ഓ‍ർലാന്റോ ബ്ലൂമുമായി വേർപിരിഞ്ഞതിന് ശേഷമുള്ള ആദ്യത്തെ ഷോ, വേദിയിൽ വിങ്ങിപ്പൊട്ടി കേറ്റി പെറി; കൂടെ നിന്നതിന് നന്ദി

Authored by: അശ്വിനി പി|Samayam Malayalam•2 Jul 2025, 11:41 am

നടൻ ഓർലാന്റോ ബ്ലൂമും ഗായിക കേറ്റി പെറിയും തമ്മിലുള്ള പത്ത് വർഷത്തെ ബന്ധം വേർപിരിയുന്നു എന്ന വാർത്തകൾ കഴിഞ്ഞ ദിവസങ്ങളിലായാണ് പുറത്ത് വന്നത്. വേർപിരിയലിന് ശേഷം ആദ്യമായി നടത്തിയ സ്റ്റേജ് പെർഫോമൻസിൽ വിങ്ങിപ്പൊട്ടിയ കേറ്റി പെറിയുടെ വീഡിയോകളാണ് ഇപ്പോൾ സോഷ്യൽ മീഡിയയിൽ വൈറലാവുന്നത്.

തന്റെ 'ലൈഫ് ടൈംസ്' ടൂറിന്റെ ഓസ്‌ട്രേലിയൻ പര്യടനത്തിലെ അവസാന ഷോയിലാണ് കേറ്റി പെറി ഇമോഷണലായത്. 'ഫയർവർക്ക്' എന്ന ഗാനം പാടുന്നതിന് മുൻപ്, കൈകൾ കൊണ്ട് ഹൃദയത്തിന്റ ആംഗ്യം കാണിച്ച പെറി വിങ്ങി കരഞ്ഞുകൊണ്ട് ആരാധകർക്ക് നന്ദി പറയുകയും ചെയ്തു. എപ്പോഴും എനിക്കൊപ്പം നിന്നതിന് നന്ദി ഓസ്ട്രേലിയ, ഇത് എനിക്ക് ഒരുപാട് വലുതാണ്- എന്നാണ് പെറി പറഞ്ഞത്.

Also Read: അമ്മൂമ്മയാവുന്നു എന്ന ചിന്തയൊന്നും എനിക്ക് വന്നിട്ടില്ല, അമ്മയായത് തന്നെ തിരിച്ചറിയാൻ വർഷങ്ങളെടുത്തു എന്ന് സിന്ധു കൃഷ്ണ

വീഡിയോ നിമിഷ നേരങ്ങൾക്കൊണ്ടാണ് വൈറലായത്. നിങ്ങൾ ശക്തയായ സ്ത്രീയാണ്, ഇതിനെ അതിജീവിച്ച് നിങ്ങൾ തിരിച്ചുവരും എന്ന പ്രതീക്ഷ ഞങ്ങൾക്കുണ്ട്, മുന്നോട്ടു പോകൂ എന്നൊക്കെ ആശംസിച്ചുകൊണ്ടാണ് ആരാധകർ കേറ്റി പെറിയ ആശ്വസിപ്പിക്കുന്നത്.

2016 മുതൽ കേറ്റി പെറിയും ഓർലാന്റോ ബ്ലൂമും ഡേറ്റിങിൽ ആയിരുന്നു. എന്നാൽ ഇടയിൽ ചില വിള്ളലുകൾ സംഭവിച്ചു. 2017 ൽ വേർപിരിഞ്ഞുവെങ്കിലും വീണ്ടും ഒന്നിച്ചു. 2019 ൽ വിവാഹ നിശ്ചയം നടത്തിയെങ്കിലും, കല്യാണത്തിലേക്ക് കടന്നില്ല. വിവാഹത്തോട് ബ്ലൂമിന് താത്പര്യമുണ്ടായിരുന്നില്ലത്രെ. എന്നാൽ ഇരുവരുടെയും ബന്ധം ശക്തമായിരുന്നു. 2020 ൽ പെറിയ്ക്കും ബ്ലൂമിനും മകൾ പിറക്കുകയും ചെയ്തു.

കഴിഞ്ഞ മാസം വെനീസിൽ നടന്ന ജെഫ് ബെസോസിന്റെയും ലോറൻ സാഞ്ചസിന്റെയും വിവാഹത്തിൽ ബ്ലൂം ഒറ്റയ്ക്ക് പങ്കെടുത്തതിന് പിന്നാലെയാണ് ബ്ലൂമും പെറിയും വേർപിരിയുകയാണ് എന്ന ഗോസിപ്പുകൾ പുറത്തുവന്നത്. കേറ്റി ലൈഫ് ടൈംസ് ടൂറിന്റെ ഭാഗമായി ഓസ്ട്രേലിയയിൽ ആയിരുന്നതിനാൽ തന്നെ ആ അകൽച്ച പ്രകടമായി. ബന്ധം അവസാനിപ്പിച്ചാലും തങ്ങൾക്കിടയിലെ സൗഹൃദം പെറിയും ബ്ലൂമും മുന്നോട്ടു കൊണ്ടു പോകും എന്നാണ് പറഞ്ഞിരിയ്ക്കുന്നത്.


വിവാഹം നിയമപരമായി നടക്കാത്തത് കൊണ്ടു തന്നെ, വിവാഹ മോചന നടപടികളിലൂടെ കടന്നു പോകേണ്ടതില്ല എന്ന സമാധാനത്തിലാണ് ഇപ്പോൾ കേറ്റി പെറി. എന്തെന്നാൽ കഴിഞ്ഞ ജീവിതത്തിലെ വിവാഹ മോചന നടപടികൾ ഗായികയെ സംബന്ധിച്ച് ജീവിതത്തിലെ ഏറ്റവും മോശം സമയമായിട്ടാണ് കാണുന്നത്.