രണ്ടുകുഞ്ഞുങ്ങളുടെ അച്ഛനാണ്! സിംഗിൾ പേരന്റ്; ഗേ ആണെന്ന് പറയാതെ പറഞ്ഞ കരൺ; ഐഡന്റിറ്റി വെളിപ്പെടുത്താതിനു പിന്നിൽ

കഴിഞ്ഞ മൂന്നു പതിറ്റാണ്ടുകളായി ബോളിവുഡിന്റെ നെടുംതൂണുകളിൽ ഒന്നാണ് കരൺ ജോഹർ . പിതാവ് യാഷ് ജോഹറിന്റെ പാത പിന്തുടർന്ന് ബോളിവുഡ് വ്യവസായത്തിലെത്തിയ രാഹുൽ കുമാർ ജോഹർ എന്ന കരൺ, രചന സംവിധാനം നിർമാണം തുടങ്ങി വിവിധ മേഖലകളിൽ തിളങ്ങുകയും, ഒട്ടനവധി ഹിറ്റുകൾ സമ്മാനിക്കുകയും ചെയ്തിട്ടുണ്ട്. നെപോട്ടിസം അടക്കം ഒട്ടനവധി വിവാദങ്ങളിൽ ഉൾപ്പെടുകയും ചെയ്തിട്ടുണ്ട് കരൺ.

മുൻനിര താരങ്ങളോടെല്ലാം വ്യക്തിപരമായി അടുത്ത ബന്ധം കാത്തു സൂക്ഷിക്കുന്ന കരൺ, താരങ്ങളുടെ രഹസ്യം സൂക്ഷിപ്പുകാരനായാണ് അറിയപ്പെടുന്നതും. ഷാരൂഖ്, അക്ഷയ് കുമാർ, കാജോൾ, റാണി മുഖർജി തുടങ്ങി യുവതലമുറയിലെ താരങ്ങളായ ജാൻവി, വരുൺ ധവാൻ തുടങ്ങിയവരോടും വളരെ അടുത്ത ബന്ധം പുലർത്തുന്ന വ്യക്തിയാണ് കരൺ. ബോളിവുഡ് താരങ്ങളുടെ പ്രണയകഥകളിൽ എല്ലാം നിർണായകമായ ഇടപെടലുകൾ നടത്തിയിട്ടുള്ള കരൺ ജീവിതത്തിലിതുവരെ ഒരു പ്രണയബന്ധത്തിൽ ഏർപ്പെട്ടിട്ടില്ല എന്നും തുറന്നു പറഞ്ഞിരുന്നു.

"ഞാൻ ഒരിക്കലും ഒരു ബന്ധത്തിലും ഏർപ്പെട്ടിട്ടില്ല. എന്റെ ജീവിതത്തിൽ ഒരു പങ്കാളിയും ഉണ്ടായിട്ടില്ല. സീരിയസ് എന്ന് കരുതാവുന്ന ഒരു ബന്ധവും എനിക്കുണ്ടായിരുന്നില്ല, ദീർഘകാല സ്വഭാവമുള്ള ഒന്നും ഉണ്ടായിട്ടില്ല. പക്ഷേ എനിക്ക് ഒരു സെക്ഷ്വൽ ലൈഫ് ഉണ്ടായിരുന്നു." കരൺ സ്വന്തം ആത്മകഥയിൽ വെളിപ്പെടുത്തി.

"ഞാൻ ഒരു അഭിമാനിയായ മനുഷ്യനാണ്. എനിക്ക് ഒന്നും മറച്ചുവെക്കാനില്ല. പക്ഷേ ലോകം എന്നിൽ നിന്നും കേൾക്കാൻ ആഗ്രഹിക്കുന്ന മൂന്ന് വാക്കുകൾ പറയാൻ ഞാൻ ആഗ്രഹിക്കുന്നില്ല, കാരണം സത്യസന്ധമായ വെളിപ്പെടുത്തൽ നടത്തിയാൽ എന്നെ തടവിലാക്കാൻ സാധ്യതയുള്ള ഒരു രാജ്യത്താണ് ഞാൻ ജീവിക്കുന്നത്." സ്വന്തം ഐഡന്റിറ്റിയെ കുറിച്ചുള്ള ചർച്ചകളെ സൂചിപ്പിച്ചു കൊണ്ട് കരൺ പറഞ്ഞു.

