കവിളിലെ മുറിവ്, പരിശോധനയിൽ കാൻസർ; ചികിത്സിക്കാൻ കാശില്ലാതെ നടി ‌സലീമ, സഹായം തേടി സുഹൃത്തുക്കൾ

Authored by: അശ്വിനി പി|Samayam Malayalam•25 Oct 2025, 2:19 pm

എൺപതുകളിൽ മലയാള സിനിമാ പ്രേക്ഷകരുടെ ഇഷ്ടം പിടിച്ചുപറ്റിയ നടിയാണ് സലീമ. ആരണ്യകം എന്ന സിനിമയിലെ അമ്മിണിയെയും, നഖക്ഷതങ്ങളിലെ ലക്ഷ്മിയെയും അത്ര പെട്ടന്നൊന്നും മലയാളികൾക്ക് മറക്കാൻ സാധിക്കില്ല. വർഷങ്ങൾക്ക് ശേഷം രേഖാചിത്രം എന്ന സിനിമയിലൂടെ തിരിച്ചെത്തിയ നടി ഇപ്പോൾ ജീവിതം തിരിച്ചു പിടിക്കാനുള്ള ശ്രമത്തിലാണ്.

സലീമയ്ക്ക് മൗത്ത് കാൻസർ സ്ഥിരീകരിച്ചു. ചികിത്സാക്കാൻ കാശില്ലാതെ സഹായം തേടുകയാണ് ഇപ്പോൾ ഉറ്റവരും സുഹൃത്തുക്കളും. അണപ്പല്ലിലെ പ്രശ്നങ്ങളും, മോണയിലെ വേദനയും വലതു കവിളിലെ മുറിവുമൊക്കെയായിട്ടാണ് ദന്ത ഡോക്ടറെ ചെന്നു കണ്ടത്. മുറിവ് കണ്ടപ്പോൾ തന്നെ ഡോക്ടർ ബയോപ്സി ചെയ്യണം എന്നു പറഞ്ഞു.

Also Read: 11ആം വയസ്സിൽ ചൈൽഡ് അഭ്യൂസിന് ഇരയായയി, ശരീരത്തിന്റെ പേരിൽ കളിയാക്കലുകൾ; പരാജയങ്ങളിൽ നിന്ന് തുടങ്ങിയ ശ്രുതിയുടെ ഇന്നത്തെ വരുമാനം

തുടർന്നുള്ള പരിശോധനയിൽ കഴുത്തിലെ ലിംഫ് നോഡുകളിലും പ്രശ്നം കണ്ടു. അപ്പോഴേക്കും ബയോപ്സിയുടെ റിസൾട്ട് വന്നു. കാർസിനോമ എന്ന ഓറൽ കാൻസറാണ്. കഴുത്തിലെ ലിംഫ് നോഡുകളിലേക്കും രോഗം പടർന്നിട്ടുണ്ട്. നിലവിൽ ചെന്നൈയിലെ അപ്പോളോ ആശുപത്രിയിൽ ചികിത്സയിലാണ്. പെട്ടന്ന് ശസ്ത്രക്രിയ ചെയ്താൽ വായിലെ കാൻസർ നീക്കം ചെയ്യാൻ സാധിക്കും.

ചികിത്സയ്ക്ക് ഇതിനോടകം ലക്ഷങ്ങൾ ചെലവായി കഴിഞ്ഞു. സർജറി താങ്ങാനുള്ള സാമ്പത്തിക ശേഷി ഇപ്പോൾ സെലീനയ്ക്കില്ല. ഏതാണ്ട് 20 ലക്ഷത്തോളം രൂപ തുടർ ചികിത്സയ്ക്കായി വേണം, അതിന് സൻമനസ്സുള്ളവരുടെ സഹായം വേണം.

ആദ്യകാല തെലുങ്ക് നടിയായ ഗിരിജയുടെ മകൾ എന്ന ലേബലോടെയാണ് 1982 ൽ സലീമയുടെ സിനിമാ അരങ്ങേറ്റം. തെലുങ്ക് സിനിമകളിൽ തുടങ്ങി പിന്നീട് തമിഴിലും കന്നടയിലും സജീവമായി, 1985 ൽ ഞാൻ പിറന്ന നാട്ടിൽ എന്ന ചിത്രത്തിലൂടെയാണ് മലയാളത്തിലേക്ക് എത്തിയത്. എന്നാൽ ശ്രദ്ധിക്കപ്പെട്ടത് എംടി - ഹരിഹരൻ കൂട്ടുകെട്ടിലെ ആരണ്യകം എന്ന ചിത്രത്തിലൂടെയാണ്.


മുപ്പത് വർഷത്തെ ഇടവേളയ്ക്ക് ശേഷം മുന്തിരി മൊഞ്ചൻ എന്ന സിനിമയിലൂടെ 2019 ൽ സലീമ തിരിച്ചു വരവ് നടത്തിയിരുന്നു. എന്നാൽ കൊവിഡ് കാലത്ത് അത് ക്ലച്ചു പിടിച്ചില്ല. ഈ വർഷം ഇറങ്ങിയ സൂപ്പർ ഹിറ്റ് ചിത്രമായ രേഖാചിത്രത്തിലാണ് ഏറ്റവുമൊടുവിൽ സലീമ അഭിനയിച്ചത്. അതിലെ വില്ലത്തിയുടെ വേഷം ശ്രദ്ധേയമാവുകയും ചെയ്തു. പൂർവ്വാധികം ശക്തിയോടെ തിരിച്ചുവരാൻ ഒരുങ്ങിയപ്പോഴാണ് കാൻസർ എന്ന രോഗം പിടിപെട്ടിരിക്കുന്നത്.