ഓണത്തല്ല് തിരിച്ചു വരുന്നു, ഉദ്ഘാടനം വാഴക്കുളം പൈനാപ്പിൾ മാർക്കറ്റിൽ; ബ്രാൻഡ് അംബാസഡർ ആയി ഷൈൻ ടോം ചാക്കോ

Authored by: അശ്വിനി പി|Samayam Malayalam•24 Jul 2025, 5:28 pm

ഒരുകാലത്ത് കേരളത്തിലെ ഓണം ആഘോഷങ്ങളുടെ ഒഴിവാക്കാനാവാത്ത ഒരു ഭാഗമായിരുന്നു ഓണത്തല്ല് എന്ന വിനോദം. ഓണക്കാല വിനോദങ്ങളിൽ ഏറ്റവും പഴമേറിയവയിൽ ഒന്ന് കൂടിയാണ് ഓണത്തല്ല്. ഇടക്കാലത്ത് ഓണക്കളികളിൽ നിന്ന് അപ്രത്യക്ഷമായ, അന്യം നിന്ന് പോയ ഈ വിനോദത്തെ തിരിച്ചു കൊണ്ടുവരിക എന്ന ലക്ഷ്യത്തോടെ ഈ വർഷം ഒരു ക്യാമ്പയിൻ ആരംഭിക്കുകയാണ്.

പ്രശസ്ത സിനിമാ താരം ഷൈൻ ടോം ചാക്കോ ആണ് ഈ ക്യാമ്പയിന്റെ ബ്രാൻഡ് അംബാസഡർ. ക്യാമ്പയിൻ ഉദ്‌ഘാടനം 2025 ഓഗസ്റ്റ് 31 നു ലോകത്തെ ഏറ്റവും വലിയ പൈനാപ്പിൾ മാർക്കറ്റ് ആയ വാഴക്കുളത്ത് വെച്ച് നടക്കും.

ഫൈറ്റ് നൈറ്റ് എന്ന പേരിൽ നടത്തുന്ന ഈ ഓണത്തല്ല് ക്യാമ്പയിൻ അവതരിപ്പിക്കുന്നത് കാസ്പറോവ് പ്രൈം പ്രൈവറ്റ് ലിമിറ്റഡും പാന്റ് ക്ലബും ചേർന്നാണ്. ഓഗസ്റ്റ് 31 നു വെകുന്നേരം 4 മണിക്കാണ് ഇതിന്റെ ഉദ്‌ഘാടന ചടങ്ങുകൾ ആരംഭിക്കുക. കേരളാ സംസ്കാരവുമായി വളരെയധികം ബന്ധപെട്ടു കിടക്കുന്ന ഈ വിനോദ രൂപത്തിന് ഓണപ്പട, കൈയ്യാങ്കളി എന്നും പേരുകളുണ്ട്.

Also Read: അച്ഛനാകുന്ന സന്തോഷം പങ്കുവച്ച് പിറ്റി ഡേവിഡ്‌സൺ; കാത്തിരിപ്പിലാണ്, ഈ സന്തോഷം പറഞ്ഞറിയിക്കാൻ കഴിയില്ല

പണ്ടൊക്കെ ഓണത്തല്ല് പരിശീലിപ്പിയ്ക്കുന്ന കളരികളുണ്ടായിരുന്നു കേരളത്തിൽ. മൈസൂർ ആക്രമണ കാലം വരെ മലബാറിലും, ബ്രിട്ടീഷ് ഗവൺമെന്റിന്റെ ആയുധനിയമം വരുന്നതുവരെ തിരുവിതാംകൂറിലും കൊച്ചിയിലും ഓണത്തല്ല് ഒരു ആചാരമായിട്ടാണ് നടത്തി വന്നിരുന്നത്. ഈ അടത്ത കാലം വരെയും തൃശ്ശൂരിലെ കുന്നംതുളത്ത് ഓണത്തല്ല് നടത്തി വന്നിരുന്നു.

കൈ പരത്തിയുള്ള അടിയും തടവും മാത്രമേ ഓണത്തല്ലിൽ പാടുള്ളൂ. മുഷ്ടിചുരുട്ടി ഇടിക്കയോ ചവിട്ടുകയോ അരുത്‌. വ്യവസ്ഥതെറ്റുമ്പോൾ തല്ലുകാരെ പിടിച്ചുമാറ്റുവാൻ റഫറി (ചായികാരൻമാർ അല്ലെങ്കിൽ ചാതിക്കാരൻമാർ) ഉണ്ട്‌. നിരന്നു നിൽക്കുന്ന രണ്ടു ചേരിക്കാർക്കും നടുവിൽ 14 മീറ്റർ വ്യാസത്തിൽ ചാണകം മെഴുകിയ കളത്തിലാണ്‌ ഓണത്തല്ല് നടക്കുക. ഇതിന്‌ ആട്ടക്കളം എന്നു പറയുന്നു.
മറന്നുകൊണ്ടിരിയ്ക്കുന്ന ഈ പഴമയെ തിരിച്ചുകൊണ്ടുവരിക എന്ന ഉദ്ദേശത്തോടെയാണ് ഈ കാമ്പയിനിങ് സംഘടിപ്പിച്ചിരിയ്ക്കുന്നത്. സെപ്റ്റംബർ 5 നാണ് ഇക്കൊല്ലത്തെ തിരുവോണം.