രാജസ്ഥാൻ വിട്ട് കെകെആറിൽ എത്തിയാൽ സഞ്ജുവിന് കോളടിക്കും; കാത്തിരിക്കുന്നത് വമ്പൻ നേട്ടങ്ങൾ

Samayam Malayalam•21 Aug 2025, 2:06 pm

ഇന്ത്യൻ പ്രീമിയർ ലീഗിന്റെ 2026 സീസണിന് മുന്നോടിയായുള്ള താരങ്ങളുടെ കൂടുമാറ്റ ചർച്ചകൾ വളരെ സജീവമാണ്. പല വമ്പൻ താരങ്ങളുടേയും കൂടുമാറ്റം വരുന്ന സീസണിന് മുന്നോടിയായി നടക്കാനുള്ള സാധ്യത കൂടുതലാണ്. സമീപ ദിവസങ്ങളിലായി കൂടുമാറ്റ വാർത്തകളിൽ സജീവമായി നിൽക്കുന്നത് സഞ്ജു സാംസണാണ്. രാജസ്ഥാൻ റോയൽസ് നായകനും സൂപ്പർ ഓപ്പണറുമായ സഞ്ജു രാജസ്ഥാൻ വിടാൻ പോവുകയാണെന്ന തരത്തിലുള്ള അഭ്യൂഹങ്ങൾ ശക്തമാണ്. വമ്പന്മാരായ സിഎസ്കെ സഞ്ജുവിനെ വാങ്ങാൻ താൽപര്യം കാട്ടി രംഗത്തെത്തിയെങ്കിലും രാജസ്ഥാൻ മുന്നോട്ട് വെച്ച ആവശ്യങ്ങൾ അംഗീകരിക്കാനാവാത്തതിനാൽ സിഎസ്കെ സഞ്ജുവിനെ ടീമിലേക്കെത്തിക്കാനുള്ള നീക്കത്തിൽ നിന്ന് പിന്നോട്ട് പോവുകയായിരുന്നു.


സിഎസ്കെയുടെ പിന്മാറ്റത്തിന് പിന്നാലെ കൊൽക്കത്ത നെെറ്റ് റെെഡേഴ്സ് സഞ്ജുവിനെ ടീമിലെത്തിക്കാൻ താൽപര്യം അറിയിച്ച് രംഗത്തെത്തിയിട്ടുണ്ടെന്നാണ് റിപ്പോർട്ടുകൾ പുറത്തുവരുന്നത്. രാജസ്ഥാൻ റോയൽസിലേക്കെത്തുന്നതിന് മുമ്പ് തന്നെ സഞ്ജു കെകെആറിന്റെ ഭാഗമായിരുന്നു. എന്നാൽ കളിക്കാൻ അവസരം ലഭിക്കാതെ തഴയപ്പെടുകയായിരുന്നു. ഇപ്പോൾ രാജസ്ഥാന്റെ നായകസ്ഥാനമൊഴിഞ്ഞ് സഞ്ജു കെകെആറിലേക്ക് പോയാൽ അത് താരത്തിന് ഗുണം ചെയ്യുമോ? കെകെആറിൽ സഞ്ജുവിന് ചില വമ്പൻ നേട്ടങ്ങൾ ലഭിക്കാൻ സാധ്യതയുണ്ട്. ഇത് എന്തൊക്കെയാണെന്ന് നോക്കാം.

ക്യാപ്റ്റൻ സ്ഥാനം ഉറപ്പ്

സഞ്ജു സാംസൺ രാജസ്ഥാൻ റോയൽസിന്റെ നായകനാണ്. ഇൗ സ്ഥാനമൊഴിഞ്ഞ് സിഎസ്കെയിലേക്ക് പോയാൽ അവിടെ നായകസ്ഥാനം ലഭിക്കാനുള്ള സാധ്യത വിരളമാണ്. എന്നാൽ കെകെആറിലേക്കെത്തിയാൽ സഞ്ജുവിനെ നായകനായി പരിഗണിക്കാൻ സാധ്യത കൂടുതലാണ്. അവസാന സീസണിൽ സീനിയർ താരം അജിങ്ക്യ രഹാനെയെ നായകനാക്കി കെകെആർ നടത്തിയ പരീക്ഷണം അമ്പേ പാളിപ്പോയിരുന്നു. അതുകൊണ്ടുതന്നെ ഇത്തവണ പുതിയൊരു നായകനെ കെകെആറിന് അത്യാവശ്യമാണ്.

