മണിച്ചിത്രത്താഴിലെ ജ്യോതികയുടെ ഡാന്‍സ് എങ്ങനെയുണ്ടായിരുന്നു എന്ന ചോദ്യത്തിന് ശോഭന നല്‍കിയ മറുപടി!

Authored byഅശ്വിനി പി | Samayam Malayalam | Updated: 29 Mar 2025, 4:53 pm

Samayam Malayalamജ്യോതികയുടെ അഭിനയത്തെ കുറിച്ച് ചോദിച്ചപ്പോൾ ശോഭന പറഞ്ഞത്

മലയാളത്തിലെ എക്കാലത്തെയും മികച്ച സിനിമയാണ് 1993 ല്‍ പുറത്തിറങ്ങിയ മണിച്ചിത്രത്താഴ്. ശോഭന അതുല്യമാക്കിയ ഒട്ടനവധി കഥാപാത്രങ്ങള്‍ മലയാളത്തിലുണ്ട് എങ്കിലും, മണിച്ചിത്രത്താഴിലെ നാഗവല്ലി കഴിഞ്ഞിട്ടേ മറ്റെന്തുമുള്ളൂ. ശോഭന അത് എത്രത്തോളം ഗംഭീരമാക്കി എന്ന് ഏറ്റവും വ്യക്തമായി പ്രകടമായത് ഇതേ സിനിമ തമിഴ്, തെലുങ്ക്, കന്നട, ഹിന്ദി ഭാഷകളില്‍ റീമേക്ക് ചെയ്യപ്പെട്ടപ്പോഴാണ്.

തനിക്കെന്തോ സംഭവിക്കുന്നുണ്ട് എന്ന് ഗംഗ തിരിച്ചറിയുന്ന ആ നിമിഷം ചിത്രത്തില്‍ വളരെ പ്രധാനമാണ്. 'ഉന കൊന്ന് ഉന്‍ രത്തത്തെ കുടിപ്പേന്‍' എന്ന് പറഞ്ഞ് കട്ടിലെടുത്ത് പൊക്കുന്നതെല്ലാം മലയാളത്തില്‍ തീര്‍ത്തും നാച്വറലായിരുന്നു. മറ്റ് ഭാഷകളിലേക്ക് എത്തിയപ്പോള്‍ ആ നാച്വറാലിറ്റി നഷ്ടപ്പെട്ടു എന്ന് മാത്രമല്ല, നടിമാരുടെ ഓവര്‍ ആക്ടിങും വിമര്‍ശിക്കപ്പെട്ടു.

Also Read: കല്യാണം കഴിക്കാന്‍ പോകുന്ന ആളെ പരിചയപ്പെടുത്തി അഭിനയ; ഏറ്റവും എളുപ്പത്തില്‍ പറഞ്ഞ 'യെസ്' ഇതാണ്, നാളുകളെണ്ണി കാത്തിരിക്കുന്നു!

അതേ സമയം തമിഴില്‍ ചന്ദ്രമുഖി എന്ന ചിത്രത്തിന് ഗംഭീര സ്വീകരണം ലഭിച്ചിരുന്നു. ജ്യോതികയുടെ അഭിനയത്തെയും ശോഭനയുടെ അഭിനയത്തെയും താരതമ്യപ്പെടുത്താന്‍ കഴിയില്ല എങ്കിലും, ഒരു ഡാന്‍സര്‍ അല്ലാതിരുന്നിട്ടും ജ്യോതിക അത് ഗംഭീരമാക്കി. കല മാസ്റ്റര്‍ ആയിരുന്നു അതിന്റെ ഡാന്‍സ് കൊറിയോഗ്രാഫര്‍. ഒരു അഭിമുഖത്തില്‍ കല മാസ്റ്റര്‍ വളരെ അഭിമാനത്തോടെയാണ് ചന്ദ്രമുഖിയിലെ ജ്യോതികയുടെ ഡാന്‍സ് പെര്‍ഫോമന്‍സിനെ കുറിച്ച് ശോഭനയോട് ചോദിയ്ക്കുന്നത്.

വിദ്യാ ജി (വിദ്യ ബാലന്‍) ചെയ്ത ഹിന്ദി റീമേക്ക് കണ്ടിരുന്നുവെങ്കിലും തമിഴ്, കന്നട ഞാന്‍ കണ്ടിട്ടില്ല. കാണാം എന്നാണ് ശോഭന പറഞ്ഞത്. വളരെ ഗംഭീരമായി ജ്യോതിക ചെയ്തു എന്ന് പറഞ്ഞപ്പോള്‍ ശോഭന ചിരിച്ചു. ജ്യോതികയ്ക്ക് ഭയങ്കര ടെന്‍ഷനായിരുന്നു, താങ്കളെ കുറിച്ച് പറഞ്ഞുകൊണ്ടേയിരുന്നു, ആ റേഞ്ചിനൊന്നും അവര്‍ എത്തുകയേ ഇല്ല എന്ന ടെന്‍ഷനായിരുന്നു - എന്ന് കല മാസ്റ്റര്‍ പറഞ്ഞപ്പോള്‍, എന്തിനാണ് ടെന്‍ഷനടിക്കുന്നത് നിങ്ങളല്ലേ കൂടെയുള്ളത് എന്നായിരുന്നു ശോഭനയുടെ പ്രതികരണം.

മൂപ്പത് വര്‍ഷങ്ങള്‍ക്ക് ശേഷം മണിച്ചിത്രത്താഴ് 4കെ റിലീസിന് ശേഷം മറ്റ് ഭാഷകളില്‍ ചെയ്ത റീമേക്ക് ചിത്രങ്ങളില്‍ ഏതാണ് ഏറ്റവും ഇഷ്ടം എന്ന് ചോദിച്ചപ്പോള്‍, എനിക്ക് എന്നെ തന്നെയാണ് ഇഷ്ടപ്പെട്ടത് എന്നായിരുന്നു ശോഭനയുടെ പ്രതികരണം. മണിച്ചിത്രത്താഴ് എന്ന ചിത്രം നല്‍കിയ മനോഹരഹമായ ഓര്‍മകളും ശോഭന പങ്കുവയ്ക്കുന്നുണ്ട്.