ഒരു കുഞ്ഞിനെ എന്നതു പോലെ മമ്മൂട്ടിയെ കൊണ്ടു നടക്കുന്ന ആള്‍, മമ്മൂട്ടിയുടെ നിഴല്‍! ജോര്‍ജ്ജ് മമ്മൂട്ടി പങ്കുവച്ച പുതിയ പോസ്റ്റ്!

Authored byഅശ്വിനി പി | Samayam Malayalam | Updated: 11 Apr 2025, 2:03 pm

Samayam Malayalamമമ്മൂട്ടിയ്ക്കൊപ്പം ജോർജ്

മോഹന്‍ലാലിന് ആന്റണി പെരുമ്പാര്‍ എന്നത് പോലെയാണ് മമ്മൂട്ടിയ്ക്ക് ജോര്‍ജ്. ആന്റണി പെരുമ്പാവൂരിനെ പോലെ മോഹന്‍ലാലിന്റെ ബിസിനസ്സുകളില്‍ പങ്കും, നിര്‍മാതാവ് എന്ന ലേബലും ഒന്നുമില്ലെങ്കിലും, ജോര്‍ജ്ജിന്റെ ഐഡന്റിറ്റി തന്നെ ജോര്‍ജ് മമ്മൂട്ടി എന്നാണ്. പേഴ്‌സണല്‍ സെക്രട്ടറി എന്നതിനപ്പുറം സഹോദര തുല്യനായ ഒരു സ്ഥാനവും ജോര്‍ജിന് മമ്മൂട്ടി നല്‍കിയിട്ടുണ്ട്. മമ്മൂട്ടി മാത്രമല്ല, മമ്മൂട്ടിയുടെ കുടുംബവും ജോര്‍ജിനെ കാണുന്നത് തങ്ങളില്‍ ഒരാളായിട്ട് തന്നെയാണ്.

മമ്മൂട്ടിയുടെ ആരോഗ്യ സ്ഥിതിയെ കുറിച്ചുള്ള വാര്‍ത്തകള്‍ വന്നയുടനെ ഏറ്റവും അധികം കോളുകള്‍ വന്നത് ജോര്‍ജിന്റെ ഫോണിലേക്കാണ്. മമ്മൂട്ടിയുടെ ആരോഗ്യത്തെ സംബന്ധിച്ച കാര്യങ്ങളിലും ശ്രദ്ധ കേന്ദ്രീകരിക്കുന്നതിനപ്പുറം, അദ്ദേഹം ഏറ്റെടുത്ത വര്‍ക്ക് കമ്മിറ്റ്‌മെന്റുകളിലൊന്നും ഒരു വീഴ്ചയും വരാതെയും ജോര്‍ജ്ജ് ശ്രദ്ധിച്ചു. ഇപ്പോഴും മമ്മൂട്ടി വിശ്രമത്തില്‍ തുടരുകയാണ്. അതിനിടയില്‍ ഇന്നലെയാണ് മമ്മൂട്ടിയുടെ ബസൂക്ക തിയേറ്ററുകളിലെത്തിയത്.

Also Read: ശ്ശെടാ, നിങ്ങളെങ്ങനെയാണ് മനസ്സമാധാനത്തോടെ ഉറങ്ങുന്നത്, എങ്ങനെയാണ് ജീവിക്കുന്നത്? സങ്കടം തോന്നുന്നു എന്ന് തൃഷ കൃഷ്ണന്‍

കലൂര്‍ ഡെന്നീസിന്റെ മകന്‍ ഡൈനോ ഡെന്നീസ് ആദ്യമായി സംവിധാനം ചെയ്ത ബസൂക്കയ്ക്ക് ഗംഭീര അഭിപ്രായങ്ങളാണ് വന്നുകൊണ്ടിരിയ്ക്കുന്നത്. സിനിമ ജനം സ്വീകരിച്ച സന്തോഷത്തില്‍ ജോര്‍ജ് പങ്കുവച്ച പോസ്റ്റ് ആരാധകര്‍ ഏറ്റെടുത്തു. ബസൂക്ക മൂഡ് ആക്ടിവേറ്റ് ചെയ്യുന്നു എന്ന് പറഞ്ഞ് പങ്കുവച്ച ഫോട്ടോകള്‍ അത്രയും ക്യൂട്ടാണ്. ഒരു ചിത്രത്തില്‍ ജോര്‍ജ് മമ്മൂട്ടിയുടെ താടി ശരിയാക്കുന്നതും, മറ്റൊരു ചിത്രത്തില്‍ മമ്മൂട്ടിയ്‌ക്കൊപ്പം നടക്കുന്നതും കാണാം.

Also Read: ആക്ഷേപഹാസ്യം കൊണ്ട് മാല തീര്‍ത്ത് മരണമാസ്

ഒരു കുഞ്ഞിനെ എന്നത് പോലെയാണ് മമ്മൂട്ടിയെ ജോര്‍ജ് പരിപാലിക്കുന്നത് എന്ന് ഈ ചിത്രങ്ങള്‍ കണ്ടാല്‍ അറിയാം. മകന്‍ ദുല്‍ഖര്‍ സല്‍മാനടക്കം ഒരുപാട് ലൈക്കുകളും കമന്റുകളും മണിക്കൂറുകള്‍ക്ക് മുന്‍പ് പങ്കുവച്ച ഫോട്ടോയ്ക്ക് താഴെ വരുന്നു. മമ്മൂട്ടിയുടെ പേഴ്‌സണല്‍ ഫോട്ടോഗ്രാഫറായ ശരണ്‍ ഭാസ്‌കറാണ് ചിത്രങ്ങള്‍ പകര്‍ത്തിയിരിക്കുന്നത്.


മഹേഷ് നാരായണന്‍ സംവിധാനം ചെയ്യുന്ന ചിത്രത്തിന്റെ ഷൂട്ടിങ് പുരോഗമിച്ചുകൊണ്ടിരിക്കവെയാണ് മമ്മൂട്ടിയ്ക്ക് ചില ആരോഗ്യപ്രശ്‌നങ്ങള്‍ ഉണ്ടായത്. ചെന്നൈയിലെ സ്വകാര്യ ആശുപത്രിയില്‍ ചികിത്സയിലായിരുന്ന മെഗാസ്റ്റാര്‍, ചികിത്സയ്ക്ക് ശേഷം വീട്ടിലേക്ക് തിരിച്ചെത്തി. ഇപ്പോള്‍ വിശ്രമത്തിലാണ്. അധികം വൈകാതെ മഹേഷ് നാരായണന്‍ ചിത്രത്തിലേക്ക് ജോയിന്‍ ചെയ്യും എന്നാണ് വിവരം.