മരണം അവസാന യാത്രയല്ല എന്ന് ലാല്‍, ശ്രീനിയേട്ടനില്ലാതെ എന്റെ ജീവിതം അപൂര്‍ണമെന്ന് ദിലീപ്; താരങ്ങള്‍ പ്രതികരിക്കുന്നു

കാലാതിവര്‍ത്തിയാകുക എന്നതാണ് ഒരു കലാകാരന് ഈ ഭൂമിയില്‍ അവശേഷിപ്പിക്കാനാകുന്ന ഏറ്റവും മനോഹരമായ അടയാളം. എഴുത്തിലും അഭിനയത്തിലും സംവിധാനത്തിലും ശ്രീനിയേട്ടന് അത് സാധിച്ചു. അങ്ങനെ, ഒരുതരത്തില്‍ അല്ല പലതരത്തിലും തലത്തിലും അദ്ദേഹം കാലത്തെ അതിജീവിക്കുന്നു. വ്യക്തിപരമായ ഓര്‍മകള്‍ ഒരുപാട്. എന്തുപറഞ്ഞാലും അവസാനം ഒരു ഉച്ചത്തിലുള്ള ചിരിയില്‍ അവസാനിപ്പിക്കുന്ന ശ്രീനിയേട്ടന്‍ ഇതാദ്യമായി എന്നെ കരയിപ്പിക്കുകയാണ്. പക്ഷേ ഇല്ലാതാകുന്നത് ഒരു ശരീരം മാത്രമാണെന്നും ആ പേര് ഇനിയും പല കാലം പലതരത്തില്‍ ഇവിടെ ജീവിക്കും എന്നും വിശ്വസിച്ചു കൊണ്ട് അന്ത്യാഞ്ജലി.

ചിരിച്ചും ചിന്തിപ്പിച്ചും മലയാളി മനസ്സില്‍ നിറഞ്ഞു നിന്ന ശ്രീ ശ്രീനിവാസന്‍ വിട വാങ്ങീ.ശ്രീനിയേട്ടാ ഇവിടെ ഞങ്ങള്‍ക്ക് തന്നിട്ട് പോയ ഉത്തമ സിനിമകളിലൂടെ എന്നും നിങ്ങള്‍ ഓര്‍മിപ്പിക്കപ്പെടും. ആദരാജ്ഞലികള്‍- എന്നാണ് രാജസേനന്‍ എഴുതിയത്

പ്രിയപ്പെട്ട ശ്രീനിയേട്ടന് വിട, സ്‌നേഹത്തോടെ ഉപദേശിക്കാനും, പരിഭവം തോന്നാത്തവിധം വഴക്ക് പറയാനും ഇനി ശ്രീനിയേട്ടന്‍ ഇല്ല. എന്നും ഹൃദയത്തോട് ചേര്‍ത്ത് നിര്‍ത്തിയ ഒരാള്‍ ഇനി ഇല്ല എന്നറിയുമ്പോള്‍ വാക്കുകള്‍ മുറിയുന്നു.... സ്വന്തം പ്രവര്‍ത്തന മേഖലയില്‍ ഇത്രയേറെ മികവ് തെളിയിച്ച മറ്റൊരാള്‍ ഉണ്ടോ എന്ന് തന്നെ സംശയം. എന്റെ ജീവിതത്തിലും, മലയാള സിനിമയിലും ശ്രീനിയേട്ടന്റെ സാന്നിധ്യം ഇല്ലാത്ത ശൂന്യത വളരെ വലുതായിരിക്കും. ആദരാഞ്ജലികള്‍

ശ്രീനി അങ്കിള്‍, ഈ ദുഃഖ വാര്‍ത്ത കേട്ടുകൊണ്ടാണ് ഇന്നുണര്‍ന്നത്. എനിക്കുറപ്പാണ്, കുടുംബത്തിലെ ഏറ്റവും വേണ്ടപ്പെട്ട ഒരാള്‍ പോയതുപോലെ ഒരു വേദന നമുക്കോരോരുത്തര്‍ക്കും ഉണ്ടാവും. കാരണം ഒരു നടന്‍ എന്നതിനപ്പുറം അദ്ദേഹം നമുക്കെല്ലാം സ്വന്തമാണ്. അദ്ദേഹത്തിന്റെ സിനിമകള്‍ കണ്ടുകൊണ്ടാണ് ഒരു തലമുറ മുഴുവന്‍ വളര്‍ന്നത്- അദ്ദേഹത്തിനെ അഭിമുഖം ചെയ്ത ഓര്‍മകളൊക്കെ പേളി മാണി പങ്കുവയ്ക്കുന്നു.

ശ്രീനി അങ്കിലിന് ആദരാഞ്ജലികള്‍. ഒരു മികച്ച എഴുത്തുകാരനും ധീരനായ മനുഷ്യനും, അനായാസമായ നര്‍മ്മബോധമുള്ള ആളും. എപ്പോഴും വാക്കുകളില്‍ തുറന്നുപറയുന്ന, സത്യസന്ധനുമായ വ്യക്തി, തന്റെ മനസ്സിലുള്ളത് തുറന്നുപറയാന്‍ ഒരിക്കലും മടിക്കാത്ത വ്യക്തി. ഞാന്‍ എപ്പോഴും അദ്ദേഹത്തെ അത്ഭുതത്തോടെ നോക്കികാണുന്നു. നമ്മെ വിട്ടുപോയിയെങ്കിലും അദ്ദേഹത്തിന്റെ വാക്കുകളും ഊഷ്മളതയും ആത്മാവും എന്നും നിലനില്‍ക്കും.

എന്തൊരു അസാധാരണമായ കഴിവുള്ള നടനാണ്, എന്തൊരു അസാധാരണമായ ജീവിതമാണ് അദ്ദേഹം ജീവിച്ചത്. പ്രാര്‍ത്ഥിക്കുന്നു.. സ്‌നേഹവും നന്ദിയും മാത്രം. നിങ്ങളുടെ മികച്ച കലാസൃഷ്ടിയ്ക്ക് നന്ദി- എന്നാണ് മീര ജാസ്മിന്‍ കുറിച്ചത്.