മറ്റെന്തെങ്കിലും പണിക്ക് പോകൂ? പ്രണയ ​ഗോസിപ്പുകൾ പടച്ചുവിട്ടവരോട് KATSEYE താരം മനോണിന്റെ പ്രതികരണം

Authored by: അശ്വിനി പി|Samayam Malayalam•10 Sept 2025, 3:31 pm

ഡാനിയേല, ലാറ, മനോൺ , മേഗൻ, സോഫിയ, യൂഞ്ചെ എന്നിങ്ങനെ ആറ് പെൺകുട്ടികൾ അടങ്ങുന്ന അമേരിക്കൻ മ്യൂസിക് ബാന്റാണ് KATSEYE. സംഗീത ലോകത്ത് പുതിയ നേട്ടങ്ങളും വിജയങ്ങളും നേടി ഈ ആറ് പെൺകുട്ടികളും കുതിക്കുകയാണ്. ഇവരുടെ ടച്ച് എന്ന പുതിയ ആൽബത്തിന് വലിയ സ്വീകരണവും ലഭിച്ചിരുന്നു.

എംടിവിയുടെ മ്യൂസിക് വീഡിയോ അവാർഡ് 2025 ലും KATSEYE-യുടെ മിന്നുന്ന പ്രകടനം ശ്രദ്ധ നേടി. ഇതിനിടയിലാണ് ടീമിലെ അംഗമായ മനോണിനെ കുറിച്ചുള്ള പ്രണയ ഗോസിപ്പുകൾ വന്നത്. ഓസ്ട്രേലിയൻ റാപ്പറും ഗായകനുമായ കിഡ് ലറോയിയുമായി പ്രണയത്തിലാണെന്ന്. ഇരുവരും ഒന്നിച്ച് ഒരു പാർട്ടിയ്ക്ക് പങ്കെടുത്ത ഫോട്ടോകൾ പ്രചരിച്ചതിന് പിന്നാലെയാണ് പ്രണയ ഗോസിപ്പുകൾ വന്നത്.

Also Read: ഉർവശിയ്ക്ക് വേണ്ടി എഴുന്നേറ്റ് നിന്ന് കൈയ്യടിച്ച് കമൽ ഹാസൻ, എന്റെ കണ്ണ് നിറയുന്നു എന്ന് ഉർവശി; മകൾ ജനിച്ചതിന് ശേഷം ഇതാദ്യമായിട്ടാണ്

കഴിഞ്ഞ ദിവസം നടന്ന അവാർഡ് നിശയിൽ എല്ലാവരെയും കണ്ടുമുട്ടിയതിനെ കുറിച്ചൊക്കെ ആരാധകരുമായി സംവദിക്കുന്നതിനിടയിലാണ് തന്നെയും ഓസ്ട്രേലിയൻ ഗായകനെയും സംബന്ധിച്ച് വന്ന പ്രണയ ഗോസിപ്പുകൾക്ക് ഗായിക മറുപടി നൽകിയത്. വാസ്തവത്തിൽ ഞാൻ നടക്കുമ്പോൾ ആരൊക്കെ കൂടെയുണ്ടായിരുന്നോ, അവരൊക്കെയുമായി ഡേറ്റിങിൽ ആണെന്നാണ് മനോൺ പറഞ്ഞത്.

മനോണും കിഡ് ലറോയിയും ഒരുമിച്ച് നടക്കുന്ന ഫോട്ടോകൾ മാത്രമാണ് പുറത്തുവന്നത്. അതിന്റെ അടിസ്ഥാനത്തിലാണ്, തീർത്തും അടിസ്ഥാന രഹിതമായ ഒരു ഗോസിപ്പ് വന്നത്. സാധാരണയുള്ള ഒരു നടത്തത്തെ വളച്ചൊടിച്ചതിനെ ഗായിക പരിഹസിച്ചു. മറ്റെന്തെങ്കിലും പണിക്ക് പോകൂ എന്നാണ് ഗോസിപ്പുകൾ പടച്ചുവിട്ടവരോട് മനോൺ പറയുന്നത്.

Also Read: 47 ആയത്രേ 25 കാരിയുടെ അമ്മ! അറിയുമോ ഈ നിത്യഹരിത നായികയുടെ ബ്യൂട്ടി ആൻഡ് ഹെൽത്ത് സീക്രട്ട്സ്; മഞ്ജു വാര്യരുടെ ചിട്ടകൾ

KATSEYE- ലെ പെൺകുട്ടികൾ അവരുടെ ഇഷ്ടാനിഷ്ടങ്ങളെക്കുറിച്ച് വളരെ തുറന്ന് സംസാരിക്കുന്നവരാണ്. സൗഹൃദങ്ങളെ കുറിച്ചും ബന്ധങ്ങളെ കുറിച്ചും എല്ലാം ഇതുവരെ തുറന്ന് സംസാരിച്ചിട്ടുണ്ട്. ബ്ലാക്ക് പിങ്ക് പോലുള്ള കെ പോപ് താരങ്ങളെ അപേക്ഷിച്ച് KATSEYE- ലെ താരങ്ങൾക്കുള്ള ഏറ്റവും വലിയ പ്രത്യേകതയും ഇതാണ്. അങ്ങനെയുള്ള ഒരു ഗ്രൂപ്പിലെ അംഗമായ മനോൺ തനിക്ക് ഒരു പ്രണയ ബന്ധം ഉണ്ടെങ്കിൽ അത് തുറന്ന് പറയാൻ മടിക്കില്ല എന്ന് ആരാധകർക്ക് ഉറപ്പാണ്.
അതേസമയം, കിഡ് ലാറോയ് നേരത്തെ ടേറ്റ് മക്‌റേയുമായി ഡേറ്റിങിൽ ആയിരുന്നു ആ ബന്ധം വേർപിരിഞ്ഞതിന് ശേഷം മറ്റൊരു ഗോസിപ്പു കോളത്തിലും ഗായകന്റെ പേര് വന്നിട്ടില്ല. ഈ സാഹചര്യത്തിലാണ് മനോണിനൊപ്പമുള്ള പ്രണയ ഗോസിപ് പുറത്തുവന്നത്. എന്തായാലും അത് വ്യാജമാണെന്ന് ഗായിക വ്യക്തമാക്കി.