടുകൂടെയും പറയുന്നു, ആ സമയത്ത് അദ്ദേഹത്തിന് സോ കോള്‍ഡ് മുന്‍നിര നായകന്മാരുടെ താരമൂല്യമില്ല. മോഹന്‍ലാല്‍ മമ്മൂട്ടി തുടങ്ങിയ നായകന്മാര്‍ക്കൊപ്പം അഭിനയിക്കുന്ന, ദേശീയ പുരസ്‌കാരം നേടിയ പ്രിയാമണി എന്തുകൊണ്ട് ടിനി ടോമിന്റെ നായികയാകുന്നു എന്ന ചോദ്യം മാധ്യമങ്ങളില്‍ നിന്ന് ഞാന്‍ നേരിടേണ്ടി വരും. അത് മാത്രമല്ല, ആ സിനിമ വിജയമാണെങ്കില്‍ സാരമില്ല, പക്ഷേ പരാജയപ്പെട്ടാല്‍ അത് നായികയിലേക്ക് വീഴും. ഇവിടെ ഒരു സിനിമ പരാജയപ്പെട്ടാല്‍ ഒരു മുന്‍നിര നായകനും പടമില്ലാതെ വീട്ടിലിരിക്കില്ല, പക്ഷേ നായികമാരുടെ കാര്യം അങ്ങനെയല്ല. എനിക്ക് എന്റെ കാരിയറും നോക്കണമല്ലോ- പ്രിയമണി വ്യക്തമാക്കി.