രോഹിത് ശർമ്മയ്ക്ക് ഇന്ന് 38ാം പിറന്നാൾ; മറ്റാർക്കും എത്തിപ്പിടിക്കാൻ കഴിയാത്ത നേട്ടങ്ങൾ സ്വന്തമാക്കിയ ഹിറ്റ്മാൻ, റെക്കോഡുകൾ അറിയാം

Edited byഅനുഷ ഗംഗാധരൻ | Samayam Malayalam | Updated: 30 Apr 2025, 8:43 am

ഇന്ത്യൻ ഏകദിന ക്രിക്കറ്റ് നായകൻ രോഹിത് ശർമയുടെ 38 ആം പിറന്നാൾ ആഘോഷിക്കുകയാണ് ആരാധകർ. ആരാധകർക്ക് ആഘോഷമാക്കാൻ ഒരുപാട് സുവർണ നിമിഷങ്ങൾ ക്രിക്കറ്റിൽ നൽകിയ ഹിറ്റ്മാൻ നിലവിൽ ഐപിഎല്ലിൽ മുംബൈ ഇന്ത്യൻസിനായി ഞെട്ടിപ്പിക്കുക്കുന്ന പ്രകടനം നടത്തി തിരിച്ചെത്തിയിരിക്കുകയാണ്.
അടുത്ത കളിക്ക് മുൻപ് രാജസ്ഥാൻ റോയൽസിന് കനത്ത തിരിച്ചടി; സൂപ്പർ താരത്തിന്റെ കാര്യത്തിൽ സുപ്രധാന അപ്ഡേറ്റ് പുറത്ത്ഐപിഎൽ 2025 സീസണിന്റെ തുടക്കത്തിൽ അത്ര മികച്ച പ്രകടനമായിരുന്നില്ല താരം കാഴ്ചവെച്ചത്. എന്നാൽ നിർണായകമായ മാച്ചിൽ രോഹിത് ശർമ ഗംഭീര ഇന്നിങ്സ് പുറത്തെടുത്ത് പോയിന്റ് ടേബിളിൽ താഴെ തട്ടിൽ നിന്ന മുംബൈ ഇന്ത്യൻസിന് പുതുജീവൻ നൽകി. 2016 നു ശേഷം തുടർച്ചയായി അർധ സെഞ്ചുറി നേട്ടവും ഈ സീസണിൽ ഹിറ്റ്മാൻ സ്വന്തമാക്കി.
ഈ പിറന്നാൾ ആഘോഷിക്കുമ്പോൾ ഒരുപാട് നേട്ടങ്ങൾ ഇന്ത്യൻ ക്രിക്കറ്റിന് സമ്മാനിച്ച രോഹിത് ശർമയുടെ റെക്കോഡുകളെ കുറിച്ച് പറയാതെവയ്യ. ഐപിഎല്ലിൽ താരം നേടിയ റെക്കോഡുകൾ പരിശോധിക്കാം.

20 പ്ലേയർ ഓഫ് ദി മാച്ച് പുരസ്‌കാരം നേടുന്ന ആദ്യ ഇന്ത്യക്കാരൻ

ഐപിഎല്ലിൽ 20 തവണ പ്ലേയർ ഓഫ് ദി മാച്ച് പുരസ്കരം നേടിയ ഏക ഇന്ത്യൻ ക്രിക്കറ്റെർ ആണ് രോഹിത് ശർമ. മറ്റൊരു ഇന്ത്യൻ താരത്തിനും ഈ നേട്ടം ഇതുവരെ സ്വന്തമാക്കാൻ സാധിച്ചിട്ടില്ല. നിലവിൽ നടക്കുന്ന ഐപിഎൽ 2025 സീസണിൽ ചെന്നൈ സൂപ്പർ കിങ്സിനെതിരെയുള്ള മത്സരത്തിലാണ് രോഹിത് മാൻ ഓഫ് ദി മാച്ച് പുരസ്‌കാരം സ്വന്തമാക്കിയത്. 76 റൺസാണ് ഈ മത്സരത്തിൽ രോഹിത് നേടിയത്. മാത്രവുമല്ല ഈ സീസണിൽ നടത്തിയ ഗംഭീര തിരിച്ചുവരവ് പ്രകടനം കൂടിയായിരുന്നു അത്.

