ഒന്നുമില്ല, സ്നേഹം മാത്രം, ഞങ്ങളുടെ മകളുണ്ടല്ലോ, അതു മതി; കേറ്റി പെറിയുമായുള്ള വേർപിരിയലിനെ കുറിച്ച് ഒർലാന്റോ ബ്ലൂം പറഞ്ഞത്

Authored by: അശ്വിനി പി|Samayam Malayalam•8 Sept 2025, 3:20 pm

കഴിഞ്ഞ കുറച്ച് മാസങ്ങളായി ഹോളിവുഡിൽ ഏറെ ചർച്ചയായ ഒരു വേർപിരിയൽ ആയിരുന്നു കേറ്റി പെറിയുടെയും ഓർലാന്റോ ബ്ലൂമിന്റെയും. ഒൻപത് വർഷത്തെ ബന്ധം ഇരുവരും വിവാഹത്തിന് മുൻപേ വേർപിരിയുകയായിരുന്നു. ഇടയിൽ പലപ്പോഴും അസ്വരസ്യങ്ങൾ ഉണ്ടായിരുന്നുവെങ്കിലും, ബന്ധം നല്ല രീതിയിൽ പോയി, ഒരു മകളും പിറന്നു. ആറ് വർഷം മുൻപ് വിവാഹ നിശ്ചയം കഴിഞ്ഞിരുന്നുവെങ്കിലും, വിവാഹത്തിലേക്ക് കടക്കാതെ ലിവിങ് റിലേഷനിൽ തന്നെയായിരുന്നു നടൻ ഒർലാന്റോ ബ്ലൂമും പോപ് ഗായിക കേറ്റി പെറിയും

ഇക്കഴിഞ്ഞ ജൂണിലാണ് ഇരുവരും വേർപിരിയൽ വാർത്ഥ സ്ഥിരീകരിച്ചത്. വേർപിരിയൽ വാർത്ത വന്നതിന് പിന്നാലെ, തന്റെ ലൈഫ് ടൈംസ് ടൂറിന്റെ വേദിയിൽ വികാരഭരിതയായ കേറ്റി പെറിയുടെ വീഡിയോ എല്ലാം വൈറലായിരുന്നു. അതിന് ശേഷം ഗായിക മറ്റൊരു പ്രണയ ബന്ധത്തിലേക്ക് പോയതായ ഗോസിപ്പുകളും പുറത്തു വന്നിരുന്നു. ഇപ്പോഴിതാ ബന്ധം വേർപിരിഞ്ഞതിനെ കുറിച്ച് ആദ്യമായി ഒർലാന്റോ ബ്ലൂം സംസാരിക്കുന്നു.

Also Read: പ്രിയപ്പെട്ടതൊന്ന് പോയപ്പോൾ കിട്ടിയ സന്തോഷമാണ് അനശ്വര; 23 വർഷം, മകൾക്ക് പിറന്നാൾ ആശംസകളുമായി അമ്മ

യുഎസ്എ ടുഡെയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു നടൻ. സംഭവിച്ച എല്ലാത്തിനും ഞാൻ നന്ദിയുള്ളവനാണ്, എല്ലാവരോടും സ്നേഹം മാത്രമാണ് എന്ന് ഒർലാന്റോ പറയുന്നു. ഞാൻ വളരെ നന്നായിരിക്കുന്നു, എല്ലാത്തിനും നന്ദി മാത്രം. ഞങ്ങൾക്ക് സുന്ദരിയായ ഒരു മകളുണ്ട്. ഒരു സിനിമയിൽ അഭിനയിക്കുമ്പോൾ അവിടെ നിന്ന് കിട്ടിയതെല്ലാം അവിടെ തന്നെ ഉപേക്ഷിച്ച് വരുമ്പോഴും നല്ലത് മനസ്സിൽ സൂക്ഷിക്കുന്നത് പോലെ, എല്ലാത്തിനും ഞാൻ നന്ദിയുള്ളവനാണ്. ഞങ്ങൾ വളരെ നല്ല രീതിയിൽ ആയിരുന്നു, ഇനിയും അങ്ങനെ ആയിരിക്കും. സ്നേഹം അല്ലാതെ മറ്റൊന്നുമില്ല- എന്നാണ് വേർപിരിയലിനെ കുറിച്ച് ഒർലാന്റോ ബ്ലൂം പറഞ്ഞത്.

Also Read: നവ്യ ചേച്ചിയുടെ പടം എടുക്കാൻ പോയി! കിട്ടിയത് അക്ഷയ് സാറിനെ; ശോഭന മാഡത്തിനെ പകർത്തിയതും അപ്രതീക്ഷിതമായി; കഥപറയും ചിത്രങ്ങൾ


വിവാഹ ബന്ധം അല്ലാത്തതുകൊണ്ടു തന്നെ ബന്ധം വേർപിരിയുന്നതിൽ മറ്റ് നൂലാമാലകൾ ഒന്നും ഉണ്ടായിരുന്നില്ല. വേർപിരിഞ്ഞാലും സൗഹൃദം തുടരും, അച്ഛനും അമ്മയും എന്ന നിലയിൽ മകളുടെ എല്ലാ കാര്യങ്ങൾക്കും ഒത്തൊരുമയോടെ തീരുമാനങ്ങളെടുത്ത് അവളെ നന്നായി പഠിപ്പിക്കുമെന്ന് നേരത്തെ ഇരുവരും വ്യക്തമാക്കിയതാണ്. മകളെ സംബന്ധിച്ച് ഞങ്ങൾ ഒരു ഫാമിലി തന്നെയാണ് എന്നാണ് ഒർലാന്റോ പറഞ്ഞിട്ടുള്ളത്. 2020 ൽ ആണ് മകൾ ഡെയ്സി ഡോവ് പിറന്നത്, ഇപ്പോൾ അഞ്ച് വയസ്സാണ് മകൾക്ക്.