ഒരു ചില്ലിക്കാശ് പ്രമോഷന് വേണ്ടി പോയില്ല, എന്നിട്ടും ഇങ്ങനെയോ? തിയേറ്റര്‍ പൂരപ്പറമ്പാക്കി ദിലീപ് ഫാന്‍സ്, ആദ്യ പ്രതികരണങ്ങള്‍

യാതൊരു തര പ്രമോഷനും നല്‍കാതെയാണ് ദിലീപിന്റെ ഭ ഭ ബ എന്ന ചിത്രം ഇന്ന് തിയേറ്ററുകളില്‍ എത്തിയിരിക്കുന്നത്. എന്നാല്‍ മറ്റൊരു സിനിമയ്ക്ക് ലഭിക്കാത്ത പ്രമോഷന്‍ കഴിഞ്ഞ എട്ടാം തിയ്യതി മുതല്‍ സിനിമയ്ക്ക് ലഭിച്ചുകൊണ്ടിരിക്കുകയാണ്. നടിയെ ആക്രമിച്ച കേസിന്റെ വിധിയുമായി ബന്ധപ്പെട്ട ചര്‍ച്ചകള്‍ കൊടുംമ്പിരി കൊണ്ടു നില്‍ക്കുന്ന സാഹചര്യത്തിലാണ് ഭഭബയുടെ റിലീസ്.

ദിലീപിനെതിരെ മതിയായ തെളിവുകള്‍ ഇല്ലാത്തതുകൊണ്ടു തന്നെ കേസില്‍ എട്ടാം പ്രതിയായ ദിലീപിനെ കോടതി കുറ്റവിമുക്തനാക്കിയിരുന്നു. ഇതിനെതിരെ വ്യാപക പ്രതിഷേധമാണ് നടക്കുന്നത്. ദിലീപ് തന്റെ സ്വാധീനം വച്ച് കേസിനെ വളച്ചൊടിച്ചതാണെന്നും, സാക്ഷികള്‍ കൂറുമാറ്റിയതും തെളിവ് നശിപ്പിച്ചതുമാണ് എന്നും, ജഡ്ജ് ദിലീപിന്റെ പക്ഷത്താണെന്നും ഒരു കൂട്ടര്‍ വാദിക്കുന്നു. കുറ്റവിമുക്തനാക്കിയിട്ടും, ദിലീപ് കുറ്റക്കാരനാണ് എന്ന് തന്നെ വിശ്വസിക്കുന്ന ഒറു കൂട്ടം ജനം സിനിമ ബഹിഷ്‌കരിക്കണം എന്ന് പറഞ്ഞ് രംഗത്തെത്തിയിരുന്നു.

Also Read: രഘുവരന്റെ പൂര്‍ത്തിയാകാതെ പോയ ആഗ്രമാണത്; തുറന്ന് പറഞ്ഞ് രോഹിണി, ഈ ധരിച്ച സാരിക്കൊരു പ്രത്യേകതയുണ്ട്!

സോഷ്യല്‍ മീഡിയയില്‍ പലരും സിനിമ കാണില്ല എന്ന് തന്നെയാണ് പറഞ്ഞത്. എന്നാല്‍ ചിത്രത്തിന്റെ പ്രി ബുക്കിങ് തന്നെ കോടികളുടെ നേട്ടം ഉണ്ടാക്കിയിരുന്നു. ബുക്ക് മൈ ഷോയില്‍ ടിക്കറ്റ് കിട്ടാതെയായി. ഇന്ന് റിലീസിങ് ദിവസം കൊട്ടും വാദ്യവും ആഘോഷവുമായിട്ടാണ് ആരാധകര്‍ തിയേറ്ററിലെത്തിയത്. ഇരച്ചു കയറുന്ന ജനക്കൂട്ടത്തെയും പല തിയേറ്ററുകളിലും കാണാം. ഭഭബ ബഹിഷ്‌കരിക്കണം എന്ന് പറഞ്ഞവര്‍ ഇത് കണ്ട് ഹാര്‍ട്ട് അറ്റാക്ക് ആവും എന്നാണ് ആരാധകരുടെ വാദം.

സിനിമയെ കുറിച്ചുള്ള ആദ്യ പ്രതികരണങ്ങളും സോഷ്യല്‍ മീഡിയയില്‍ വന്നു തുടങ്ങുന്നുണ്ട്. ഇത് പക്ക ദിലീപ് ഫാന്‍സിനുള്ള സിനിമയാണ്, ആരാധകര്‍ക്ക് ഇത് ആഘോഷമാണെന്നാണ് പറയപ്പെടുന്നത്. ഒരു ചില്ലിക്കാശ് പ്രമോഷന് വേണ്ടി ചെലവഴിക്കാതെ ഇത്രയും അധികം പ്രി ബിസിനസ് നടത്തുന്ന ആദ്യത്തെ മലയാള സിനിമയായിരിക്കും ഭഭബ എന്നാണ് അഭിപ്രായം. ചിത്രം ആരാധകര്‍ വിജയിപ്പിക്കും എന്ന കാര്യത്തിലും ഇപ്പോള്‍ സംശയമില്ല. ഇതും ദിലീപിന്റെ തന്ത്രമാണെന്ന് പറയുന്നവരുണ്ട്. കേസിന്റെ വിധി മുന്‍കൂട്ടി മനസ്സിലാക്കിയാണ്, ഭഭബ റിലീസ് രണ്ടാഴ്ചയ്ക്കിപ്പുറം വച്ചത് എന്നാണ് അക്കൂട്ടരുടെ വാദം. എന്നാല്‍ വിധി എട്ടാം തിയ്യതിയാണ് എന്ന് പ്രഖ്യാപിക്കുന്നതിന് മുന്‍പേ തന്നെ ഭഭബയുടെ റിലീസ് ഡേറ്റ് തീരുമാനിച്ചിരുന്നു.