‘കപ്പ് കൊടുത്താലും പോകില്ല!’: വേദിയിൽനിന്ന് ഇറങ്ങാതെ ട്രംപ്, ഒടുവിൽ ഇടപെട്ട് ഫിഫ പ്രസിഡന്റ്; അനിഷ്ടം കാട്ടി മെസ്സിയും യമാലും?

ന്യൂജഴ്‌സി ∙ ഫിഫ ലോകകപ്പ് കിരീടം സമ്മാനിച്ചിട്ടും വേദി വിടാൻ തയാറാകാത്ത യുഎസ് പ്രസിഡന്റ് ‍ഡോണൾഡ് ട്രംപിന്റെ വിഡിയോയാണ് സമൂഹമാധ്യമങ്ങളിൽ വൈറലാകുന്നത്. സ്പെയിൻ വിജയം ആഘോഷിക്കുന്നതിനിടയിലും ട്രംപ് വേദി വിടാതെ ഫ്രെയിമിൽ തന്നെ നിൽക്കാൻ ശ്രമിക്കുകയായിരുന്നു. ഒടുവിൽ ഫിഫ പ്രസിഡന്റ് എത്തിയാണ് ട്രംപിനെ വേദിയിൽനിന്നു മാറ്റിയത്.

ലോകകപ്പ് കിരീടം സ്പെയിൻ ടീമിന് സമ്മാനിച്ച ശേഷം അവിടെത്തന്നെ തുടരുകയായിരുന്നു ട്രംപ്. സ്പെയിൻ താരങ്ങൾക്ക് ആഘോഷം തുടങ്ങുന്നതിനായി ക്യാപ്റ്റൻ റോഡ്രി ട്രംപിന് പുറത്തേയ്ക്കുള്ള വഴി കാണിച്ചെങ്കിലും പുറത്തേക്ക് പോകാൻ പ്രസിഡന്റ് കൂട്ടാക്കിയില്ല. ട്രംപ് വേദിയിൽ നിൽക്കുന്നതിന്റെ അസ്വസ്ഥത റോഡ്രിയുടെ ശരീരഭാഷയിൽ പ്രകടമായിരുന്നു. സ്പെയിൻ താരങ്ങൾ ലോകകപ്പുമായി ആഘോഷം തുടങ്ങിയപ്പോഴും ട്രംപ് കളിക്കാരുടെ തോളിൽ തട്ടിയും അഭിനന്ദിച്ചും അവർക്ക് സമീപം തന്നെ തുടർന്നു.

ഒടുവിൽ ഫിഫ പ്രസിഡന്റ് ജിയാനി ഇൻഫന്റിനോ ഓടിയെത്തി ട്രംപിന്റെ കയ്യിൽ പിടിച്ച് പുറത്തേക്ക് കൊണ്ടുപോകാൻ ശ്രമിച്ചെങ്കിലും ട്രംപ് കയ്യടിച്ചുകൊണ്ട് അവിടെത്തന്നെ തുടർന്നു. ഇൻഫന്റിനോ ട്രംപിനോട് എന്തോ പറയാൻ ശ്രമിക്കുന്നതും വിഡിയോയിൽ കാണാം. ഇതിന് ശേഷമാണ് ഇൻഫന്റിനോയ്ക്കൊപ്പം ട്രംപ് വേദിയിൽനിന്ന് ഇറങ്ങിയത്.

വിഡിയോ വൈറലായതിന് പിന്നാലെ ട്രംപനെതിരെ വിമർശനവും പരിഹാസവുമുയരുന്നുണ്ട്. ട്രംപ് നാണമില്ലാതെ സ്പെയിനിന്റെ ആഘോഷത്തിൽ ഇടിച്ചുകയറാൻ ശ്രമിക്കുകയാണെന്നാണ് പലരും കമന്റ് ചെയ്യുന്നത്. ട്രംപിന് ഔചിത്യബോധം ഇല്ലേ എന്നും പലരും ചോദിക്കുന്നു.

അതേസമയം, ട്രംപ് താരങ്ങൾക്ക് കൈ കൊടുക്കുന്ന വിഡിയോയും സമൂഹമാധ്യമങ്ങളിൽ പ്രചരിക്കുന്നുണ്ട്. അർജന്റീന താരം ക്രിസ്റ്റ്യൻ റൊമെരോ ട്രംപിൽ നിന്ന് മെഡൽ സ്വീകരിച്ചെങ്കിലും കൈകൊടുത്തില്ല. മെസ്സി ട്രംപിന് മുഖം കൊടുത്തില്ലെന്നും സ്പാനിഷ് താരം ലമീൻ യമാൽ ട്രംപിന് കൈകൊടുക്കാൻ ആദ്യം മടിച്ചെന്നുമുള്ള തരത്തിലും വിഡിയോ പ്രചരിക്കുന്നുണ്ട്.