ഞാൻ എങ്ങനെയുള്ള ആൺകുട്ടികളുമായി ഡേറ്റിങ് ചെയ്യുന്നത് ഒഴിവാക്കണം എന്ന് പെൺകുട്ടി; ജെ ഹോപ്പ് നൽകിയ മറുപടി വൈറലാവുന്നു

Authored by: അശ്വിനി പി|Samayam Malayalam•17 Jul 2025, 12:00 pm

കെ-പോപ് സംഗീത ലോകത്ത് ബിടിഎസ് എന്ന ഏഴവർസംഘം ഉണ്ടാക്കിയ തരംഗം ചെറുതൊന്നുമല്ല. ബിടിഎസിനെ കാണാൻ നാടുവിട്ടുപോയ പെൺകുട്ടികൾ നമ്മുടെ കേരളത്തിലുണ്ട്. അത്രയ്ക്കധികം കൊറിയൻ പോപ് സംഗീതത്തെയും, പ്രത്യേകിച്ച് ബിടിഎസ് എന്ന ബ്യൂസിക് ബാന്റിലെ അംഗങ്ങളെയും ഇഷ്ടപ്പെടാൻ കാരണം അവരുടെ പാട്ടുകൾ മാത്രമല്ല, പെരുമാറ്റം കൂടെയാണ്. അത്രയും മാതൃകാപരമായ സംസാരവും പെരുമാറ്റവും ആരെയും ആകർഷിക്കുന്നതും ആണ്. അത്തരത്തിൽ ഇപ്പോൾ ബിടിഎസിലെ ജെ ഹോപ്പ് നൽകിയ മറുപടിയാണ് വൈറലാവുന്നത്.

ഇന്നലെ, ജൂലൈ പതിനാറിന് ജെ ഹോപ് ഒരു ഇന്റർനാഷണൽ വീഡിയോ കോൾ പരിപാടിയിൽ പങ്കെടുത്തിരുന്നു. അന്താരാഷ്ട്ര റാഫിളിലൂടെ തിരഞ്ഞെടുക്കപ്പെട്ട ഭാഗ്യശാലികളായ വിജയികൾക്കാണ് ഈ വീഡിയോ കോളിൽ ജെ-ഹോപ്പുമായി സംസാരിക്കാനുള്ള അവസരം ലഭിയ്ക്കുന്നത്. അങ്ങനെ ലോകത്തെ പല ഭാഗത്തുനിന്നുള്ള ആരാധകർ ബിടിഎസ് താരവുമായി നേരിട്ട് സംവദിക്കുകയുണ്ടായി. രസകരമായ തമാശകളും, ഹൃദയസ്പർശിയായ നന്ദി പറച്ചിലുകളുമൊക്കെയായി എന്റർടൈനിങ് ആയിരുന്നു പരിപാടി. അതിന്റെ വീഡിയോകളൊക്കെ ഇപ്പോൾ സോഷ്യൽ മീഡിയയിൽ വൈറലാണ്.

Also Read: ഒരുക്കങ്ങളും കാത്തിരിപ്പുകളും ഒന്നും വെറുതെയായില്ല എന്ന് തെളിയിക്കുന്ന വിധം തന്നെയാണ് വിവാഹം നടന്നത്

ചോദ്യോത്തര വേളയിൽ ഒരു പെൺകുട്ടി ജെ ഹോപ്പിനോട് ചോദിച്ച ചോദ്യവും, അതിന് ഗായകൻ നൽകിയ മറുപടിയുമാണ് അതിൽ ഏറ്റവുമധികം ശ്രദ്ധ നേടിയത്. ഞാൻ ഏത് തരത്തിലുള്ള ആൺകുട്ടിയെ പ്രണയിക്കുന്നത് ഒഴിവാക്കണം - എന്നായിരുന്നു പെൺകുട്ടിയുടെ ചോദ്യം. വളരെ രസകരമായതോ ചിന്താനീയമായതോ ആയ ഒരു മറുപടി ജെ ഹോപ് നൽകും എന്നായിരിക്കാം ആരാധിക പ്രതീക്ഷിച്ചത്. എന്നാൽ ജെ ഹോപ്പിന്റെ ഉത്തരം, എല്ലാവരെയും സൂക്ഷിക്കണം- എന്ന ഒറ്റ വാക്യത്തിൽ അവസാനിച്ചു. അത് കേട്ട് പെൺകുട്ടി ചിരിക്കുകയും ചെയ്തു.

വളരെ സാധാരണവും, സത്യസന്ധവുമായ മറുപടിയാണ് ജെ ഹോപ് നൽകിയത്. ആരാധകരോടുള്ള ബിടിഎസ് താരത്തിന്റെ കരുതലും ഉണ്ടെന്നാണ് വീഡിയോ വൈറലാവുന്നതിനൊപ്പം ആരാധകർ പറയുന്നത്. ഇതുവരെ കേട്ടതിൽ ഏറ്റവും മികച്ച ഡേറ്റിങ് ഉപദേശമാണ് ഇതെന്ന് അഭിപ്രായപ്പെടുന്നവരും ഉണ്ട്. അതേ സമയം എല്ലാ പുരുഷന്മാരെയും സൂക്ഷിക്കണം എന്ന് പറഞ്ഞതിലൂടെ ജെ ഹോപ്പ് ഒരു ഫെമിനിസ്റ്റാണ് എന്ന് പറയുന്ന കമന്റുകളും വരുന്നുണ്ട്.

എന്ത് തന്നെയായാലും ആരാധകരുമായുള്ള ഈ ലൈവ് സംവാദത്തിലൂടെ ജെ ഹോപ്പ് എന്ന ഗായകനപ്പുറം, ആ വ്യക്തിയോടുള്ള ഇഷ്ടം കൂടി എന്ന് പറയുന്നവരുമുണ്ട്. അത്രയും രമ്യമായി, ആരാധകരോടുള്ള ബഹുമാനത്തോടെയാണ് ജെ ഹോപ് പെരുമാറിയത്.