രാജസ്ഥാൻ റോയൽസിൽ നിന്ന് ഈ താരങ്ങൾ പുറത്താകും, സഞ്ജുവിന്റെ ടീമിൽ വമ്പൻ അഴിച്ചുപണി ഉറപ്പ്; ആകാംക്ഷയിൽ ആരാധകർ

Curated by: ഗോകുൽ എസ്|Samayam Malayalam•22 May 2025, 6:20 pm

2025 സീസൺ ഐപിഎല്ലിൽ ( IPL 2025 ) ആരാധകരെ വലിയ രീതിയിൽ നിരാശപ്പെടുത്തിയ ടീമാണ് സഞ്ജു സാംസണിന്റെ ( Sanju Samson ) രാജസ്ഥാൻ റോയൽസ്‌‌‌. 14 മത്സരങ്ങളിൽ ആകെ നാല് വിജയങ്ങൾ മാത്രം നേടാനായ അവർക്ക് എട്ട് പോയിന്റ് മാത്രമാണ് അക്കൗണ്ടിലുള്ളത്‌‌‌. ഈ സീസണിൽ ടീമിന് പ്രതീക്ഷിച്ച മികവിലേക്ക് ഉയരാൻ സാധിക്കാതെ പോയതിന് കാരണങ്ങൾ പലതാണ്‌. മെഗാ ലേലത്തിലെ പാളിച്ചകൾ മുതൽ സൂപ്പർ താരങ്ങളുടെ പരിക്കുകൾ വരെ ടീമിന് പണിയായി. നിരാശാജനകമായ സീസൺ പല കടുത്ത തീരുമാനങ്ങളുമെടുക്കാൻ റോയൽസ് മാനേജ്മെന്റിനെ നിർബന്ധിതരാക്കും. എന്തായാലും ഈ സീസണ് ശേഷം ടീമിൽ വലിയ അഴിച്ചുപണികൾ ഉറപ്പാണ്. നിലവിലെ സാഹചര്യങ്ങൾ പരിശോധിക്കുമ്പോൾ 2026 സീസൺ ഐപിഎല്ലിന് മുൻപ് റോയൽസ് ടീമിൽ നിന്ന് ഒഴിവാക്കാൻ സാധ്യതയുള്ള താരങ്ങളെ നോക്കാം.

2025 സീസൺ ഐപിഎല്ലിന്റെ മെഗാ താരലേലത്തിന് മുന്നോടിയായി രാജസ്ഥാൻ റോയൽസ് ടീമിൽ നിലനിർത്തിയ താരമാണ് ഷിംറോൺ ഹെറ്റ്മെയർ. 11 കോടി രൂപയാണ് ഈ വിൻഡീസ് താരത്തെ റിട്ടെയിൻ ചെയ്യാൻ രാജസ്ഥാൻ മുടക്കിയത്. എന്നാൽ ഈ സീസണിൽ റോയൽസിൽ ഏറ്റവും വലിയ പരാജയമായി മാറിയത് ഹെറ്റ്മെയറായിരുന്നു. 14 കളികളിൽ നിന്ന് 239 റൺസാണ് ഇക്കുറി ഹെറ്റി യുടെ സമ്പാദ്യം. രാജസ്ഥാൻ അവരുടെ പ്രധാന ഫിനിഷറായി കണക്കാക്കിയിരുന്ന ഹെറ്റിക്ക് ടീമിനായി കാര്യമായ‌ സംഭാവന നൽകാനായില്ല. വമ്പൻ തുകക്ക് വാങ്ങിയ ഹെറ്റിയെ ഈ സീസണ് ശേഷം രാജസ്ഥാൻ റിലീസ് ചെയ്യുമെന്നാണ് കരുതപ്പെടുന്നത്.


