നവീനുമായുള്ള പ്രണയത്തിന് വീട്ടില്‍ എതിര്‍പ്പുണ്ടായിരുന്നോ? എങ്ങനെ പ്രണയത്തിലായി; ഭാവന പറയുന്നു

Authored by: അശ്വിനി പി|Samayam Malayalam•19 Nov 2025, 3:55 pm

2018 ല്‍ ആണ് ഭാവനയുടെയും കന്നട സിനിമ നിര്‍മാതാവായ നവീന്റെയും വിവാഹം കഴിഞ്ഞത്. ജീവിതത്തില്‍ ഏറ്റവും അധികം പ്രതിസന്ധി ഘട്ടത്തിലൂടെ കടന്നു പോകുന്ന സമയത്തായിരുന്നു ഭാവനയുടെ വിവാഹം. അപ്രതീക്ഷിതമായി വന്ന ഒരു ദുരന്തവും, അതിന് ശേഷമുള്ള അച്ഛന്റെ മരണവും എല്ലാം ഭാവനയെ തളര്‍ത്തിയിരുന്നുെവങ്കിലും, ആ സമയത്ത് പിന്തുണയും കരുത്തും നല്‍കി കൂടെ നിന്ന ആളാണ് നവീന്‍ . വിവാഹത്തിന് അച്ഛന്റെ സാന്നിധ്യം ഉണ്ടായിരുന്നില്ല എന്നത് ഭാവനയുടെ വലിയ വേദനയായിരുന്നു.

2018 മുതല്‍ ഇതുവരെ പല തവണ നവീന്റെയും ഭാവന യുടെയും വിവാഹ മോചന വാര്‍ത്തകളും പുറത്തുവന്നിട്ടുണ്ട്. സോഷ്യല്‍ മീഡിയയില്‍ ഒന്നിച്ചു ഫോട്ടോ ഇടുന്നില്ല എന്ന് കരുതി ഇരുവരുടെയും ബന്ധത്തിന് യാതൊരു കോട്ടവും തട്ടിയിട്ടില്ല. ഞങ്ങള്‍ രണ്ടു പേരും ഒരുമിച്ചുള്ള സമയം ആസ്വദിക്കുകയാണ് ചെയ്യാറുള്ളത്, ആ സമയം ഫോട്ടോ എടുക്കാന്‍ വിട്ടു പോകും. അതുകൊണ്ടാണ് ഒരുമിച്ചുള്ള ഫോട്ടോകള്‍ അധികം പോസ്റ്റ് ചെയ്യാത്തത് എന്ന് അടുത്തിടെ ഭാവന വ്യക്തമാക്കിയിരുന്നു.

Also Read: കാവ്യയെ പോലെ ഭാവനയും! അതില്‍ വിഷമമില്ലേ എന്ന ചോദ്യം, ഹേയ് എന്തിന് എന്ന് ഭാവന; അറിഞ്ഞാല്‍ അല്ലേ വിഷമിക്കേണ്ടതുള്ളൂ

പിരിഞ്ഞു, പിരിഞ്ഞു എന്ന് പറയുന്ന ആ വിവാഹ ബന്ധത്തിലേക്ക് എത്തിയ തന്റെ പ്രണയത്തെ കുറിച്ച് ഏറ്റവുമൊടുവില്‍ ഭാവന സംസാരിച്ച ഒരു വീഡിയോ ആണ് ഇപ്പോള്‍ വൈറലാവുന്നത്. അമൃത ടിവിയിലെ ഒരു മ്യൂസിക് റിയാലിറ്റി ഷോയില്‍ അതിഥിയായി എത്തിയപ്പോഴാണ് നവീനുമായുണ്ടായ പ്രണയത്തെ കുറിച്ച് ഭാവന തുറന്ന് സംസാരിച്ചത്.

എന്റെ മൂന്നാമത്തെ കന്നട സിനിമയായിരുന്നു അത്, പ്രൊഡ്യൂസര്‍ നവീനാണ്. അങ്ങനെയാണ് ഞങ്ങള്‍ സംസാരിച്ചു തുടങ്ങുന്നത്. ഞാന്‍ ആ സമയത്ത് ഒരു ബ്രേക്കപ്പിന്റെ വേദനയിലായിരുന്നു. നവീനും ഒരു ബ്രേക്കപ് ഉണ്ടായി. അത് ഞങ്ങളെ കണക്ട് ചെയ്തു. പിന്നെ സംസാരിച്ചു തുടങ്ങി, പരസ്പരം നമ്പറുകള്‍ കൈമാറി. രണ്ടു പേരും പരസ്പരം ഒരു കോളിന് വേണ്ടിയും മെസേജിന് വേണ്ടിയും കാത്തിരിക്കുന്നുണ്ട് എന്ന് മനസ്സിലായപ്പോഴാണ്, ഇത് പ്രണയമാണ് എന്ന് ഞങ്ങള്‍ തിരിച്ചറിഞ്ഞത്. പിന്നെ അത് വീട്ടുകാരുടെ സമ്മതത്തോടെ വിവാഹത്തിലേക്ക് എത്തുകയായിരുന്നു

എതിര്‍പ്പുകള്‍ ഉണ്ടായിരുന്നോ എന്ന ചോദ്യത്തിന് ഹേയ് ഇല്ല എന്ന് ഭാവന വ്യക്തമാക്കി. എന്തും അച്ഛനോടും അമ്മയോടും തുറന്ന് പറയുന്ന ആളാണ് ഞാന്‍. അതുകൊണ്ട് തന്നെ നവീന്റെ കാര്യവും തുടക്കത്തിലേ പറഞ്ഞിരുന്നു, അവര്‍ക്ക് എതിര്‍പ്പുകള്‍ ഉണ്ടായിരുന്നില്ല. ഭാഷയൊന്നും ഞങ്ങള്‍ക്കിടയിലെ വിഷയമല്ല. നവീന് മലയാളം അറിയില്ല, എനിക്ക് കന്നടയും. തമിഴും ഇംഗ്ലീഷും ഒക്കെ കലര്‍ത്തിയാണ് ഞങ്ങള്‍ സംസാരിക്കുന്നത്. ഇപ്പോള്‍ പതിയെ സംസാരിച്ചാല്‍ നവീന് മലയാളം മനസ്സിലാവും, ഞാനും കന്നട പഠിച്ചുകൊണ്ടിരിക്കുന്നു- ഭാവന പറഞ്ഞു