താലി പിടിച്ച് ഒരു ഫീലിങ്‌സും ഇല്ലാതെയാണ് ഞാനത് പറഞ്ഞത്, അന്നതിന്റെ അര്‍ത്ഥം അറിയില്ലായിരുന്നു; കാവ്യ മാധവന്‍

Authored by: അശ്വിനി പി|Samayam Malayalam•11 Nov 2025, 1:13 pm

പൂക്കാലം വരവായി എന്ന ചിത്രത്തില്‍ ബാലതാരമായി അഭിനയിച്ചുകൊണ്ടാണ് കാവ്യ മാധവന്‍ സിനിമാ ലോകത്തേക്ക് എത്തുന്നത്. പുതിയ സിനിമയിലേക്ക്ബാലതാരങ്ങളെ തിരയുന്നു എന്ന പത്രക്കുറിപ്പ് കണ്ട് കാവ്യയുടെ അച്ഛന്‍ മാധവനാണ് മകളുടെ ചിത്രം അതിനായി അയച്ചത്. കാവ്യ ഒരു അഭിനേത്രി ആവണം എന്ന് ഏറ്റവും അധികം ആഗ്രഹിച്ചതും അതിനായി കൊണ്ടു നടന്നതും എല്ലാം മാധവന്‍ തന്നെയാണ്. പൂക്കാലം വരവായി എന്ന ചിത്രത്തിന് ശേഷം നിരവധി സിനിമകളില്‍ കാവ്യയ്ക്ക് വീണ്ടും അവസരം ലഭിച്ചു.

നായികയായി ആദ്യമായി അഭിനയിച്ചത് ലാല്‍ ജോസ് സംവിധാനം ചെയ്ത ചന്ദ്രനുദിക്കുന്ന ദിക്കില്‍ എന്ന ചിത്രത്തിലാണ്. ദിലീപിന്റെ നായികയായി, അതായിരുന്നു തുടക്കം. അന്ന് കാവ്യ മാധവന്‍ ഒന്‍പതാം ക്ലാസില്‍ പഠിക്കുകയായിരുന്നു. ആദ്യമായി സ്‌ക്രീനില്‍ നായികയായി എത്തിയ ഓര്‍മകള്‍ നേരത്തെ ഒരു അഭിമുഖത്തില്‍ കാവ്യ മാധവന്‍ പങ്കുവച്ചതാണ് ഇപ്പോള്‍ വൈറലാവുന്നത്.

Also Read: 16 വര്‍ഷത്തെ ദാമ്പത്യ ജീവിതം അവസാനിച്ചപ്പോള്‍ മാനസികമായി തകര്‍ന്നു പോയി; ഡ്വെയിന്‍ ജോണ്‍സണ്‍ പറയുന്നു

വളരെ യാദൃശ്ചികമായിട്ടാണ് ചന്ദ്രനുദിക്കുന്ന ദിക്കില്‍ എന്ന സിനിമ എന്നിലേക്ക് വന്നത്. വാസ്തവത്തില്‍ ആ രാധ എന്ന ആ വേഷം ശാലിനി ചേച്ചി (ശാലിനി അജിത്ത്) ചെയ്യേണ്ടിയിരുന്നു. അവര്‍ക്ക് ഡേറ്റ് ഇല്ലാതെ, മറ്റ് സിനിമയുമായി തിരക്കിലായതിനാലാണ് മറ്റൊരു നടിയെ നോക്കാം എന്ന രീതിയിലേക്ക് എത്തിയത്. അങ്ങനെയാണ് എന്നെ ഒഡിഷന്‍ ചെയ്തത്. എനിക്കിപ്പോഴും ഓര്‍മയുണ്ട്, ഒരു ഹോട്ടല്‍ മുറിയില്‍, ബിജു ചേട്ടനുമായുള്ള സീനാണ് എനിക്കാദ്യം തന്നത്. അതില്‍ എനിക്ക് വലിയ ഡയലോഗുകള്‍ ഒന്നുമില്ല, വെറുതേ ഒന്ന് നോക്കുക, ചിരിക്കുക അത്രയേ ഉണ്ടായിരുന്നുള്ളൂ. അത് ചെയ്തു.

രണ്ട് മൂന്ന് ദിവസം കഴിഞ്ഞിട്ടും ഡയലോഗൊന്നും കിട്ടുന്നില്ല, അപ്പോള്‍ ഞാന്‍ ലാലുച്ചേട്ടനോട് (ലാല്‍ ജോസ്) ചോദിച്ചു, ലാലുച്ചേട്ടാ എനിക്ക് ഈ പടത്തില്‍ വര്‍ത്താനം ഒന്നുമില്ലേ, ഞാന്‍ വെറുതേ നില്‍ക്കുകയേ ഉള്ളോ എന്ന്. ആ ഇപ്പോ ഇങ്ങോട്ട് ചോദിച്ചു തുടങ്ങിയോ, എന്നാല്‍ പിന്നെ നാളെ തന്നെ റെഡിയാക്കി തരാം എന്ന് പറഞ്ഞു. അങ്ങനെ പിറ്റേ ദിവസം തന്നത് ക്ലൈമാക്‌സ് രംഗമാണ്. ക്ലാമാക്‌സില്‍ അവസാനം ദിലീപേട്ടന്റെ അടുത്ത് പോയിട്ട്, എനിക്ക് പഴയ രാധയാവണം എന്നൊക്കെ പറയുന്ന സീന്‍, ഒരു തുടക്കകാരിയെ സംബന്ധിച്ച് അതൊരു ഹെവി സീന്‍ തന്നെയായിരുന്നു.


അതിലെ ഡയലോഗ് താലിയൊക്കെ പിടിച്ചിട്ട്, ഇത് കെട്ടിയ ബന്ധം മാത്രമേയുള്ളൂ അല്ലാതെ മറ്റൊന്നുമില്ല എന്നൊക്കെ പറയുന്നതാണ്. അങ്ങനെയൊക്കെ പറയുന്നു എന്നേയുള്ളൂ, എനിക്ക് അതിന്റെ അര്‍ത്ഥമൊന്നും അറിയില്ലായിരുന്നു, എന്താണ് ആ ഫീലിങ്‌സ് എന്ന് മനസ്സിലാക്കാനുള്ള പക്വതയും അന്നുണ്ടായിരുന്നില്ല. പക്ഷേ പെട്ട് ആ സീന്‍ ഓകെയായി. അതിന് ശേഷമാണ് രാധ എന്ന കഥാപാത്രം എന്നില്‍ ഓകെയാണോ എന്ന് ലാലു ചേട്ടനൊക്കെ ഉറപ്പിച്ചത്. ശരിക്കും അവര്‍ എടുത്ത ഒരു റിസ്‌ക് ആയിരുന്നു അത്- കാവ്യ മാധവന്‍ പറഞ്ഞു