ഐപിഎൽ 2025 കിരീടം ഉറപ്പിക്കാൻ ആർസിബിയുടെ പടയൊരുക്കം; ഓസ്‌ട്രേലിയൻ സൂപ്പർ താരങ്ങൾ തിരിച്ചെത്തും

ഐപിഎൽ 2025 സീസണിൽ പ്ലേ ബോൾഡ് എന്ന മുദ്രാവാക്യവുമായി എത്തിയ ടീം ആണ് റോയൽ ചലഞ്ചേഴ്‌സ് ബെംഗളൂരു (ആർസിബി). ആ വാക്കുകളോട് 100 ശതമാനം ആത്മാർത്ഥത പുലർത്തിയാണ് ആർസിബി താരങ്ങൾ ഈ സീസണിൽ കളിക്കുന്നതും. അത് അവരെ തുടക്കം മുതലേ പോയിന്റ് ടേബിളിൽ ആദ്യ നാലിലൊന്നാകാൻ സഹായിക്കുകയും ചെയ്തു.
അടുത്ത മത്സരത്തിൽ സഞ്ജു ഉണ്ടാകും? ആരാധകരെ ആവേശത്തിലാക്കി സഞ്ജുവിന്റെ പരിക്കിനെ കുറിച്ച് നിർണായക സൂചന നൽകി റോയൽസ്;
ഇന്ത്യ പാക് സംഘർഷത്തെ തുടർന്ന് ഐപിഎൽ 2025 നിർത്തിവെക്കും എന്ന വാർത്തകൾ വന്നപ്പോൾ ഒരുപക്ഷെ ഏറ്റവും കൂടുതൽ നിരാശയിൽ ആയത് ആർസിബി ആരാധകർ ആയിരിക്കും. ഈ വർഷം കിരീടം സ്വന്തമാക്കും എന്ന് ഉറപ്പിച്ചുകൊണ്ടുള്ള ആർസിബിയുടെ യാത്ര തന്നെയായിരുന്നു ആരാധകരെ നിരാശാലാഴ്ത്തിയതിന്റെ പ്രധാനകാരണം.

എന്നാൽ ഐപിഎൽ 2025 പുനരാരംഭിക്കുന്നതോടെ ആർസിബി വീണ്ടും കിരീടം ലക്ഷ്യം വെച്ചുള്ള യാത്ര ആരംഭിക്കുകയാണ്. അതേസമയം ഐപിഎൽ ഒരാഴ്ചത്തേക്ക് നിർത്തിവെച്ചതോടെ നാട്ടിലേക്ക് മടങ്ങിയ ചില വിദേശ താരങ്ങൾ പുനരാരംഭിക്കുമ്പോൾ തിരിച്ചെത്തില്ല എന്ന വാർത്തകൾ വന്നിരുന്നു. പ്രധാനമായും ഓസ്‌ട്രേലിയൻ താരങ്ങൾ. ഇത് കിരീടമെന്ന ആർസിബിയുടെ പ്രതീക്ഷക്ക് മങ്ങലേൽപ്പിക്കുന്നതാണ്. എന്നാൽ ഇപ്പോഴിതാ ആർസിബി ആരാധകർക്ക് സന്തോഷം നൽകുന്ന ഒരു റിപ്പോർട്ട് പുറത്തുവന്നിരിക്കുകയാണ്. ആർസിബിയുടെ വിദേശ സൂപ്പർ താരം ജോഷ് ഹേസൽവുഡ് തിരിച്ചെത്തുകയാണ്.

ഇന്ത്യയും പാകിസ്ഥാനും തമ്മിലുള്ള സൈനിക സംഘർഷങ്ങൾ കാരണം ഐപിഎൽ താൽക്കാലികമായി നിർത്തിവയ്ക്കുന്നതിന് മുമ്പ് തന്നെ ജോഷ് ഹേസൽവുഡ് പരിക്കിനെ തുടർന്ന് വിശ്രമത്തിലായിരുന്നു. തോളിനേറ്റ പരിക്കിനെ തുടർന്ന് അദ്ദേഹത്തിന് ചില കളികൾ നഷ്ടപ്പെട്ടു. മാത്രവുമല്ല ഡബ്ല്യുടിസി ഫൈനൽ മത്സരത്തിൽ ഓസ്‌ട്രേലിയയ്ക്കായി കളിക്കേണ്ടതും ഉണ്ട്. ഇതെല്ലം കൊണ്ടുതന്നെ ജോഷ് ഹേസൽവുഡ് റെഡ് ആർമിയിലേക്ക് തിരിച്ചെത്തുമോ എന്ന ആശങ്ക നിലനിന്നിരുന്നു.