സഞ്ജു രാജസ്ഥാനെ കിരീടത്തിലേക്കെത്തിച്ചിട്ടില്ലെങ്കിലും ഫെെനലിലേക്കെത്തിച്ച ക്യാപ്റ്റനാണ്. നായകനെന്ന നിലയിൽ മികവ് തെളിയിച്ച സഞ്ജുവിനെ ക്യാപ്റ്റനാക്കാൻ കെകെആർ തയ്യാറാവുമെന്നുറപ്പ്. സഹതാരങ്ങളുമായി വളരെയധികം സൗഹൃദം കാത്തു സൂക്ഷിക്കുന്ന താരമാണ് സഞ്ജു. അതുകൊണ്ടുതന്നെ കെകെആറിന്റെ നായകനായി സഞ്ജു വരുന്നതിൽ കെകെആർ താരങ്ങൾക്കും വലിയ പ്രശ്നമുണ്ടാവില്ല. കെകെആറിലേക്ക് കൂടുമാറ്റം നടത്തിയാൽ ഐപിഎല്ലിലെ നായകസ്ഥാനം നിലനിർത്തി മുന്നോട്ട് പോകാൻ സഞ്ജുവിന് സാധിച്ചേക്കും.

സഞ്ജുവിന് പണി വരുന്നു, കാത്തിരിക്കുന്നത് വെല്ലുവിളി; ഏഷ്യാ കപ്പിന് മുൻപ് മുന്നറിയിപ്പ് നൽകി മുൻ ഇന്ത്യൻ താരം
ഇന്ത്യൻ ടീമിലെ സ്ഥാനത്തിനും ഗുണം ചെയ്യും

2026ലെ ടി20 ലോകകപ്പിൽ സഞ്ജു സാംസണിന് ഇന്ത്യൻ ടീമിൽ സ്ഥാനമുണ്ടാകുമോയെന്നത് ഉറപ്പ് പറയാൻ സാധിക്കാത്ത കാര്യമാണ്. ഓപ്പണർ സ്ഥാനത്തിനായി കടുത്ത മത്സരമാണ് നടക്കുന്നത്. മധ്യനിരയിൽ കളിപ്പിക്കാനാണെങ്കിൽ സഞ്ജുവിനെക്കാൾ മികവ് ജിതേഷ് ശർമക്കുണ്ട്. ഇൗ സാഹചര്യത്തിൽ സഞ്ജുവിന് വരുന്ന ടി20 ലോകകപ്പിലെ സീറ്റ് സാധ്യത ഉയർത്താൻ കെകെആറിലേക്കുള്ള കൂടുമാറ്റം സഹായിച്ചേക്കും.

വരുന്ന ലോകകപ്പ് വരെ ഗൗതം ഗംഭീർ തന്നെയാവും ഇന്ത്യയുടെ മുഖ്യ പരിശീലകൻ. കെകെആറിനെ രണ്ട് തവണ കിരീടം ചൂടിച്ച ക്യാപ്റ്റനും 2023 സീസണിൽ കപ്പടിപ്പിച്ച പരിശീലകനുമാണ് ഗംഭീർ. കെകെആറുമായി അടുത്ത ബന്ധമുള്ള ഗംഭീർ സഞ്ജു കെകെആറിലേക്കെത്തുമ്പോൾ സ്വാഭാവികമായും പിന്തുണ നൽകും. ഇത് ഇന്ത്യൻ ടീമിലേക്കുള്ള ടീം തിരഞ്ഞെടുപ്പിലും പ്രതിഫലിക്കും. അതുകൊണ്ടുതന്നെ സഞ്ജു കെകെആറിലേക്ക് കൂടുമാറുന്നത് താരത്തിന്റെ അന്താരാഷ്ട്ര കരിയറിനും ഗുണം ചെയ്തേക്കും.

ഫീൽഡിൽ പറക്കും ക്യാച്ച്, ബാറ്റിങ്ങിൽ വെടിക്കെട്ട്; കേരള ക്രിക്കറ്റ്‌ ലീഗ് പ്രദർശന മത്സരത്തിൽ സഞ്ജുവിൻ്റെ മിന്നും പ്രകടനം
കൂടുതൽ പ്രതിഫലം ലഭിച്ചേക്കും

രാജസ്ഥാൻ റോയൽസിൽ 18 കോടി പ്രതിഫലത്തിലാണ് സഞ്ജു കളിക്കുന്നത്. കെകെആറിലേക്ക് കൂടുമാറ്റം നടത്തിയാൽ സഞ്ജുവിന്റെ പ്രതിഫലത്തിൽ വർധനവുണ്ടാകാൻ സാധ്യത കൂടുതലാണ്. കൂടാതെ രാജസ്ഥാനിൽ ലഭിച്ചതിനെക്കാൾ പിന്തുണ കെകെആറിൽ സഞ്ജുവിന് ലഭിച്ചേക്കും. ഷാരൂഖ് ഖാന്റെ ടീം എന്ന നിലയിൽ വലിയ ആരാധക പിന്തുണ കെകെആറിനുണ്ട്. സഞ്ജു രാജസ്ഥാനിൽ നിന്ന് കെകെആറിലേക്കെത്തിയാൽ വലിയ സ്വീകാര്യത ആരാധകരിൽ നിന്നും ഉണ്ടായേക്കും. കെകെആറിനെപ്പോലൊരു ചാമ്പ്യൻ ടീമിനൊപ്പം കളിക്കുന്നത് സഞ്ജുവിന്റെ ഭാവി കരിയറിനും ഗുണം ചെയ്യുമെന്നുറപ്പിച്ച് പറയാം.