ALSO READ: 40 സിനിമകളിൽ നിന്നും വെട്ടി കളഞ്ഞ ജിബിൻ! മധുപോറ്റിയായി വേഷപ്പകർച്ച; പോലീസ് ഓഫീസർ സിനിമ നടൻ ആയതിങ്ങനെ

പ്രശസ്ത ബോളിവുഡ് താരം കാജോളിന്, അക്ഷയ് കുമാറിനോട് ക്രഷ് ഉണ്ടായിരുന്നു എന്നൊരിക്കൽ വെളിപ്പെടുത്തിയ കരൺ, തനിക്കും അക്ഷയ് കുമാറിനോട് ക്രഷ് ഉണ്ടായിരുന്നത് കൊണ്ട് ഇരുവരും ചേർന്ന് അദ്ദേഹത്തെ ഒരു പാർട്ടിക്കിടയിൽ തേടി നടന്ന സംഭവവും ഒരു ടോക് ഷോയിൽ വെളിപ്പെടുത്തിയിരുന്നു. ബോണി കപൂർ കുടുംബത്തിലെ ഒരാളുമായി ഇന്റിമേറ്റ് ബന്ധം സ്ഥാപിക്കുന്നതിനെ കുറിച്ച് താൻ പലപ്പോഴും ചിന്തിച്ചിരുന്നതായും കരൺ ഈയിടെ പറഞ്ഞിരുന്നു.

2017 ൽ പുറത്തിറങ്ങിയ കരണിന്റെ ആത്മകഥ ആൻ അൺ സ്യൂട്ടബിൾ ബോയ് എന്ന പുസ്തകത്തിൽ കരൺ കുറിച്ചത് ഇങ്ങനെ "എന്റെ ഐഡന്റിറ്റി എന്താണെന്ന് എല്ലാവർക്കും അറിയാം. ഞാൻ അത് ഉറക്കെ പറയേണ്ടതില്ല. സ്വന്തം ലൈംഗീക താല്പര്യങ്ങൾ തുറന്നു പറഞ്ഞാൽ ഞാൻ മാത്രമാകില്ല ഈ രാജ്യത്തു തുറങ്കിലടയ്ക്കപ്പെടുന്നത്. അതിനാൽ തന്നെ എല്ലാവര്ക്കും എന്നെ കുറിച്ചറിയാവുന്ന കാര്യം ഞാൻ വെളിപ്പെടുത്താതിരിക്കുന്നു."

2017 ൽ വാടക ഗർഭധാരണ പ്രകിയ വഴി രണ്ടു കുട്ടികളുടെ പിതാവായി മാറിയ കരൺ കുട്ടികൾക്ക് യാഷ്, റൂഹി എന്നാണ് പേരിട്ടത്. കരണിന്റെ മാതാവ് ഹീരൂവിന്റെ പേരിൽ നിന്നാണ് റൂഹി എന്ന പേരദ്ദേഹം സ്വീകരിച്ചത്. "ഒരു പേരന്റ് എന്ന നിലയിൽ വരുന്ന എല്ലാ ഉത്തരവാദിത്തങ്ങളും കടമകളും പരിഗണിച്ച് ഞാൻ എടുത്ത വൈകാരികവും എന്നാൽ നന്നായി ചിന്തിച്ചതുമായ ഒരു തീരുമാനമാണിത്... എന്റെ അമ്മ എനിക്ക് നൽകിയ എല്ലാ സ്നേഹവും കരുതലും ഉപയോഗിച്ച് എന്റെ കുട്ടികളെ വളർത്താൻ എന്നെ സഹായിക്കും." എന്നാണ് അദ്ദേഹം മാധ്യമങ്ങളോട് പറഞ്ഞത്.