ദൈവത്തിന്റെ ഫോട്ടോ വലിച്ചെറിഞ്ഞ ആളാണ് ഞാൻ, പക്ഷേ ആശ്വാസത്തിന് അവിടെ തന്നെ എത്തി; വിലക്ക് നേരിട്ടപ്പോൾ അനുഭവിച്ച വേദനകളെ കുറിച്ച് ചിന്മയ്

Authored by: അശ്വിനി പി|Samayam Malayalam•5 Jun 2025, 2:42 pm

തഗ്ഗ് ലൈഫ് എന്ന ചിത്രത്തിന്റെ പ്രമോഷൻ വേദിയിൽ മത്ത മഴെെ പാട്ട് പാടിയതിന് ശേഷം ഗായിക ചിന്മയ് ശ്രീപദയുടെ വിലക്കുമായി ബന്ധപ്പെട്ട ചർച്ചകൾ വീണ്ടും സജീവമായിരുന്നു. മി ടൂ ആരോപണത്തിന് പിന്നാലെ, വരിസഖ്യ അടച്ചില്ല എന്ന കാരണത്താൽ 2018 ൽ ആണ് ചിന്മയിയെ തമിഴ് സിനിമ ബാൻ ചെയ്ത്. അത് കാരണം തമിഴ് സിനിമയിൽ പാട്ട് പാടാനോ, ഡബ്ബ് ചെയ്യാനോ കഴിഞ്ഞ ഏഴെട്ട് വർഷങ്ങളായി ചിന്മയ്ക്ക് സാധിക്കുമായിരുന്നില്ല. അതുകൊണ്ട് തന്നെ തഗ്ഗ് ലൈഫിലെ ഈ പാട്ട് പാടിയത് ധീയാണ്, ഇതിന്റെ ഹിന്ദി തെലുങ്ക് വേർഷൻ പാടാനുള്ള അവസരം ചിന്മയിക്ക് ലഭിക്കുകയും ചെയ്തു. ഓഡിയോ ലോഞ്ചിൽ ധീയ്ക്ക് പങ്കെടുക്കാൻ സാധിക്കാത്തതിനാൽ ചിന്മയ് പങ്കെടുക്കുകയും, അതിന്റെ തമിഴ് വേർഷൻ പാടുകയും ചെയ്തതോടെ വിലക്ക് വീണ്ടും ചർച്ചയാവുകയായിരുന്നു.

തമിഴ് ഗാനരചയിതാവ് വൈരമുത്തുവിനും രാധാ രവിയ്ക്കുമെതിരെ പലരും മീ ടൂ ആരോപണം നടത്തിയിരുന്നു. എന്നാൽ അതിൽ വിലക്കേർപ്പെട്ടത് ചിന്മയ്ക്ക് മാത്രമായിരുന്നു. ആ വിലക്ക് നേരിട്ട കാലം താൻ എത്രമാത്രം വേദനകൾ അനുഭവിച്ചു എന്ന് ഗലാട്ട തമിഴിന് നൽകിയ അഭിമുഖത്തിൽ ചിന്മയ് തുറന്നു പറഞ്ഞു. സാമ്പത്തികമായും മാനസികമായും ഒരുപാട് പ്രയാസങ്ങൾ അന്ന് നേരിട്ടു. ആ സമയത്ത് ബിസിനസ്സിനുണ്ടായ തകർച്ചയും വല്ലാതെ ബാധിച്ചു. അതെന്തോ കഷ്ടകാലം തന്നെയായിരുന്നു. ചെറുപ്പത്തിൽ ദൈവത്തോടുള്ള ദേഷ്യത്തിന്, ദൈവത്തിന്റെ ഫോട്ടോ വലിച്ചെറിഞ്ഞ ആളായിരുന്നു ഞാൻ. പക്ഷേ എന്റെ കഷ്ടകാലത്ത് ആശ്വാസം ക്ഷേത്രത്തിൽ പോയിരിക്കുന്നത് മാത്രമാണ്. ദൈവത്തിന് മുന്നിൽ കരഞ്ഞു പ്രാർത്ഥിച്ചിട്ടുണ്ട്.

Also Read: അങ്ങനെ ചെയ്യുന്നതിൽ മകൾ വഴക്ക് പറയും; 55 വയസ്സിലും സൗന്ദര്യം നിലനിർത്തുന്നത് എങ്ങനെയാണ് എന്ന ചോദ്യത്തിന് ശോഭനയുടെ മറുപടി

മാസം 20 പാട്ടുകൾ പാടിയിരുന്ന എനിക്ക് ആറ് മാസത്തിൽ 20 പാട്ടുകൾ പോലും കിട്ടാതെ വരിക എന്ന അവസ്ഥ വളരെ മോശമാണ്. പക്ഷേ അന്ന് പ്രതികരിച്ചതിൽ തെറ്റുണ്ട് എന്ന് ഇന്നും കരുതുന്നില്ല. എന്റെ ഭർത്താവിന്റെ പൂർണ സമ്മതത്തോടെയും അറിവോടെയുമാണ് പ്രതികരിച്ചത്. അദ്ദേഹവും, അദ്ദേഹത്തിന്റെ വീട്ടുകാരും എനിക്ക് പൂർണ പിന്തുണ നൽകി. അന്ന് ഞങ്ങൾ താമസിച്ചിരുന്ന വാടക വീടിന്റെ ഉടമകളുടെ പിന്തുണയും വളരെ വലുതാണ്. മാധ്യമങ്ങളും ആളുകളും എന്നും വീടിന് മുന്നിൽ വളഞ്ഞിട്ടിട്ടും, ഇറങ്ങിപ്പോകാൻ അവർ പറഞ്ഞില്ല. ഇങ്ങനെയുള്ളവരെയൊക്കെ വീട്ടിൽ താമസിപ്പിക്കണോ എന്ന് അവരുടെ ബന്ധുക്കൾ പോലും ചോദിച്ചിട്ടും അവർ ഞങ്ങൾക്ക് സപ്പോർട്ടീവായി നിന്നു.


ഒരു മാപ്പ് പറഞ്ഞ് പ്രശ്നം അവസാനിപ്പിച്ചുകൂടെ എന്ന് എന്നോട് ചോദിച്ചവരുണ്ട്, അതിന് എനിക്ക് താത്പര്യമില്ല. അനുഭവിച്ചത് ഞാനാണ്, അതിന് ആരുടെയും കാലിൽ വീണ് മാപ്പപേക്ഷിക്കില്ല. അന്ന് ഞാൻ തുറന്ന് പറഞ്ഞ സാഹചര്യത്തിൽ, കോംപ്രമൈസ് സംസാരിക്കാൻ വൈരമുത്തുവിന്റെ ടീം ബന്ധപ്പെട്ടിരുന്നു. കോംപ്രമൈസ് എന്ന് പറഞ്ഞാൽ എന്താണ് ഉദ്ദേശിക്കുന്നത്, പീഡിപ്പിച്ചതിന് ശേഷം കല്യാണം കഴിക്കാമെന്നോ എന്ന എന്റെ മറുചോദ്യത്തിന് ശേഷം അവർ വിളിച്ചില്ല. തെറ്റ് ചെയ്യാത്തവർ ആണെങ്കിൽ എന്താണ് എന്നെ കോംപ്രമൈസിന് വിളിച്ചത്. ഇന്നും ആ കേസിന്റെ നിയമനടപടികൾ നേരിടുകയാണ് ഞാൻ- ചിന്മയ് പറഞ്ഞു