ഐപിഎല്ലിൽ 6000+ റൺസും ഹാട്രിക്കും നേടിയ ഏക താരം

മിക്ക ആരാധകരും രോഹിതിനെ ഓർക്കുന്നത് അദ്ദേഹത്തിൻ്റെ ബാറ്റിങ്ങിന്റെ പേരിലാണ്, എന്നാൽ ഹാട്രിക്ക് നേട്ടം സ്വന്തമാക്കിയ രോഹിത് ശർമയെ കുറിച്ച് അറിയുന്നവർ വിരളമാണ്. ഐപിഎല്ലിൽ മുംബൈയിൽ എത്തുന്നതിന് മുൻപ് താരം ഡെക്കാൻ ചാർജേഴ്സിൽ ആയിരുന്നു. വളർന്നു വരുന്ന ഒരു താരമായിരുന്നു അന്ന് രോഹിത്. അങ്ങനെ 2009 ൽ മുംബൈ ഇന്ത്യൻസ് - ഡെക്കാൻ ചാർജേഴ്സ് മാച്ച് നടക്കുമ്പോളാണ് മുംബൈയെ തകർത്തുക്കൊണ്ട് രോഹിത് ഹാട്രിക്ക് സ്വന്തമാക്കുന്നത്.

ഇതോടെ ഐപിഎൽ ചരിത്രത്തിൽ ആറായിരത്തിലധികം റൺസ് നേടിയ ബാറ്ററും ഹാട്രിക് സമ്മാനിച്ച ബൗളറും എന്ന റെക്കോഡ് കൂടി രോഹിത്തിന്റെ പേരിലായി.

ക്യാപ്റ്റനും കളിക്കാരനുമായി ഏറ്റവും കൂടുതൽ ഐപിഎൽ കിരീടങ്ങൾ

മുംബൈ ഇന്ത്യൻസിനെ അഞ്ച് ഐപിഎൽ കിരീടങ്ങളിലേക്ക് നയിച്ച നായകൻ മാത്രമല്ല അദ്ദേഹം, ഡെക്കാൻ ചാർജേഴ്‌സിനൊപ്പം ഒരു ഐപിഎൽ കിരീടം നേടിയ പ്ലേയർ കൂടിയാണ്. ഇത്തരത്തിൽ കളിക്കാരനായും ക്യാപ്റ്റനായും ആകെ ആറ് ഐപിഎൽ കിരീടങ്ങൾ രോഹിത് സ്വന്തമാക്കി, ഈ റെക്കോഡിൽ അമ്പാട്ടി റായിഡു മാത്രമാണ് അദ്ദേഹത്തിനൊപ്പം നിൽക്കുന്നത്.

ഫൈനലിൽ രണ്ട് അർധസെഞ്ചുറി നേടിയ ഏക ഐപിഎൽ ക്യാപ്റ്റൻ

ഐപിഎൽ ചരിത്രത്തിൽ ഫൈനലിൽ രണ്ട് അർധസെഞ്ചുറികൾ നേടിയ ഏക ക്യാപ്റ്റനാണ് അദ്ദേഹം. 2015ൽ ചെന്നൈ സൂപ്പർ കിംഗ്‌സിനെതിരെ 26 പന്തിൽ 50 റൺസ് അടിച്ചുകൂട്ടിയ അദ്ദേഹം ഫൈനലിൽ പ്ലെയർ ഓഫ് ദി മാച്ച് പുരസ്കാരവും സ്വന്തമാക്കിയിരുന്നു. 2020ൽ, ഡൽഹി ക്യാപിറ്റൽസിനെതിരായ ഫൈനലിൽ 51 പന്തിൽ 68 റൺസെടുത്ത് എംഐക്ക് മറ്റൊരു കിരീടം നേടികൊടുക്കുകയും ചെയ്തു.