ഈ സീസണിൽ പല കളികളിലും രാജസ്ഥാൻ റോയൽസിന്റെ ഇമ്പാക്ട് പ്ലേയറായിരുന്നു ശുഭം ദുബെ. നിർണായക ഘട്ടങ്ങളിൽ ഫിനിഷറായാണ് റോയൽസ് പലപ്പോളും ഈ ഇടം കൈയ്യൻ ബാറ്ററെ കളത്തിൽ ഇറക്കിയത്. എന്നാൽ ടീമിന്റെ പ്രതീക്ഷകൾക്കൊത്ത് ഉയരാൻ ഈ യുവ താരത്തിന് ലഭിച്ചില്ല. ഒൻപത് കളികളിൽ 106 റൺസ് മാത്രമായിരുന്നു താരം നേടിയത്. ഇനിയൊരു സീസണിൽ ഈ യുവ ബാറ്റർ രാജസ്ഥാൻ റോയൽസിന് ഒപ്പമുണ്ടാകാൻ സാധ്യതയില്ല.

നാണക്കേടിന്റെ ലോക റെക്കോഡുമായി രാജസ്ഥാൻ റോയൽസിന്റെ വിദേശ സൂപ്പർ താരം; ഫ്ലോപ് സീസണിൽ അതിദയനീയ റെക്കോഡ്
കഴിഞ്ഞ ഐപിഎൽ മെഗാ ലേലത്തിൽ നിന്ന് രാജസ്ഥാൻ റോയൽസ് വൻ തുകക്ക് സ്വന്തമാക്കിയ താരമാണ് തുഷാർ ദേഷ്പാണ്ടെ. വലംകൈയ്യൻ പേസറായ ദേഷ്പാണ്ടെയെ 6.5 കോടി രൂപക്കാണ് റോയൽസ് വാങ്ങിയത്. എന്നാൽ 2025 സീസൺ ഐപിഎല്ലിൽ താരം ഫ്ലോപ്പായി. ഇക്കുറി കളിച്ച ഒൻപത് മത്സരങ്ങളിൽ നിന്ന് 10 വിക്കറ്റുകൾ മാത്രമാണ് ദേഷ്പാണ്ടെക്ക് നേടാനായത്. 10.62 എന്ന‌ മോശം എക്കോണമിയാണ് ഇക്കുറി താരത്തിന്റേത്. ദയനീയ സീസണ് ശേഷം താരത്തെ റോയൽസ് ടീമിൽ നിന്ന് ഒഴിവാക്കാൻ സാധ്യത കൂടുതലാണ്.

2025 ലെ ഐപിഎൽ മെഗാലേലത്തിൽ രണ്ട് കോടി രൂപക്ക് രാജസ്ഥാൻ റോയൽസ് സ്വന്തമാക്കിയ താരമാണ് ഫസൽഹഖ് ഫറൂഖി‌. അഞ്ച് മത്സരങ്ങളാണ് ഈ സീസണിൽ താരം അവർക്കായി കളിച്ചത്‌. എന്നാൽ ഒരു വിക്കറ്റ് പോലും നേടാനായില്ല. ഇതുപോലൊരു ദയനീയ പ്രകടനം കാഴ്ച വെച്ച താരത്തെ 2025 സീസണ് ശേഷം രാജസ്ഥാൻ റോയൽസ് ടീമിൽ നിന്ന് ഒഴിവാക്കുമെന്ന കാര്യം ഉറപ്പാണ്.

അവസാന കളിയിലും റെക്കോഡ്, വീണ്ടും ഞെട്ടിച്ച് വൈഭവ് സൂര്യവംശി; രാജസ്ഥാൻ റോയൽസ് താരത്തിന്റെ നേട്ടം ഇങ്ങനെ
ശ്രീലങ്കൻ സ്പിന്നറായ മഹീഷ തീക്ഷണയും അടുത്ത സീസണിൽ രാജസ്ഥാൻ റോയൽസ് ടീമിലുണ്ടാകാൻ സാധ്യത ജുറവാണ്. 11 കളികളിൽ നിന്ന് 11 വിക്കറ്റുകളായിരുന്നു ഇക്കുറി താരത്തിന്റെ സമ്പാദ്യം. 9.76 ആയിരുന്നു എക്കോണമി.