ബോർഡർ - ഗവാസ്‌കർ ട്രോഫി, ശ്രീലങ്കയിൽ നടന്ന ടെസ്റ്റ് പരമ്പര, ഈ വർഷം ആദ്യം നടന്ന ഐസിസി ചാമ്പ്യൻസ് ട്രോഫി എന്നിവയിൽ നിന്ന് എല്ലാം പരിക്കിനെ തുടർന്ന് ജോഷ് ഹേസൽവുഡിന് നഷ്ടമായിരുന്നു. കാലിനേറ്റ പരിക്ക് കാരണം ദീർഘകാലം ചികിത്സയിലായിരുന്ന താരം തിരിച്ച് മൈതാനത്തേക്ക് എത്തുന്നത് ഐപിഎൽ 2025 ൽ ആർസിബിയ്ക്കായി മൈതാനത്ത് ഇറങ്ങിക്കൊണ്ടാണ്.

ഡബ്ല്യുടിസി ഫൈനൽ മനസ്സിൽ വെച്ചുകൊണ്ട്, അദ്ദേഹം വീണ്ടും കളിക്കളത്തിലേക്ക് വരണോ വേണ്ടയോ എന്ന കാര്യത്തിൽ തീരുമാനമെടുക്കേണ്ടതായിരുന്നു. റെഡ് ആർമിക്കുവേണ്ടി 10 മത്സരങ്ങളിൽ നിന്ന് 18 വിക്കറ്റുകൾ വീഴ്ത്തിയ 34 കാരനായ ഹേസൽവുഡ് ആർസിബിക്കുവേണ്ടി വീണ്ടും കളിക്കളത്തിലേക്ക് തിരിച്ചെത്തുമെന്ന് റിപ്പോർട്ട്.

"അതെ, ജോഷ് ഇന്ത്യയിലേക്ക് പോകും. അദ്ദേഹം എത്തുന്ന കൃത്യമായ തീയതിയെക്കുറിച്ച് ഞങ്ങൾ അധികാരികളുമായി ചർച്ച നടത്തിവരികയാണ്," ഹേസൽവുഡിനോട് അടുത്ത വൃത്തങ്ങളെ ഉദ്ധരിച്ച് ഹിന്ദുസ്ഥാൻ ടൈംസ് റിപ്പോർട്ട് ചെയ്‌തു.

ഐ‌പി‌എല്ലിനായി ഇന്ത്യയിലേക്ക് മടങ്ങാൻ ആഗ്രഹിക്കുന്ന കളിക്കാർക്ക് പൂർണ്ണ പിന്തുണ നൽകുമെന്ന് ക്രിക്കറ്റ് ഓസ്‌ട്രേലിയയും പ്രഖ്യാപിച്ചു.

"ശനിയാഴ്ച ഐ‌പി‌എൽ പുനരാരംഭിക്കുമെന്ന പ്രഖ്യാപനത്തെത്തുടർന്ന്, ഇന്ത്യയിലേക്ക് മടങ്ങണോ വേണ്ടയോ എന്ന കളിക്കാരുടെ വ്യക്തിഗത തീരുമാനങ്ങളിൽ ക്രിക്കറ്റ് ഓസ്‌ട്രേലിയ പിന്തുണയ്ക്കും," എന്നും റിപ്പോർട്ടിൽ പറയുന്നു.

അതേസമയം മെയ് 17ന് ആർ‌സി‌ബി കൊൽക്കത്ത നൈറ്റ് റൈഡേഴ്സിനെ നേരിടുന്നതോടെ ഐ‌പി‌എൽ പുനരാരംഭിക്കും. ഈ മത്സരത്തിൽ ആർസിബി ജയം സ്വന്തമാക്കുന്നതോടെ വീണ്ടും പോയിന്റ് ടേബിളിൽ ഒന്നാം സ്ഥാനത്തേക്ക് ആർസിബി എത്തും. ഈ മത്സരത്തിൽ ഹേസൽവുഡ് ഉണ്ടാകുമെന്നാണ് ഇപ്പോൾ ലഭിക്കുന്ന സൂചന.

സീസണിൽ കൊൽക്കത്തയോടുള്ള മത്സരം ഉൾപ്പടെ 3 മത്സരങ്ങളാണ് ആർസിബയ്ക്ക് ഇനി ബാക്കിയുള്ളത്. ഈ മൂന്ന് മത്സരങ്ങളിലും ജയം സ്വന്തമാക്കിയത് ടേബിൾ ടോപ്പിൽ ഒന്നാമതായി പ്ലേ ഓഫ് ഉറപ്പിക്കാൻ.