ക്ലാപ്പടിച്ചത് ജോജു! ദീപം കൊളുത്തിയത് ജീത്തു ജോസഫും ലിന്റയും! 'വലതുവശത്തെ കള്ളന്' തുടക്കമായി

Authored by: നിമിഷ|Samayam Malayalam•26 May 2025, 10:54 pm

വ്യത്യസ്ത ജോണറുകളിലായി സിനിമയൊരുക്കി ശ്രദ്ധേയനായ സംവിധായകനാണ് ജീത്തു ജോസഫ്. നുണക്കുഴിക്ക് ശേഷമായി വലതുവശത്തെ കള്ളനാണ് അദ്ദേഹം സംവിധാനം ചെയ്യുന്നത്. ഇടപ്പള്ളിയില്‍ ത്രീ ഡോട്‌സ് സ്റ്റുഡിയോയിലായിരുന്നു ചിത്രത്തിന്റെ പൂജ. ജോജു ജോര്‍ജായിരുന്നു ചിത്രത്തിന് ക്ലാപ്പടിച്ചത്. ജീത്തു ജോസഫും ഭാര്യ ലിന്റയും ചേര്‍ന്നായിരുന്നു ഭദ്രദീപം കൊളുത്തിയത്.

ലിസ്റ്റിന്‍ സ്റ്റീഫനും ഷാജി നടേശനുമടക്കം നിരവധി പേരായിരുന്നു ചടങ്ങില്‍ പങ്കെടുത്തത്. ഡിനു തോമസ് ഈലനാണ് ചിത്രത്തിന് കഥയൊരുക്കുന്നത്. സംവിധായകനും നിര്‍മ്മാതാവും ചേര്‍ന്നായിരുന്നു തിരക്കഥയുടെ പൂര്‍ണരൂപം ഏറ്റുവാങ്ങിയത്. വൈകാതെ തന്നെ സിനിമയുടെ ചിത്രീകരണം തുടങ്ങിയേക്കുമെന്നുള്ള വിവരങ്ങളാണ് പുറത്തുവന്നിട്ടുള്ളത്. നായകനേയും നായികയേയും പരിചയപ്പെടുത്തുന്നതിനായി കാത്തിരിക്കുകയാണ് സിനിമാലോകവും പ്രേക്ഷകരും.

Also Read: എത്ര തിരക്കാണെങ്കിലും ഇത് മിസ്സാക്കില്ല! അച്ഛമ്മയുടെ നവതിക്ക് ഓടിയെത്തി കീര്‍ത്തിയും രേവതിയും! ആന്റണി എവിടെ എന്ന ചോദ്യങ്ങള്‍ക്കും മറുപടി

'വലതുവശത്തെ കള്ളൻ' സിനിമയുടെ ടൈറ്റിൽ പോസ്റ്റർ അടുത്തിടെ പുറത്തുവിട്ടിരുന്നു. ഓഗസ്റ്റ് സിനിമ, സിനിഹോളിക്സ്, ബെഡ്‍ടൈം സ്റ്റോറീസ് തുടങ്ങിയ ബാനറുകളിൽ ഷാജി നടേശനാണ് ചിത്രം നിർമ്മിക്കുന്നത്.
ഏറെ ദുരൂഹമായ കഥാപശ്ചാത്തലമാകും ചിത്രത്തിന്‍റേതെന്നാണ് സൂചനകൾ. ടൈറ്റില് പോസ്റ്ററെത്തിയപ്പോള് മുതലേ ആകാംക്ഷയിലായിരുന്നു എല്ലാവരും. പതിവുപോലെ തന്നെ ഒട്ടേറെ സംശയങ്ങളും, ചോദ്യങ്ങളുമൊക്കെ അവശേഷിപ്പിച്ചായിരുന്നു പോസ്റ്ററെത്തിയത്.

യേശുക്രിസ്തുവിനെ രണ്ട് കള്ളന്‍മാര്‍ക്കിടയിലായാണ് കുരിശിലില്‍ തറച്ചത്. ഇതില്‍ വലത് വശത്തെ കള്ളന്‍ നല്ല കള്ളനായിരുന്നു. അവസാന നിമിഷം തന്‍റെ കുറ്റങ്ങള്‍ മനസ്സിലാക്കി പശ്ചാത്തപിച്ച ആ കള്ളന് യേശുക്രിസ്തു പറുദീസ വാഗ്ദാനം ചെയ്തതായി ബൈബിളിലുണ്ട്. ഈ കഥയോട് കൂട്ടിവായിക്കേണ്ടതാകുമോ സിനിമ എന്നാണ് ടൈറ്റിൽ സൂചന നൽകുന്നത്. 'മുറിവേറ്റൊരു ആത്മാവിന്‍റെ കുമ്പസാരം' എന്ന ടാഗ് ലൈനോടെയാണ് 'വലതുവശത്തെ കള്ളൻ' ടൈറ്റിൽ ലുക്ക് പുറത്തിറങ്ങിയിരുന്നത്. ഇതോടെ തന്നെ ചോദ്യങ്ങളുയര്ർന്നിരുന്നു,

Also Read: ഞാനും കാണുന്നുണ്ട് എല്ലാം! പുള്ളിക്കാരിക്ക് അതാണ് ഇഷ്ടമെങ്കില്‍ അങ്ങനെ ചെയ്യട്ടെ! രേണുവിനെക്കുറിച്ചുള്ള ചോദ്യത്തിന് മാസ് റിപ്ലേയുമായി അനുമോള്‍

ഒരു കുറ്റാന്വേഷണ സിനിമയാണെന്നാണ് മനസ്സിലാക്കാനാകുന്നത്. ഒരു മേശയിൽ പോലീസ് കേസ് ഫയലും കമ്പ്യൂട്ടറും വയർ‍ലെസും താക്കോൽകൂട്ടവും കണ്ണടയും ഇരിക്കുന്നതായാണ് ടൈറ്റിൽ പോസ്റ്ററിലുണ്ടായിരുന്നത്. ചിത്രത്തിലെ അഭിനേതാക്കളെ സംബന്ധിച്ച കൂടുതൽ വിവരങ്ങള്‍ വരും ദിവസങ്ങളിൽ പുറത്തുവിടാനിരിക്കുകയാണ് അണിയറപ്രവർത്തകർ.

ആരൊക്കെയായിരിക്കും ഈ ത്രില്ലറിനായി അണിനിരക്കുന്നതെന്നാണ് സിനിമാപ്രേമികളെല്ലാം ചോദിക്കുന്നത്. പൂജ ചടങ്ങില് ജോജു സന്നിഹിതനായിരുന്നതിനാല് ഈ സിനിമയില് അദ്ദേഹം ഉണ്ടാവുമെന്നുള്ള പ്രവചനങ്ങളുമുണ്ട്. ബേസിൽ ജോസഫ് നായകനായെത്തിയ നുണക്കുഴിയാണ് ഏറ്റവും ഒടുവിൽ പുറത്തിറങ്ങിയ ജീത്തു ജോസഫ് ചിത്രം. ആതിര ദിൽജിത്താണ് ഈ സിനിമയുടെ പിആർഒ.